ប្រទេសចិន ៖ ការលក់នំព្រះខែនៅក្នុងប្រទេសចិនបានធ្លាក់ចុះ នៅមុនថ្ងៃឈប់សម្រាកនៃរដូវស្លឹកឈើជ្រុះ ហើយកត្តាចម្បងបណ្តាលមកពីសេដ្ឋកិច្ចធ្លាក់ចុះ ដែលបង្ខំប្រជាជនចិនជាច្រើនកាត់បន្ថយការចំណាយ។ ហើយក៏ស្របពេលមានការបង្ក្រាបប្រឆាំងអំពើពុករលួយយ៉ាងខ្លាំងក្លាពីរដ្ឋាភិបាលចិន ដែលបាននិងកំពុងរឹតបន្តឹងច្បាប់ សម្រាប់អំណោយតម្លៃថ្លៃៗហួសហេតុ។ នេះបើតាមប្រភពពីសារព័ត៌មាន The Japan News by The Yomiuri Shimbun និង Asia News Network ចេញផ្សាយកាលពីថ្មីៗនេះ។
ការលក់នំព្រះខែដ៏មានឱជារសឆ្ងាញ់រាងដូចព្រះច័ន្ទ ដែលជាប្រពៃណីរបស់ប្រទេសចិន កំពុងតស៊ូនឹងការធ្លាក់ចុះ មុនឈានដល់រយៈពេលនៃការលក់មានកម្រិតខ្ពស់បំផុត។ នៅក្នុងប្រទេសចិន គឺជាទម្លាប់ក្នុងការទទួលទាននំផ្អែមមួយប្រភេទនេះ នៅថ្ងៃឈប់សម្រាកនៃពិធីបុណ្យពាក់កណ្តាលរដូវស្លឹកឈើជ្រុះ ហើយនំព្រះខែត្រូវបានលក់សម្រាប់ទាំងការទិញទៅទទួលទាន និងជាអំណោយដ៏មានតម្លៃផងដែរ សម្រាប់ថ្ងៃឈប់សម្រាកដែលចាប់ផ្តើមនៅថ្ងៃទី១៧ ខែកញ្ញា។
នៅហាងទំនិញមួយចំនួនក្នុងផ្សារទំនើបក្នុងទីក្រុងប៉េកាំង កាលពីថ្ងៃទី៨ ខែកញ្ញា នំព្រះខែរាប់សិបប្រភេទត្រូវបានដាក់តាំងបង្ហាញក្នុងប្រអប់ពណ៌ក្រហម និងមាស ដែលរៀបចំជាពិសេសសម្រាប់អតិថិជន ប៉ុន្តែមានអតិថិជនតិចតួច បើទោះបីជាថ្ងៃចុងសប្តាហ៍យ៉ាងណាក៏ដោយ។ មនុស្សមួយចំនួននិយាយថា ៩០% នៃតម្រូវការនំព្រះខែគឺសម្រាប់ផ្តល់ជាអំណោយ ប៉ុន្តែមនុស្សមួយចំនួនផ្សេងទៀតអះអាងថា ពួកគេទិញសម្រាប់យកទៅទទួលទាននៅផ្ទះតែប៉ុណ្ណោះ។
ស្ត្រីជាជំនួយការលក់ក្នុងហាងម្នាក់បាននិយាយថា «ការលក់នំព្រះខែឆ្នាំនេះ គឺប្រហែលពាក់កណ្តាលកាលពីឆ្នាំមុន អាជីវកម្មហាក់ដូចជាដំណើរការយឺតបន្តិច»។ ខណៈប្រព័ន្ធផ្សព្វផ្សាយអនឡាញចិនមួយបានហៅពិធីបុណ្យសំពះព្រះខែពាក់កណ្តាលរដូវស្លឹកឈើជ្រុះឆ្នាំនេះថា «ពិធីបុណ្យត្រជាក់បំផុតក្នុងប្រវត្តិសាស្ត្រ»។
យោងតាមការប៉ាន់ស្មានដោយសមាគមឧស្សាហកម្មនំព្រះខែចិនបង្ហាញថា ប្រអប់នំព្រះខែភាគច្រើនមានតម្លៃពី ៧០-២២០យ័ន ឬស្មើនឹង ១០-៣១ដុល្លារក្នុងមួយប្រអប់នៅឆ្នាំនេះ ពោលធ្លាក់ចុះពី ៨០-២៨០យ័ន ឬស្មើនឹង ១១-៤០ដុល្លារ កាលពីឆ្នាំមុន។ ការលក់នំព្រះខែជារួមត្រូវបានរំពឹងថានឹងធ្លាក់ចុះមកត្រឹមតែ ២០ពាន់លានយ័ន ឬស្មើនឹងជាង ២.៨២ពាន់លានដុល្លារ ពោលធ្លាក់ចុះជិត ១០% ធៀបនឹងឆ្នាំមុន។ ស្របពេលសង្វាក់ផលិតកម្មត្រូវបានរំពឹងថានឹងធ្លាក់ចុះមកត្រឹម ៣០ម៉ឺនតោន ពោលធ្លាក់ចុះ ២ម៉ឺនតោនធៀបនឹងឆ្នាំមុន។ ខណៈចំណង់ចំណូលចិត្តអ្នកទទួលទានបានធ្លាក់ចុះរួចទៅហើយ ដោយសារតែវិបត្តិសេដ្ឋកិច្ច។
ក្រុមហ៊ុនចិនមួយ ដែលមានសម្ព័ន្ធភាពជាមួយប្រទេសជប៉ុននៅទីក្រុងសៀងហៃ ដែលតែងតែផ្តល់អំណោយនំព្រះខែដល់បុគ្គលិករបស់ខ្លួនជារៀងរាល់ឆ្នាំនោះបាននិយាយថា នៅឆ្នាំនេះខ្លួនជ្រើសរើសនំព្រះខែតម្លៃ ១០០យន់ ដែលមានតម្លៃថោកជាង ៣០% នៃនំដែលបានពួកគេផ្តល់ជូនបុគ្គលកាលពីឆ្នាំមុន។
ការបង្ក្រាបប្រឆាំងអំពើពុករលួយដោយរដ្ឋបាលរបស់លោកប្រធានាធិបតីចិន ស៊ី ជីនពីង (Xi Jinping) ក៏កំពុងរួមចំណែកធ្វើឱ្យការលក់នំព្រះខែធ្លាក់ចុះផងដែរ។ ដ្បិតអាជ្ញាធរចិនដែលបានសន្យាលុបបំបាត់អំពើពុករលួយបានដាក់គោលដៅលើអាហារឆ្ងាញ់ប្រណិតៗតម្លៃថ្លៃ ដោយភ្ជាប់អាហារទាំងនោះជាមួយអំពើពុករលួយ ព្រោះតែតម្លៃថ្លៃហួសហេតុ ដោយក្នុងនោះមានទាំងព្រុយត្រីឆ្លាម សំបុកត្រចៀកកាំផងដែរ។ មិនតែប៉ុណ្ណោះ អាជ្ញាធរក៏នឹងពិនិត្យលើប្រភពចំណូល ពិសេសក្នុងវិស័យអចលនទ្រព្យ។
កាលពីខែមិថុនា ឆ្នាំ ២០២២ នាយកដ្ឋានចំនួន ៤ នៃរដ្ឋាភិបាលកណ្តាលបានបង្កើតច្បាប់ចំនួន ១២ សម្រាប់នំព្រះខែ ដោយមានការរឹតបន្តឹងបន្ថែមទៀត។ នៅក្រោមច្បាប់ និងបទប្បញ្ញត្តិផ្សេងទៀត នំព្រះខែដែលមានតម្លៃចាប់ពី៥០០យន់ ឬច្រើនជាងនេះ ត្រូវបានកំណត់គោលដៅសម្រាប់ការត្រួតពិនិត្យយ៉ាងយកចិត្តទុកដាក់។
តម្លៃនៃការវេចខ្ចប់ក៏មិនគួរលើសពី ១៥% នៃតម្លៃផលិតផលផងដែរ ហើយនំព្រះខែមិនត្រូវលក់ក្នុងកញ្ចប់ជាមួយផលិតផលផ្សេងទៀតឡើយ។ នៅឆ្នាំ ២០២២ រដ្ឋបាលរដ្ឋសម្រាប់បទប្បញ្ញត្តិទីផ្សារ ដែលជាអាជ្ញាធរប្រឆាំងការផ្តាច់មុខរបស់ប្រទេសចិនបានបញ្ជូនបុគ្គលិកចំនួន ២០ម៉ឺននាក់ ដើម្បីធ្វើការត្រួតពិនិត្យនៅនឹងកន្លែងនៃហាងនំព្រះខែជាង ៣ម៉ឺនទីតាំងទូទាំងប្រទេសចិន។ ហើយផលិតផលដែលបានរកឃើញថាបំពានច្បាប់ និងបទប្បញ្ញត្តិត្រូវបានបញ្ជាឱ្យដកហូតចេញពីហាងទាំងអស់។ ហើយនៅឆ្នាំនេះ ហាក់បីដូចជាវិធានការស្រដៀងគ្នានេះកំពុងត្រូវបានអនុវត្តនៅក្នុងតំបន់ផ្សេងៗ។
រដ្ឋាភិបាលចិនបាននិងកំពុងឧបត្ថម្ភធនលើទំនិញថ្លៃៗ ដូចជារថយន្ត និងឧបករណ៍ប្រើប្រាស់ក្នុងផ្ទះក្នុងកិច្ចប្រឹងប្រែងមួយដើម្បីជំរុញការចំណាយរបស់អ្នកប្រើប្រាស់ ដែលមានចំនួន ៤០% នៃផលិតផលក្នុងស្រុកសរុប ឬ GDP របស់ប្រទេសចិន។ ការតស៊ូនឹងការធ្លាក់ចុះការលក់នំព្រះខែ អាចនឹងត្រូវអូសបន្លាយបន្ថែមទៀត បើអាជ្ញាធរចិនបន្តកណ្តាប់ដៃដែករបស់ខ្លួន៕ (ប្រភព ៖ The Japan News by The Yomiuri Shimbun និង Asia News Network)
ចែករំលែកព័តមាននេះ