ប្រទេសអាល្លឺម៉ង់ ៖ FC Bayern Munich បានបង្កើតប្រវត្តិសាស្ត្រថ្មីមិនធ្លាប់មានពីមុននៅពានរង្វាន់ UEFA Champions League ដោយក្លាយជាក្រុមដំបូងគេស៊ុតបញ្ចូលទីបានរហូតដល់៩គ្រាប់ក្នុងមួយប្រកួត…
ប្រទេសអាល្លឺម៉ង់ ៖ FC Bayern Munich បានបង្កើតប្រវត្តិសាស្ត្រថ្មីមិនធ្លាប់មានពីមុននៅពានរង្វាន់ UEFA Champions League ដោយក្លាយជាក្រុមដំបូងគេស៊ុតបញ្ចូលទីបានរហូតដល់៩គ្រាប់ក្នុងមួយប្រកួត ក្រោយលត់ក្រុមភ្ញៀវ Dinamo Zagreb ក្នុងលទ្ធផល ៩ទល់នឹង២ កាលពីថ្ងៃទី១៧ ខែកញ្ញា ឆ្នាំ២០២៤។ នេះបើតាមប្រភពពី BBC ចេញផ្សាយនៅថ្ងៃទី១៨ ខែកញ្ញា។
ការប្រកួតពានរង្វាន់ UEFA Champions League រដូវកាល ២០២៤-២០២៥ បានចាប់ផ្តើមហើយ កាលពីយប់ថ្ងៃទី១៧ ខែកញ្ញា កន្លងទៅ។ អ្វីដែលពិសេសជាងរដូវកាលមុនៗនោះគឺសម្រាប់រដូវកាលនេះ ធ្វើការប្រកួតប្រជែងស្ថិតក្រោមទម្រង់ថ្មី ដែលត្រូវបានបង្កើតឡើងដោយសហព័ន្ធបាល់ទាត់ទ្វីបអឺរ៉ុប ដែលហៅកាត់ថា UEFA ដោយគ្មានការប្រកួតវគ្គសន្សំពិន្ទុតទៅទៀតហើយ។ ចាប់ពីរដូវកាលនេះតទៅ ជំនួសមកវិញដោយការប្រកួតជាលីគតែមួយដណ្តើមពិន្ទុ និងចំណាត់ថ្នាក់ ស្របពេលចំនួនក្រុមចូលរួមប្រកួតត្រូវបានបង្កើនពី៣២ក្រុមទៅ៣៦ក្រុម ដើម្បីស្វែងរកក្រុមបន្តឡើងទៅកាន់វគ្គ១៦ក្រុមចុងក្រោយ រហូតដល់វគ្គផ្តាច់ព្រ័ត្រ។
ជាក់ស្តែង ទើបតែប្រកួតសប្តាហ៍ទី១ កាលពីថ្ងៃទី១៧ កញ្ញា ក្រុមយក្សអាល្លឺម៉ង់ Bayern Munich បានបង្កើតប្រវត្តិសាស្ត្ររួចបាត់ទៅហើយ នៅកីឡដ្ឋាន Allianz Arena និងកំពុងកាន់កាប់កំពូលតារាងបណ្តោះអាសន្ន គិតត្រឹមសប្តាហ៍ទី១។ នៅក្នុងចំណោម៩គ្រាប់ស៊ុតបញ្ចូលទីលើក្រុមភ្ញៀវមកពីក្រូអាត Dinamo Zagreb នោះ ខ្សែប្រយុទ្ធឆ្នើម Harry Kane សម្រេចបាន៤គ្រាប់ម្នាក់ឯង ដោយ៣គ្រាប់ជាការទាត់បាល់ប៉េណាល់ទី។ ហើយតាមរយៈការស៊ុតបញ្ចូលទី៤គ្រាប់នេះ ប្រធានក្រុមជម្រើសជាតិអង់គ្លេសវ័យ៣១ឆ្នាំរូបនេះ ក៏បង្កើតបានកំណត់ត្រា និងស្ថិតិសំខាន់ៗមួយចំនួន ដូចខាងក្រោម ៖
-កីឡាករអង់គ្លេសស៊ុតបញ្ចូលទីច្រើនជាងគេក្នុងប្រវត្តិសាស្ត្រ Champions League ឬ European Cup ដោយមាន ៣៣គ្រាប់ក្នុងការបង្ហាញខ្លួន ៤៥ប្រកួត
-កីឡាករអង់គ្លេសដំបូងគេស៊ុតបញ្ចូលទីបាន៤គ្រាប់ក្នុង១ប្រកួតពានរង្វាន់ Champions League
-កីឡាករអង់គ្លេសដំបូងគេស៊ុតបញ្ចូលទី៣គ្រាប់ ឬច្រើនជាងនេះ សម្រាប់ក្រុមមិនមែនជាក្រុមអង់គ្លេសនៅ Champions League
-កីឡាករដំបូងគេស៊ុតបាល់ពិន័យ១១ម៉ែត្រ៣ដងក្នុង១ប្រកួតពានរង្វាន់ Champions League ឬ European Cup
-ស៊ុតបញ្ចូលទី៣គ្រាប់១ប្រកួត ឬ Hat-trick លើកទី ២៤ នៅក្នុងអាជីពរបស់ខ្លួន និងជាលើកទី៥ ដែលស៊ុតបញ្ចូលទី៤គ្រាប់១ប្រកួត ឬ Trebles
លទ្ធផលការប្រកួតសប្តាហ៍ទី១ ចំនួន៦គូ កាលពីថ្ងៃទី១៧ ខែកញ្ញា ៖
ចែករំលែកព័តមាននេះ