ប្រទេសឥណ្ឌូណេស៊ី ៖ ចលនាថ្មីមួយប្រឆាំងនឹងកីឡាករកូនកាត់ និងចូលសញ្ជាតិរបស់ក្រុមជម្រើសជាតិបានធ្វើឱ្យកក្រើកពិភពបាល់ទាត់ នៅក្នុងប្រទេសឥណ្ឌូណេស៊ី។ ដោយចលនាថ្មីនេះបានក្លាយជាប្រធានបទដ៏ក្តៅគគុកបំផុត បន្ទាប់ពីបដាតវ៉ាមួយចំនួនត្រូវបានដាក់បង្ហាញលើស្ពានអាកាសថ្មើរជើងក្នុងរដ្ឋធានីហ្សាកាតា កាលពីថ្ងៃទី២៩ ខែកញ្ញា ឆ្នាំ២០២៤។…
ប្រទេសឥណ្ឌូណេស៊ី ៖ ចលនាថ្មីមួយប្រឆាំងនឹងកីឡាករកូនកាត់ និងចូលសញ្ជាតិរបស់ក្រុមជម្រើសជាតិបានធ្វើឱ្យកក្រើកពិភពបាល់ទាត់ នៅក្នុងប្រទេសឥណ្ឌូណេស៊ី។ ដោយចលនាថ្មីនេះបានក្លាយជាប្រធានបទដ៏ក្តៅគគុកបំផុត បន្ទាប់ពីបដាតវ៉ាមួយចំនួនត្រូវបានដាក់បង្ហាញលើស្ពានអាកាសថ្មើរជើងក្នុងរដ្ឋធានីហ្សាកាតា កាលពីថ្ងៃទី២៩ ខែកញ្ញា ឆ្នាំ២០២៤។
បដាអស់ទាំងនោះបានសរសេរថា «កីឡាករចូលសញ្ជាតិមិនមែនជាជនជាតិដើមឡើយ។ យើងគឺជាអ្នកដែលបានកើតនៅទីនេះ រួមជាមួយសមាគមបាល់ទាត់នៃឈ្មោះប្រទេសឥណ្ឌូណេស៊ី (PSSI)» ។
បដាទាំងនេះទទួលបានការចាប់អារម្មណ៍យ៉ាងឆាប់រហ័សនៅលើប្រព័ន្ធផ្សព្វផ្សាយសង្គម X និង Instagram ផងដែរ។ ប៉ុន្តែបើទោះជាការប្រឆាំងទៅនឹងកីឡាករចូលសញ្ជាតិបានកើតមានមួយរយៈយ៉ាងណាក៏ដោយ ក៏សកម្មភាពនេះបានទទួលភាពទាក់ទាញ ខណៈដែលចំនួនកីឡាករកូនកាត់ និងចូលសញ្ជាតិជាច្រើននៅក្នុងក្រុមជម្រើសជាតិ នៅតែបន្តកើនឡើង។
ជាក់ស្តែង អំឡុងពេលការប្រកួតមិត្តភាពអន្តរជាតិរបស់សហព័ន្ធបាល់ទាត់ពិភពលោក FIFA កាលពីខែកញ្ញាកន្លងទៅ ប្រទេសឥណ្ឌូណេស៊ីបានកោះហៅកីឡាករកូនកាត់ និងចូលសញ្ជាតិចំនួន១១នាក់។ ក្រោមការដឹកនាំរបស់លោក Shin Tae-yong គ្រូបង្វឹកកូរ៉េខាងត្បូង ក្រុមជម្រើសជាតិឥណ្ឌូណេស៊ី ទទួលបានលទ្ធផលស្មើជាមួយអារ៉ាប៊ីសាអូឌីត ១-១ និងអូស្ត្រាលី ០-០ ក្នុងពូល C ការប្រកួតជម្រុះជុំទី៣ ពានរង្វាន់ World Cup ឆ្នាំ ២០២៦ ប្រចាំទ្វីបអាស៊ី។ ការរត់ដ៏ខ្លាំងរបស់ឥណ្ឌូណេស៊ីបានបន្តពេញមួយឆ្នាំ ២០២៤ បន្ទាប់ពីការបង្ហាញទម្រង់លេងដ៏គួរឱ្យចាប់អារម្មណ៍ក្នុង Asian Cup និង U23 Asian Cup។
គិតត្រឹមខែតុលានេះ ចំនួនកីឡាករកូនកាត់ និងចូលសញ្ជាតិក្នុងក្រុមជម្រើសជាតិឥណ្ឌូណេស៊ីបានកើនដល់១៣នាក់ ដោយរួមមានកីឡាករមកពីលីគកំពូលហូឡង់ កីឡាករ Mees Hilgers របស់ក្រុម Twente និងកីឡាករ Eliano Reijnders របស់ក្រុម PEC Zwolle ។
ចលនាប្រឆាំងនេះមិនត្រឹមតែផុសផុលតាមរយៈការលើកបដា និងនៅប្រព័ន្ធផ្សព្វផ្សាយសង្គមប៉ុណ្ណោះទេ ប៉ុន្តែថែមទាំងទទួលបានការគាំទ្រពីសំណាក់ឥស្សរជនមានឥទ្ធិពល រួមទាំងសមាជិកសភាតំណាងប្រទេសឥណ្ឌូណេស៊ីផងដែរ។ តួយ៉ាង លោក Hifni Hasan សមាជិកគណៈកម្មាធិការអូឡាំពិកឥណ្ឌូណេស៊ី ធ្លាប់បាននិយាយជាមួយលោកគ្រូបង្វឹក Shin Tae-yong ដោយផ្ទាល់ផងដែរ។ លោក Hasan បានប្រាប់សារព័ត៌មានក្នុងស្រុកដូច្នេះថា «ខ្ញុំបានព្យាយាមប្រាប់គាត់កុំឱ្យនាំយកកីឡាករកូនកាត់ និងចូលសញ្ជាតិច្រើនពេកចូលក្នុងបាល់ទាត់ឥណ្ឌូណេស៊ី។
ទោះយ៉ាងណាក៏ដោយ លោក Shin Tae-yong បានការពារការសម្រេចចិត្តនេះថា វាជារឿងមិនអាចប្រកែកបានដែលវត្តមានរបស់ពួកគេបានលើកកម្ពស់ដល់ក្រុមជម្រើសជាតិឥណ្ឌូណេស៊ី។ ហើយលោកសង្ឃឹមថា អ្នករិះគន់នឹងទទួលយកទស្សនៈបើកចំហបន្ថែមទៀត ដោយទទួលស្គាល់តម្លៃដែលកីឡាករទាំងនេះផ្តល់ជូនក្រុមជម្រើសជាតិ ជាងការមើលឃើញពួកគេជាឧបសគ្គក្នុងការអភិវឌ្ឍន៍ទេពកោសល្យពីកំណើត។
ពាក់ព័ន្ធរឿងនេះ សមាគមបាល់ទាត់ឥណ្ឌូណេស៊ីបានលើកឡើងថា ខណៈពេលដែលការចូលសញ្ជាតិ គឺជាផ្នែកមួយនៃយុទ្ធសាស្ត្ររយៈពេលវែង ដោយសង្កត់ធ្ងន់លើសារៈសំខាន់នៃការបណ្តុះបណ្តាលយុវជន ការអភិវឌ្ឍន៍គ្រូបង្វឹក និងការពង្រឹងលីគក្នុងស្រុក ដែលជាមូលដ្ឋានគ្រឹះ សម្រាប់ការរីកចម្រើននៃកីឡាបាល់ទាត់ឥណ្ឌូណេស៊ី។
លោកគ្រូបង្វឹក Shin Tae-yong បានកោះហៅកីឡាករ២៧នាក់ ដើម្បីត្រៀមសម្រាប់ការប្រកួតក្រៅដីនាពេលខាងមុខជាមួយនឹងបារ៉ែន នៅថ្ងៃទី១០ ខែតុលា មុនបន្តប៉ះចិន នៅថ្ងៃទី១៥ ខែតុលា ដែលជាផ្នែកនៃការប្រកួតវគ្គជម្រុះជុំទី៣ ពានរង្វាន់ World Cup ឆ្នាំ ២០២៦ ប្រចាំទ្វីបអាស៊ី។ បច្ចុប្បន្ន ឥណ្ឌូណេស៊ី ឈរនៅលេខ ៤ ក្នុងពូល C ដោយមាន ២ពិន្ទុ ខណៈដែលជប៉ុនឈរកំពូលតារាងមាន៦ពិន្ទុ អារ៉ាប៊ីសាអូឌីតឈរលេខ២ មាន៤ពិន្ទុ បារ៉ែនឈរលេខ៣ មាន៣ពិន្ទុ អូស្ត្រាលីនៅលេខ៥ មាន១ពិន្ទុ និងចិននៅបាតតារាងគ្មានពិន្ទុរាប់៕ (ប្រភព ៖ VnExpress)
ចែករំលែកព័តមាននេះ