រាជធានីភ្នំពេញ ៖ ក្មេងប្រុសជំទង់ម្នាក់ ខណៈជិះម៉ូតូ ១គ្រឿង តាមផ្លូវ បានជួបនឹងជនសង្ស័យម្នាក់ ដែលមិនធ្លាប់ស្គាល់គ្នាពីមុនមកទេ ហើយត្រូវបានជនសង្ស័យម្នាក់នោះ សុំជិះម៉ូតូជាមួយ…
រាជធានីភ្នំពេញ ៖ ក្មេងប្រុសជំទង់ម្នាក់ ខណៈជិះម៉ូតូ ១គ្រឿង តាមផ្លូវ បានជួបនឹងជនសង្ស័យម្នាក់ ដែលមិនធ្លាប់ស្គាល់គ្នាពីមុនមកទេ ហើយត្រូវបានជនសង្ស័យម្នាក់នោះ សុំជិះម៉ូតូជាមួយ ដោយពឹងឲ្យជូនទៅកាន់សាលាសង្កាត់ត្រពាំងក្រសាំង លុះពេលធ្វើដំណើរទៅដល់កន្លែងស្ងាត់ ស្រាប់តែជនសង្ស័យដកកាំបិតចិតបន្លែ ដាក់លើ.ក គំរាមកា.ប់សម្លា.ប់ និងស្រែកឲ្យឈប់ រួចធាក់ទម្លាក់ពីលើម៉ូតូ ដួលកប់ទឹកភក់ ប្ល.ន់យកម៉ូតូបានសម្រេច រួចហើយជិះគេចខ្លួនបាត់ស្រមោល តែម្ដង ។
ហេតុការណ៍នោះបានកើតឡើងកាលពីវេលាម៉ោង១១ និង៣៥នាទីថ្ងៃត្រង់ ថ្ងៃទី២៣ ខែតុលា ឆ្នាំ២០២៤នេះ នៅតាមផ្លូវលំបង្គោលភ្លើង ហៅផ្លូវរថភ្លើងថ្មី ស្ថិតនៅក្នុងក្នុងភូមិអក្សរ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ក្មេងប្រុសជំទង់រងគ្រោះ ឈ្មោះ រស់ រាត្រី អាយុ១៧ឆ្នាំ ជាសិស្សថ្នាក់ទី១១ មានទីលំនៅភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ បាត់បង់ម៉ូតូម៉ូតូ ម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២២ មិនចាំស្លាកលេខ ។
ក្មេងប្រុសរងគ្រោះខាងលើ បាននិយាយថា នៅមុនកើតហេតុ ខ្លួនបានជិះម៉ូតូ ១គ្រឿងនោះ ចេញពីផ្ទះ ហើយបានជួបជនសង្ស័យម្នាក់នៅតាមមហាវិថីឈ្នះឈ្នះ ដែលមិនធ្លាប់ស្គាល់គ្នាពីមុនមកនោះទេ។ ពេលនោះ ជនសង្ស័យ បានហៅ សុំជិះដោយសារ និងពឹងឲ្យខ្លួនជួយឌុបជូនទៅកាន់សង្កាត់ត្រពាំងក្រសាំង។ ដោយមានការអាណិតអាសូរ ខ្លួនក៏បានយល់ព្រមឲ្យជិះជាមួយ ដូចធ្វើបុណ្យ ហើយមិនបានគិតដល់ ឬស្មានថា ជនសង្ស័យរូបនោះគឺជាចោរឡើយ ស្មានថា ជាមនុស្សល្អ ។
ក្មេងប្រុសរងគ្រោះ បាននិយាយបន្តទៀតថា ខ្លួនបានដឹកជនសង្ស័យរូបនោះ ធ្វើដំណើរតាមផ្លូវលំបង្គោលភ្លើង ហៅផ្លូវរថភ្លើងថ្មី ដែលពោរពេញទៅដោយទឹក និងភក់ រអិលពិបាកជិះខ្លាំងណាស់។ មិនតែប៉ុណ្ណោះ ដោយសារតែផ្លូវលំបាក ទើបពុំមានអ្នកដំណើរដោយម៉ូតូ ឬ ថ្មើរជើង ឬក៏រថយន្តធុនតូចបើកឆ្លងកាត់ឡើយ គឺមានតែរថយន្តធុនធំៗប៉ុណ្ណោះ។ លុះពេលទៅដល់ត្រង់ចំណុចកើតហេតុ ដែលជាកន្លែងស្ងាត់ ស្រាប់តែជនសង្ស័យ ដកកាបិតមកដាក់លើ.ក គំរាមកា.ប់សម្លា.ប់ ហើយឲ្យឈប់ រួចធាក់ខ្លួនទម្លាក់ពីលើម៉ូតូ បណ្តាលឲ្យដួលកប់ភក់ ហើយយកជិះម៉ូតូគេចខ្លួនបាត់ ដោយសុវត្ថិភាព ។
បើតាមប្រភពពីកន្លែងកើតហេតុ បានបញ្ជាក់ប្រាប់ថា មុនពេលយកម៉ូតូគេចខ្លួន ជនសង្ស័យបានបោះចោលកាំបិតចិតបន្លែ នៅជិតកន្លែងកើតហេតុនោះ ចំណែកក្មេងប្រុសរងគ្រោះ បានរត់ទៅផ្ទះ ប្រាប់ឪពុក បង្កការភ្ញាក់ផ្អើលទាំងថ្ងៃ ។ បន្ទាប់មកឪពុក បាននាំទៅដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលត្រពាំងក្រសាំង ហើយនគរបាលប៉ុស្តិ៍ បាននាំក្មេងប្រុសរងគ្រោះ ទៅចង្អុលបង្ហាញទីតាំងកើតហេតុ ។ ខណៈនោះនគរបាល បានរកឃើញកាបិតចិតបន្លែ ដែលជនសង្ស័យ បោះចោលនោះផងដែរ រួចបានទទួលពាក្យបណ្ដឹងជនរងគ្រោះ ដើម្បីធ្វើការស្រាវជ្រាវតាមចាប់ខ្លួនចោរប្លន់យកមកផ្ដន្ទាទោសតាមច្បាប់ ៕
ចែករំលែកព័តមាននេះ