ប្រទេសថៃ ៖ ច្បាប់ថ្មីរបស់សាលាក្រុងរាជធានីបាងកក កាលពីសប្តាហ៍មុន បានឱ្យដឹងថា មានតែជនជាតិថៃដែលជាជនក្រីក្រប៉ុណ្ណោះ ដែលនឹងត្រូវបានអនុញ្ញាតឱ្យធ្វើជាអ្នកលក់ដូរតាមដងផ្លូវនៅក្នុងទីក្រុងបាងកក។ ហើយពួកគេក៏នឹងត្រូវបានរារាំងមិនឱ្យជួលជនចំណាកស្រុកមកបម្រើការ ដែលស្ថិតនៅក្នុងចំណោមលក្ខខណ្ឌជាច្រើនទៀត។ បើយោងតាមប្រភពពីកាសែតបាងកកប៉ុស្តិ៍…
ប្រទេសថៃ ៖ ច្បាប់ថ្មីរបស់សាលាក្រុងរាជធានីបាងកក កាលពីសប្តាហ៍មុន បានឱ្យដឹងថា មានតែជនជាតិថៃដែលជាជនក្រីក្រប៉ុណ្ណោះ ដែលនឹងត្រូវបានអនុញ្ញាតឱ្យធ្វើជាអ្នកលក់ដូរតាមដងផ្លូវនៅក្នុងទីក្រុងបាងកក។ ហើយពួកគេក៏នឹងត្រូវបានរារាំងមិនឱ្យជួលជនចំណាកស្រុកមកបម្រើការ ដែលស្ថិតនៅក្នុងចំណោមលក្ខខណ្ឌជាច្រើនទៀត។
បើយោងតាមប្រភពពីកាសែតបាងកកប៉ុស្តិ៍ បានឱ្យដឹងថា លោក ឯកវ៉ារុនយូ អមរ៉ាផាន (Aekvarunyoo Amrapala) អ្នកនាំពាក្យរដ្ឋបាលទីក្រុងបាងកក បានឱ្យដឹងថា លោក ឆាត់ឆា សិទ្ធីភុន (Chadchart Sittipunt) អភិបាលក្រុងបាងកក បានចុះហត្ថលេខាលើសេចក្តីជូនដំណឹងមួយ ដែលបង្ហាញពីច្បាប់ថ្មី ហើយនឹងចូលជាធរមាន នៅពេលត្រូវបានបោះពុម្ពផ្សាយក្នុងព្រឹត្តិប័ត្ររបស់រាជវាំងថៃ Royal Gazette។
តាមបទប្បញ្ញត្តិថ្មី អាជីវករលក់ដូរតាមដងផ្លូវត្រូវមានសញ្ជាតិថៃ កាន់ប័ណ្ណសុខុមាលភាពរបស់រដ្ឋាភិបាល ត្រូវបង់រំលោះផ្ទះដែលសង់ដោយអាជ្ញាធរជាតិលំនៅដ្ឋាន និងទទួលបានប្រាក់ឧបត្ថម្ភសុខុមាលភាពពីក្រសួងអភិវឌ្ឍន៍សង្គម និងសន្តិសុខប្រជាជន។ លើសពីនេះទៀតពួកគេត្រូវតែបញ្ចូលក្នុងប្រព័ន្ធពន្ធប្រចាំឆ្នាំរបស់នាយកដ្ឋានប្រាក់ចំណូលផងដែរ។ ប្រាក់ចំណូលពួកគេមិនត្រូវលើសពី៣០ម៉ឺនបាត ដែលស្មើនឹង ៩,១០០ពាន់ដុល្លារអាមេរិកក្នុងមួយឆ្នាំ បន្ទាប់ពីកាត់ការចំណាយទាក់ទងនឹងអាជីវកម្មលើការបង់ពន្ធរបស់ពួកគេហើយ។
អាជីវករលក់តាមដងផ្លូវត្រូវបានអនុញ្ញាតឱ្យជួលកម្មករម្នាក់ ហើយត្រូវតែជាជនជាតិថៃផងដែរ។ អាជីវករក៏ត្រូវទទួលបានការអនុញ្ញាតពីអាជ្ញាធរសុខាភិបាលសាធារណៈ ដែលពាក់ព័ន្ធផងដែរ។ ចំណែកទីតាំងលក់ត្រូវតែធានាថា អ្នកថ្មើរជើងមានទីធ្លាធំទូលាយពី ១.៥ ទៅ ២ ម៉ែត្រដើម្បីដើរចូល អាស្រ័យលើទទឹងផ្លូវ។
តូបនីមួយៗត្រូវបានកំណត់ត្រឹម ៣ ម៉ែត្រការ៉េ ហើយត្រូវតែនៅផ្នែកម្ខាងនៃផ្លូវ ប៉ុន្តែត្រូវមានចម្ងាយយ៉ាងតិច ៥០ម៉ែត្រពីផ្លូវចរចរាណ៍ ដើម្បីធានាសុវត្ថិភាព។ តូបក៏ត្រូវតែមានចន្លោះយ៉ាងហោចណាស់ ៣ម៉ែត្រនៅចន្លោះតូបផ្សេងទៀត ដែលមាន ១០តូបក្បែរ ដើម្បីដំណើរការសម្រាប់ជាច្រកចេញសង្គ្រោះបន្ទាន់៕
ចែករំលែកព័តមាននេះ