បុណ្យចេញវស្សាមានប្រវត្តិរឿងទាក់ទិនព្រះពុទ្ធផ្ទាល់
- ភ្នំពេញ
រាជធានីភ្នំពេញ ៖ ថ្ងៃ១៥កើត ខែអស្សុជ ត្រូវនឹងថ្ងៃទី១៧ តុលា ២០២៤ ជាថ្ងៃបុណ្យចេញវស្សា ។ បុណ្យនេះមានប្រវត្តិជាប់ទាក់ទងទៅនឹងរឿងព្រះពុទ្ធអង្គផ្ទាល់តែម្តង…
រាជធានីភ្នំពេញ ៖ ថ្ងៃ១៥កើត ខែអស្សុជ ត្រូវនឹងថ្ងៃទី១៧ តុលា ២០២៤ ជាថ្ងៃបុណ្យចេញវស្សា ។ បុណ្យនេះមានប្រវត្តិជាប់ទាក់ទងទៅនឹងរឿងព្រះពុទ្ធអង្គផ្ទាល់តែម្តង ។
ដំណើររឿងនិទានថា ពេលមួយព្រះពុទ្ធទ្រង់គង់ចាំព្រះវស្សាអស់ត្រៃមាសនៅឯឋានតាវតឹង្សសួគ៌ ាជាកន្លែងដែលព្រះពុទ្ធទ្រង់សម្តែងព្រះអភិធម្មទេសនាប្រោសព្រះនាងមាយា (ដែលត្រូវជាព្រះមាតារបស់ព្រះអង្គ) និងពួកទេវតាដទៃទៀត ។
នៅពេលចេញវស្សា ព្រះអង្គក៏យាងចុះមកកាន់ឋានមនុស្សលោកវិញ ដោយមានការទទួលស្វាគមន៍ និងបដិសណ្ឋារកិច្ចយ៉ាងសប្បាយរីករាយក្រៃលែង ។ រឿងនេះបានកើតឡើង៧ឆ្នាំ បន្ទាប់អំពីព្រះពុទ្ធទ្រង់បានត្រាស់ដឹង ។
ពិធីយ៉ាងអធិកអធមនេះប្រារព្ធឡើងដើម្បីរំឭកដល់ព្រឹត្តិការណ៍ដ៏សំខាន់នេះ ។ កន្លែងទ្រង់យាងចុះនោះឈ្មោះ«ក្រុងសង្កស្ស:» ស្ថិតនៅខាងជើងប្រទេសឥណ្ឌា ។ ក្នុងពេលធ្វើបុណ្យចេញវស្សា ជាទូទៅនៅពេលល្ងាច ឬយប់ថ្ងៃ១៥កើត ខែអស្សុជ ភិក្ខុសង្ឃដែលគង់ចាំវស្សា អស់ត្រីមាសក្នុងអាវាសណាមួយ ត្រូវជួបជុំគ្នាក្នុងព្រះវិហារ ដើម្បីនមស្សការព្រះរតនត្រ័យ និងសម្តែងអាបត្តិ ។
ពុទ្ធបរិស័ទនិមន្តព្រះសង្ឃសម្តែងធម៌ទេសនា «រឿងព្រះវេស្សន្តរ» គឺជារឿងព្រះពោធិសត្វ ដែលយោនយកកំណើតក្នុងជាតិចុងក្រោយបង្អស់ដើម្បីបំពេញទានបារមី ។
ទេសនាមហាជាតកត្រូវយកមកសម្តែងជូនពុទ្ធបរិស័ទជាទីសណ្តាប់នៅក្នុងថ្ងៃ១៥កើតនេះផងដែរ ។ ព្រឹកឡើង ពុទ្ធបរិស័ទយកស្រាក់បាយ សម្ល និងចង្ហាន់ ផ្សេងៗមកឈរតម្រៀបគ្នាជាជួររង់ចាំដាក់បាត្រព្រះសង្ឃដែលព្រះនេត្រដាក់ចុះ និងកាន់ទ្រនូវបាត្រ និមន្តសន្សឹមៗតាមជួរសប្បុរសជន ដើម្បីទទួលចង្ហាន់បិណ្ឌបាត្រ ប្រកបដោយសេចក្តីមេត្តា និងកាយវិការស្រគត់ស្រគំសមរម្យ ។
បន្ទាប់មកសប្បុរសជនទាំងអស់នាំគ្នាទៅជួបជុំនៅក្នុងសាលាធំ ជាកន្លែងដែលពុទ្ធបរិស័ទប្រារព្ធពិធី ផ្សេងៗ ដើម្បីសមាទាននិច្ចសីល ឬឧបោសថសីល ស្តាប់ព្រះសង្ឃសម្តែងធម្មទេសនា និងធ្វើសមាធិ ។ កម្មវិធីប្រជាប្រិយ ផ្សេងៗ ត្រូវបានយកមកសម្តែងនិងអប់រំប្រជាពលរដ្ឋ ៕
ចែករំលែកព័តមាននេះ