- ភ្នំពេញ
តើមានជម្លោះជាមួយអ្នកជិតខាងណា ដែលធ្វើអោយអ្នកសប្បាយចិត្តទេ? មុនឆ្លើយសូមចំណាយពេល ៥ វិនាទី ដើម្បីគិតដ៏សមហេតុផល ។ ចម្លើយ១០០ភាគរយ គឺជម្លោះជាមួយអ្នកជិតខាង មិននាំមកនូវសេចក្តីសុខនោះទេ…
តើមានជម្លោះជាមួយអ្នកជិតខាងណា ដែលធ្វើអោយអ្នកសប្បាយចិត្តទេ? មុនឆ្លើយសូមចំណាយពេល ៥ វិនាទី ដើម្បីគិតដ៏សមហេតុផល ។ ចម្លើយ១០០ភាគរយ គឺជម្លោះជាមួយអ្នកជិតខាង មិននាំមកនូវសេចក្តីសុខនោះទេ ។
យើងមិនឈ្លោះមិនមែនមានន័យថា យើងអោយគេជាន់យើងរហូតទេ ។ យើងត្រូវតែរកដំណោះស្រាយដោយសន្តិភាព ហើយយើងមិនអោយបញ្ហាដុតយើងអោយមានអារម្មណ៍ខឹង ឬស្អប់ឡើយ ។ នៅពេលដែលដៃគូចរចាពីនាក់ ធ្វើការចរចាដោយចាត់ទុកគ្នាជាសត្រូវទៅហើយនោះ ឱកាសជោគជ័យនៃការចរចាគឺមានតិចតួច ប៉ុន្តែបើយើងចូលតុ ចចារដោយមិត្តភាព ឱកាសចរចាជោគជ័យនឹងកើនឡើង ដោយសារភាគីទាំងសងខាងបង្ហាញការយល់ចិត្តគ្នា បង្ហាញការចង់បានរៀងៗខ្លួនឆ្ពោះទៅរកដំណោះស្រាយរួម ។
ព្រះគ្រូ ជួន កក្កដា មានថេរដីកាថា «ក្តីក្រោធបំផ្លាញសេចក្តីសុខ ក្នុងចិត្តអ្នកដំបូងគេ» ។ ដូច្នេះពេលមានបញ្ហា សូមព្យាយាមកុំខឹង ហើយព្យាយាមរកដំណោះស្រាយបញ្ហានោះជាមួយអ្នកជិតខាងរបស់យើង ។ ឥឡូវយើងមើលអោយធំកម្រិតប្រទេសវិញ តើកម្ពុជាមានផលចំណេញទេ ពីជម្លោះជាមួយប្រទេសជិតខាង គឺវៀតណាម ថៃ និងឡាវ កន្លងមក ។ ប្រវត្តិសាស្ត្របង្ហាញថា វាមានតែការខាតបង់ប៉ុណ្ណោះពីជម្លោះ ។ ជាការពិតបញ្ហាជាច្រើន អាចកើតមានរវាងអ្នកជិតខាង ។ ប៉ុន្តែយើងមិនត្រូវយកបញ្ហាមកដុតអារម្មណ៍យើងអោយស្អប់ អោយខឹង នឹងអ្នកជិតខាងឡើយ ។ ការរក្សាទំនាក់ទំនងល្អ ជាមួយអ្នកជិតខាង គឺជាកត្តាដ៏សំខាន់ដែលយើងទាំងអស់គ្នាគួរតែយកចិត្តទុកដាក់ ហើយដាច់ខាតកុំមើលងាយ ឬមើលស្រាលដល់ទំនាក់ទំនងនេះ ហើយជះកំហឹង ឬស្អប់ ពីព្រោះទំនាស់នេះ រមែងអត់ចំណេញដល់យើងឡើយ ដូច្នេះយើងទាំងអស់គ្នា គួរតែរក្សាទំនាក់ទំនងល្អឲ្យបានគ្រប់កម្រិតមិត្តភក្តិ សហគមន៍ ជារហូតដល់ថ្នាក់ប្រទេសជាតិ ។
នៅក្នុងសង្គមរស់នៅប្រចាំថ្ងៃ នាពេលបច្ចុប្បន្នទំនាស់ បានកើតមានច្រើនរវាងអ្នកជិតខាង ដោយសារតែកត្តាលើសលួសមួយចំនួន តាំងពីបញ្ហាដ៏សាមញ្ញផ្សេងៗដូចជា សត្វចិញ្ចឹម ដាំដើមឈើ បញ្ហាសំឡេងរំខាន បញ្ហាក្មេងលេងជាជាមួយគ្នា បញ្ហាក្លិន បញ្ហាជម្រាបទឹក ពោល គឺមួយរយជំពូក ប៉ុន្តែប្រសិនបើយើងយកបញ្ហាទាំងនេះ មកសន្សំនៅក្នុងចិត្តវានឹងកើតទៅជាបញ្ហាគំនុំ និងសម្អប់នោះយើងនឹងអន្តរាយជាមិនខាន ។
មកដល់ពេលនេះ មានទឡ្ហីករណ៍ជាច្រើនដែលបានកើតមានឡើងនៅក្នុងសង្គមកម្ពុជាដែលទំនាស់អស់បុណ្យអស់ស័ក្តិអស់យស គឺដោយសារតែករណីទំនាស់នឹងអ្នកជិតខាងនេះឯង ។ ដូចជា ករណី លោក ស្រី ស៊ីណា ដែលកំពុងតែរស់នៅក្នុងពន្ធនាគារ ព្រោះតែដើមចមនៃទំនាស់អ្នកជិតខាង ។ អ្នកខ្លះទៀត គឺមើលមុខគ្នាមិនចំ ព្រោះតែជម្លោះនេះ ហើយត្រូវខាំមាត់រស់នៅទាំងមួហ្មង ឬរង្គាសនៅក្នុងចិត្ត ហើយអ្នកខ្លះទៀតសុខចិត្តរើផ្ទះរើសម្បែងដោយសារតែករណីនេះ ។
ជាទូទៅទំនាស់រវាងអ្នកជិតខាងនេះ វាកើតឡើងមកតូចតាចទេ ប៉ុន្តែចេះតែសន្សំនៅក្នុងចិត្តបន្តិចម្តងៗក៏កើតទៅជាគំនិត នៅក្នុងចិត្តរហូតដល់សម្រេចចិត្តខុសក៏មាន ។ កុំមោហៈទោសៈនឹងបញ្ហានេះនៅក្នុងនាមជាអ្នកជិតខាងនឹងគ្នា លើសខ្វះបន្តិចបន្តួច សូមអត់ឱន យោគយល់ ដោយឱនលំទោនញញឹមដាក់គ្នា ហើយប្រាប់គ្នាដោយត្រង់ៗ ។ មានអ្វីបន្តិចបន្តួច ដើម្បីជារឿងទំនាក់ទំនងល្អអាចហុចគ្នាទៅវិញទៅមក ញញឹមដាក់គ្នាអាចសួរអាចស្តី ឲ្យបានញឹកញាប់ ។ មនុស្សដែលមានទំនាក់ទំនងល្អ គឺរស់នឹងស្នាមញញឹមនេះឯង ។
សូមកុំភ្លេចថា ទំនាក់ទំនងវិជ្ជមាន រវាងអ្នកជិតខាងអាចនាំទៅរកការរីកចម្រើន និងវិបុលភាពទៅវិញទៅមក ហើយក៏អាចជារបង និងភ្នែកច្រមុះការពារគ្នាទៅវិញទៅមកផងដែរ ។ ចំណែកភាពច្របូកច្របល់ច្រើន តែបណ្តាលឱ្យមានជម្លោះ និងការបាត់បង់ ដែលមិនចាំបាច់។
ការរក្សាបាននូវទំនាក់ទំនងល្អ ជាមួយអ្នកជិតខាងជាមូលដ្ឋានគ្រឹះនៃទំនាក់ទំនងល្អនៅក្នុងសហគមន៍ និងការកសាងភាតរភាពនៅក្នុងសង្គម ។ ជារឿយៗ អ្នកជិតខាង គឺជាប្រភពនៃទីពុំនាក់ទីមួយ អំឡុងពេលមានអាសន្ន ឬគ្រោះអាសន្នណាមួយកើតមានឡើង ដោយចៃដន្យ ដែលអត់ព្រៀងទុក ឧទាហរណ៍ករណីឈឺថ្កាត់ពេលរាត្រី ករណីមានគ្រោះអគ្គិភ័យ ឬ ករណីចោរកម្ម ។ អ្នកជិតខាង គឺជារបងការពារ និងជាភ្នែកច្រមុះរបស់យើង ហើយអាចផ្តល់ជំនួយភ្លាមៗ ក្នុងគ្រាលំបាកទាំងនេះ ។
លើសពីនេះទៅទៀត អន្តរកម្ម និងទំនាក់ទំនងវិជ្ជមាន រវាងអ្នកជិតខាង អាចជា កត្តាបន្ថយភាពតានតឹង និងជម្លោះ ។ ការខ្វែងគំនិតគ្នាលើបញ្ហានានា គឺអាចដោះស្រាយដោយសន្តិវិធីដោយគ្មាន ជម្លោះដែលរំខានដល់ភាពសុខដុមរមនាក្នុងសហគមន៍ ។ នៅពេលដែលអ្នកជិតខាងប្រាស្រ័យទាក់ទងគ្នាដោយបើកចំហ និងគោរពជម្លោះបែបនេះអាចត្រូវបានបង្រួមជាអប្បបរមា ឬដោះស្រាយដោយមិត្តភាព និងស្នាមញញឹម ។ ការរួមរស់ជាមួយគ្នានៅក្នុងសហគមន៍ដោយស្នាមញញឹម មិនពាក់មុខយក្សដាក់គ្នា នេះរួមចំណែកដល់បរិយាកាសរស់នៅប្រកបដោយស្ថិរភាព និងរីករាយ ដោយគ្មានអរិភាពនឹងគ្នា ។
ឆ្លងចេញពីកម្រិតគ្រួសារនៅក្នុងសហគមន៍មកដល់កម្រិតជាតិក៏ដូចគ្នាដែរ ជម្លោះ ភាពស្អប់ ការចងគំនុំមិនមែនជាប្រភពនៃវិបុលភាព និងវឌ្ឍនភាពឡើយ ។ ចេញពីផ្ទះ និងផ្ទះ នៅក្នុងកម្រិតគ្រួសា រនិងគ្រួសារមកកាន់ទំនាក់ទំនងប្រទេសនឹងប្រទេស ក៏គួររិះគិតស្រដៀងគ្នានេះ ។
ទីតាំងភូមិសាស្ត្ររបស់កម្ពុជា វៀតណាម ឡាវ និងថៃ គឺមិនអាចប្តូរ ដូចជា កម្រិតគ្រួសារអាចប្តូរផ្ទះចុះឡើងបានឡើយ ដូច្នេះជម្រើស គឺមានតែត្រូវធ្វើយ៉ាងណាកសាងឲ្យបាននូវមូលដ្ឋានដែលឈានទៅរកភាតរភាព ពីព្រោះប្រទេសទាំង៤ ជាប្រជាជាតិដែលជិតខាងនឹងគ្នាដែលកំពុងចែករំលែកទំនាក់ទំនងប្រវត្តិសាស្ត្រ វប្បធម៌ និងសេដ្ឋកិច្ចនឹងគ្នារាប់ឆ្នាំមកហើយ។
ប្រទេសទាំង៤ គឺជាប្រទេសដែលមានទំនាក់ទំនងប្រវត្តិសាស្ត្រយ៉ាងស៊ីជម្រៅ និងបេតិកភណ្ឌវប្បធម៌ចែករំលែកគ្នាតាំងពីយូរលុង តែទោះជាយ៉ាងណាក៏យើងបានកំពុងតែប្រឈមមុខនឹងបញ្ហានានានឹងគ្នាជាបន្តបន្ទាប់ រាប់ចាប់ពីជម្លោះទឹកដី រហូតដល់ភាពខុសគ្នានៃមនោគមវិជ្ជានយោបាយ ប៉ុន្តែសូមកុំប្រកាន់យក គោលការណ៍ ឬក៏គោលគំនិតដែលដុតកំហឹងឫកសាងមូលដ្ឋាននៃការស្អប់គ្នាទៅវិញទៅមក ។ ផ្នត់គំនិតជាតិនិយមដែលបណ្តុះចេញពីភាព «ស្អប់ និងគំនុំមិនចំណេញ» ដូច្នេះយើងទាំងអស់គ្នាគួរតែរិះរក និងកសាងនូវមូលដ្ឋានណាដែលផ្តោតលើការលើកកម្ពស់ទំនាក់ទំនងល្អក្នុងនាមជាប្រទេសជិតខាងល្អដែលចាំបាច់បំផុតសម្រាប់ធានាបានស្ថិរភាពនៅក្នុងតំបន់។
ក្នុងន័យនេះ កម្ពុជា វៀតណាម ឡាវ និងថៃ ត្រូវគោរពគ្នាទៅវិញទៅមក មិនបំពានគ្នា ហើយមានភាពស្មោះត្រង់ជាមួយគ្នាក្នុងនាមជាអ្នកជិតខាងល្អ ។ វានឹងមិនគ្រប់គ្រាន់ទេ បើមានតែកម្ពុជាដែលចិញ្ចឹមចិត្តកសាងមិត្តភាព ខណ:ដែលប្រទេសជិតខាងកម្ពុជាមិនចូលរួមក្នុងការកសាងមិត្តភាពជាមួយគ្នានោះ។ ដូច្នេះ វៀតណាម ថៃ និង ឡាវក៏ត្រូវសំឡឹងមើលមកកម្ពុជាជាមិត្តស្មើភាពគ្នាផងដែរ ។
កិច្ចសហប្រតិបត្តិការល្អ នឹងមានប្រយោជន៍លើវិស័យពាណិជ្ជកម្ម ទេសចរណ៍ និងការអភិវឌ្ឍន៍ហេដ្ឋារចនាសម្ព័ន្ធដែលអាចនាំឱ្យមានកំណើនសេដ្ឋកិច្ច ដែលផ្តល់ផលប្រយោជន៍ដល់ភាគីពាក់ព័ន្ធទាំងអស់ ។ កិច្ចសហប្រតិបត្តិការល្អរវាងប្រជាជាតិ និងប្រជាជាតិ គឺបាននាំទៅដល់ការបើកចំហព្រំដែនបរទេស និងក្លាយទៅទីផ្សាររួម និងជួយគ្នាទៅវិញទៅមកដូចជាករណីឧក្រិដ្ឋកម្មឆ្លងដែន ករណីសុខភាព ករណីគ្រោះមហន្តរាយនៅពេលដែលមានបញ្ហា។
ប្រវត្តិសាស្ត្របានបង្ហាញម្តងហើយម្តងទៀត នូវផលវិបាកដ៏សាហាវនៃជម្លោះរវាងអ្នកជិតខាង ។ មិនថា នៅកម្រិតគ្រួសារ ឬជាតិ ។ ជម្លោះដែលបង្កឡើងដោយការស្អប់ ឬការយល់ខុសច្រើនតែនាំឱ្យមានការខាតបង់សម្រាប់គ្រប់ភាគី ហើយប្រទេសកម្ពុជា វៀតណាម ឡាវ និងថៃបានហែលឆ្លង និងជួបប្រទះរួចមកហើយ ។ ព្រឹត្តិការណ៍ទាំងនេះ គឺជាការរំលឹកយ៉ាងមុតមាំថា ជម្លោះមិនអាចនាំផ្លូវទៅរកដំណោះស្រាយពិតប្រាកដ ឬការរីកចម្រើនបានឡើយ ហើយច្រកចេញសំខាន់នៃផលប្រយោជន និងវិបុលភាពរបស់គ្រប់ភាគី គឺចេញមកពីការសន្ទនា ការយោគយល់ និងកិច្ចសហប្រតិបត្តិការនឹងគ្នានេះឯង ។
ការកសាងទំនាក់ទំនងបែបនេះ តម្រូវឱ្យមានការសន្ទនាគ្នាជាបន្តបន្ទាប់ ការយល់ចិត្ត និងការខិតខំប្រឹងប្រែង ដើម្បីដោះស្រាយជម្លោះដោយមិត្តភាព ។ នៅកម្រិតគ្រួសារនៅក្នុងនាមជាអ្នកជិតខាងល្អ គឺយើងគួរតែបង្ហាញស្មារតី និងទឹកចិត្តសេចក្ដីសប្បុរស ការអត់ឱន និងឆន្ទៈក្នុងការជួយ រីឯនៅថ្នាក់ជាតិហើយអាចធ្វើសកម្មភាពស្រដៀងគ្នាតាមការចរចារការទូត ការស្វះស្វែងរកកិច្ចព្រមព្រៀង ការផ្លាស់ប្តូរវប្បធម៌ និងការដាក់ចេញនូវគោលនយោបាយសហប្រតិបត្តិការផ្សេងៗ ។
សរុបសេចក្តីទៅការរក្សាទំនាក់ទំនងល្អជាមួយអ្នកជិតខាង មិនថា បុគ្គល ឬប្រជាជាតិ គឺជាការវិនិយោគសម្រាប់អនាគតដ៏សុខសាន្ត និងវិបុលភាព ៕
ចែករំលែកព័តមាននេះ