វៀតណាម ៖ ទីក្រុងហាណូយ កំពុងជួបប្រទះគ្រោះទឹកជំនន់ដ៏ធ្ងន់ធ្ងរបំផុត មិនធ្លាប់មានទេ ក្នុងប្រវត្តិសាស្ត្រជាង២០ឆ្នាំមកនេះ ដោយសារតែទឹកទន្លេក្រហម បានហក់ឡើងយ៉ាងលឿន ពេញប្រៀប និងហៀរហូរចូលផ្លូវ…
វៀតណាម ៖ ទីក្រុងហាណូយ កំពុងជួបប្រទះគ្រោះទឹកជំនន់ដ៏ធ្ងន់ធ្ងរបំផុត មិនធ្លាប់មានទេ ក្នុងប្រវត្តិសាស្ត្រជាង២០ឆ្នាំមកនេះ ដោយសារតែទឹកទន្លេក្រហម បានហក់ឡើងយ៉ាងលឿន ពេញប្រៀប និងហៀរហូរចូលផ្លូវ តម្រូវឲ្យប្រជាជនវៀតណាមនៅតំបន់មួយចំនួន នៃទីក្រុងហាណូយ ត្រូវជម្លៀសចេញ និងធ្វើឱ្យមនុស្សរាប់ពាន់នាក់ត្រូវជាប់គាំង ដោយពឹងផ្អែកលើជំនួយសង្គ្រោះបន្ទាន់ នេះបើយោងតាមសារព័ត៌មានវៀតណាម VN express ។
មជ្ឈមណ្ឌលគ្រប់គ្រងធនធានទឹក និងឧតុនិយមរបស់វៀតណាម បានរាយការណ៍ថា កម្ពស់ទឹកទន្លេក្រហម នៅទីក្រុងហាណូយ បានកើនឡើងដល់១០,៨៦ម៉ែត្រ នៅព្រឹកថ្ងៃពុធនេះ និង១១,១០ម៉ែត្រ នៅពេលថ្ងៃត្រង់ ។ កម្រិតនេះ បានឈានដល់ការបំបែកកំណត់ត្រាចាស់ តែ១១ម៉ែត្រប៉ុណ្ណោះ ក្នុងឆ្នាំ២០០៤ ។
កម្ពស់ទឹកទន្លេក្រហម បានកើនឡើងដល់ ១០,៥ម៉ែត្រ កាលពីយប់ថ្ងៃអង្គារ៍ ។ ទឹកទន្លេឡើងលឿនបែបនេះ អាជ្ញាធរទីក្រុងហាណូយ បានចេញការព្រមានភ្លាមៗ ផងដែរ ។ អ្នកស្រុកជាច្រើន បានប្រើធុងទឹកធ្វើជាក្បូនបណ្តោះអាសន្ន ដើម្បីដឹកជញ្ជូនរបស់របរចេញពីផ្ទះ និងអគារ ។
មន្ត្រីចូលនិវត្តន៍ម្នាក់ បាននិយាយថា នេះជាលើកទីមួយហើយ ចាប់តាំងពីឆ្នាំ១៩៩៦មក គាត់មិនបានឃើញទឹកជំនន់ដូច្នេះទេ ។ លោកបន្តថា “ទឹកជន់លិច បានហក់ឡើងយ៉ាងលឿន កើនឡើង៣០សង់ទីម៉ែត្រ ក្នុងរយៈពេលត្រឹមតែកន្លះម៉ោងប៉ុណ្ណោះ។ តែសំណាងល្អ ទឹកជំនន់ បានកើតឡើងនៅពេលថ្ងៃ ដូច្នេះមនុស្សអាចជម្លៀសចេញបានទាន់ពេលវេលា” ។
មជ្ឈមណ្ឌលគ្រប់គ្រងធនធានទឹក និងឧតុនិយម បានព្យាករណ៍ថា ផ្អែកតាមរូបភាពផ្កាយរណប និងទិន្នន័យរ៉ាដាអាកាសធាតុ បានបង្ហាញថា បន្ទាប់ពីព្យុះទីហ្វុង Yagi បណ្តាលឱ្យមានភ្លៀងធ្លាក់ខ្លាំងរួចមក នៅពេលនេះ មានពពកវិលកំពុងឆ្ពោះទៅទីក្រុងហាណូយ ។ ពពកមានខ្យល់បក់ខ្លាំងលើខេត្ត Bac Ninh និងខេត្ត Hung Yen ត្រូវបានគេរំពឹងថា វានឹងបន្តឆ្ពោះទៅទីក្រុងហាណូយ ក្នុងរយៈពេល ៣ម៉ោងខាងមុខ ។ ពពកទាំងនេះ នឹងនាំមកនូវទឹកភ្លៀង ផ្គរ និងរន្ទះ មកទីក្រុងហាណូយ ដែលអាចអមដោយព្យុះកំបុតត្បូង ផ្លេកបន្ទោរ ថែមទាំងខ្យល់បក់ខ្លាំង ។
សូមជម្រាបឡើងវិញថា ព្យុះទីហ្វុង Yagi បានបោកបក់ចូលដែនទឹក នៃប្រទេសវៀតណាម កាលពីថ្ងៃទី៣ ខែកញ្ញា ហើយរយៈពេល០២ថ្ងៃក្រោយមក ព្យុះនេះបានបក់បោកទៅជាព្យុះទីហ្វុងដ៏ខ្លាំងក្លាមួយ ជាមួយនឹងកម្លាំងខ្យល់បក់ខ្លាំងរហូតដល់ ២០១គីឡូម៉ែត្រ ក្នុងមួយម៉ោង។ វាបានធ្វើឲ្យមានការបាក់ដីនៅឆ្នេរភាគខាងជើង កាលពីថ្ងៃសៅរ៍ សប្តាហ៍មុន ដោយមានកម្លាំងខ្យល់ដល់ទៅ ១៤៩គីឡូម៉ែត្រ ក្នុងមួយម៉ោង។ Yagi វាជាព្យុះដ៏ខ្លាំងបំផុត នៅអាស៊ី នាឆ្នាំនេះ និងវាយប្រហារប្រទេសវៀតណាមខ្លាំងបំផុត មិនធ្លាប់មានទេ ក្នុងរយៈពេលជិតបីទសវត្សរ៍ មកនេះ ៕
ចែករំលែកព័តមាននេះ