ខេត្តបាត់ដំបង ៖ កាកសំណល់គ្រប់ប្រភេទយ៉ាងតិចជាង១១០តោន ដែលបានបន្សល់ទុកពី «ពិធីតាំងពិព័រណ៌ និងពិធីបុណ្យអុំទូកក្នុងរយៈពេល០៥ថ្ងៃ» ប៉ុន្តែកម្លាំងផ្នែកអនាម័យរដ្ឋបាលក្រុងបាត់ ដំបង ចំណាយពេលត្រឹមមួយថ្ងៃប៉ុណ្ណោះ ប្រមូលអស់ពីទីតាំងចោលកាកសំណល់…
ខេត្តបាត់ដំបង ៖ កាកសំណល់គ្រប់ប្រភេទយ៉ាងតិចជាង១១០តោន ដែលបានបន្សល់ទុកពី «ពិធីតាំងពិព័រណ៌ និងពិធីបុណ្យអុំទូកក្នុងរយៈពេល០៥ថ្ងៃ» ប៉ុន្តែកម្លាំងផ្នែកអនាម័យរដ្ឋបាលក្រុងបាត់ ដំបង ចំណាយពេលត្រឹមមួយថ្ងៃប៉ុណ្ណោះ ប្រមូលអស់ពីទីតាំងចោលកាកសំណល់ ដែលចំនួននេះមានការកើនឡើងជិត៥០% បើធៀបទៅនឹងឆ្នាំទៅមិញ ។ នេះបើតាមរបាយការណ៍បូកសរុបរបស់រដ្ឋបាលក្រុងបាត់ដំបង ។
លោក លាង វាសនា អភិបាលក្រុងបាត់ដំបងបានថ្លែងប្រាប់កោះសន្តិភាព នៅព្រឹកថ្ងៃទី២១ តុលា នេះថា កាកសំណល់គ្រប់ប្រភេទយ៉ាងតិចជាង១១០តោនបានបន្សល់ទុកពាសពេញតំបន់ «ប្រារព្វពិធីតាំងពិព័រណ៌ និងពិធីបុណ្យអុំទូក» ទាំងនៅតាមដងស្ទឹងសង្កែ ទាំងនៅលើគោក ក្រោយពិធីនេះបានព្រឹត្តទៅក្នុងរយៈពេល០៥ថ្ងៃ ហើយត្រូវបានបញ្ចប់ ។
លោកអភិបាលក្រុងបានបញ្ជាក់ថា ចំនួនកាកសំណល់ឆ្នាំនេះ មានការកើនឡើងច្រើនរហូតជិង៥០% បើធៀបទៅនឹងឆ្នាំមុន ដែលមានរយៈពេលដូចគ្នា ។ ប៉ុន្តែកម្លាំងផ្នែកអនាម័យរដ្ឋបាលក្រុង ដែលយើងបានត្រៀមលក្ខណៈរួចជាមុន បានបោសសំអាតរួចរាល់ត្រឹមរយៈពេលមួយថ្ងៃប៉ុណ្ណោះ បន្ទាប់ពីពិធីបុណ្យប្រពៃណីជាតិនេះត្រូវបានបញ្ចប់ ។
យោងតាមរបាយការណ៍បូកសរុបរបស់រដ្ឋបាលក្រុងបាត់ដំបង កាកសំណល់ដែលបន្សល់ទុកពីពិធីបុណ្យអុំទូកខាងលើនេះ គឺក្នុងរយៈពេល០៥ថ្ងៃ ដោយរាប់ចាប់ពីថ្ងៃចាប់ផ្ដើមតាំងពិព័រណ៌រហូតដល់ថ្ងៃបញ្ចប់នៃពិធីបុណ្យអុំទូក (១៣ និង១៨ ខែតុលា ២០២៤) ។ របាយការណ៍ដដែលបានឲ្យដឹងថា រយៈពេល០៥ថ្ងៃនៃពិធីតាំងពិព័រណ៌ និងបុណ្យអុំទូកឆ្នាំ២០២៤ នេះ កម្លាំងផ្នែកអនាម័យប្រមូលកាកសំណល់បានចំនួន១១៤តោន ខណៈឆ្នាំ២០២៣កន្លងទៅ កាកសំណល់ដែលបន្សល់ទុកពីកម្មវិធីតាំងពីព័រណ៌ និង បុណ្យអុំទូក មានត្រឹមតែចំនួន៦៨តោនតែប៉ុណ្ណោះ បើធៀបទៅនឹងរយៈពេល០៥ថ្ងៃដូចគ្នា ។
បើតាមក្រុមការងារចុះប្រមូលកាកសំណល់បាននិយាយថា កាកសំណល់ដែលបន្សល់ទុកពីពិធី បុណ្យអុំទូកនេះ មានទាំងនៅក្នុងទឹកស្ទឹងសង្កែ មានទាំងនៅលើគោក ដែលភាគច្រើននៃកាកសំណល់ គឺថង់ផ្លាស្ទិក និង ប្រអប់ស្នោរ ។ល។ ក្រុមការងារដដែលបានបញ្ជាក់ដែរថា ពិធីបុណ្យអុំទូកឆ្នាំនេះ កាកសំណល់មានការកើនឡើងស្ទើរទ្វេដង បើធៀបទៅនឹងឆ្នាំទៅមិញ ។ ហើយឆ្នាំនេះ ប្រជាពលរដ្ឋក៏មានការកើនឡើងដែរ ក្នុងការមកចូលរួមទស្សនាកម្សាន្តក្នុងពិធីបុណ្យអុំទូក ។ នេះបើតាមការកត់សម្គាល់។
ប៉ុន្តែយ៉ាងណា កម្លាំងផ្នែកអនាម័យរបស់សាលាក្រុង បានធ្វើការបោសសំអាតរួចរាល់ត្រឹមរយៈពេលមួយថ្ងៃអស់ពីទីតាំងប្រារព្វពិធីបុណ្យ ។ ជុំវិញបញ្ហាការសំណល់នេះ លោក លាង វាសនា អភិបាលក្រុងបាត់ដំបងបាននិយាយថា ដោយយោងលើបទពិសោធន៍ កាលពីឆ្នាំទៅមិញ ដែលមានខ្វះចន្លោះ ឆ្នាំនេះលោកបានរៀបចំ និងត្រៀមលក្ខណៈរួចជាស្រេចនូវសម្ភារសម្រាប់វេចខ្ចប់កាកសំណល់ មានដូចជាថង់ផ្លាស្ទិក កម្លាំងផ្នែកអនាម័យ។ល។
លោកបានប្រាប់ថា ឆ្នាំនេះ មន្ត្រីជំនាញរបស់លោកបានដើរចែកថង់សម្រាប់វេចខ្ចប់កាកសំណល់ជូនដល់អាជីវករលក់ដូរតាំងពីមុនពេលចាប់ផ្ដើមប្រារព្ធកម្មវិធីបុណ្យ ដើម្បីឲ្យពួកគេត្រៀមវេចខ្ចប់កាកសំណល់រក្សាទុក ។ ហើយរដ្ឋបាលក្រុង ក៏បានត្រៀមកម្លាំងដោយឡែកជាច្រើននាក់ ដើម្បីរង់ចាំជួយប្រមូលកាកសំណល់ នៅពេលដែលកម្លាំងផ្នែកអនាម័យប្រមូលមិនទាន់ពេលវេលា ក្រោយបញ្ចប់ពិធីបុណ្យ ។ ដូច្នេះហើយទើបយើងចំណាយពេលត្រឹមមួយថ្ងៃប៉ុណ្ណោះ ប្រមូលកាកសំណល់ជាង១១០តោន អស់ពីតំបន់ប្រារព្វពិធីតាំងពិព័រណ៌ និងពិធីបុណ្យអុំទូក ។
លោក លាង វាសនា ក៏បានលើកឡើងដែរថា ពិធីបុណ្យអុំទូកឆ្នាំនេះ កាកសំណល់មានការកើនឡើងជាងឆ្នាំមុន ស្ទើរពាក់កណ្ដាលដោយសារតែពិធីបុណ្យអុំទូកឆ្នាំនេះ មានប្រជាពលរដ្ឋចូលរួមទស្សនាច្រើនជាងឆ្នាំមុន ។ បើតាមរបាយការណ៍មន្ទីរទេសចរណ៍ខេត្តបានឲ្យដឹងថា ពិធីបុណ្យអុំទូកនៅខេត្តបាត់ដំបង សម្រាប់ឆ្នាំ២០២៤ នេះមានភ្ញៀវទេសចរជាតិនិងអន្តរជាតិ ចូលរួមទស្សនាកម្សាន្តជាង ១,១៧ លាននាក់ ដែលចំនួននេះ មានការកើនឡើងរហូតដល់៧,១១% បើធៀបទៅនឹងឆ្នាំទៅមិញ (២០២៣) ដែលមានភ្ញៀវទេសចរចូលរួមទស្សនាកម្សាន្តត្រឹមតែជាង១,០៩លាននាក់ ។
លោក លាង វាសនា បានអះអាងថា ឆ្នាំនេះ យើងធ្វើបានល្អប្រសើរ ក្នុងការប្រមូលកាកសំណល់ ក្រោយពិធីបុណ្យអុំទូកត្រូវបានបញ្ចប់ ដោយសារយើងបានត្រៀមលក្ខណៈរួចជាមុន ។ ហើយឆ្នាំក្រោយៗទៀត លោករំពឹងថា នឹងធ្វើឲ្យកាន់តែល្អប្រសើរជាងនេះ តាមរយៈការឆ្លងកាត់បទពិសោធន៍ពីមួយឆ្នាំទៅមួយឆ្នាំ ៕
ចែករំលែកព័តមាននេះ