រាជធានីភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភា បានសំណូមពរឲ្យរដ្ឋាភិបាលកូរ៉េ ផ្តល់ឱកាសឲ្យកូនចៅពលរដ្ឋខ្មែរ ដែលមានគ្រួសារជាជនជាតិកូរ៉េបានរៀនភាសាខ្មែរ និងភាសាកូរ៉េ…
រាជធានីភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភា បានសំណូមពរឲ្យរដ្ឋាភិបាលកូរ៉េ ផ្តល់ឱកាសឲ្យកូនចៅពលរដ្ឋខ្មែរ ដែលមានគ្រួសារជាជនជាតិកូរ៉េបានរៀនភាសាខ្មែរ និងភាសាកូរ៉េ ផង ។
ការសំណូមពររបស់សម្តេចតេជោ បន្ទាប់ពីសម្តេចបានថ្លែងអំណរគុណចំពោះសាធារណរដ្ឋកូរ៉េផងដែរ ដែលបានផ្តល់ភាពអនុគ្រោះ និងសម្រួលដល់ពលករកម្ពុជា សម្រួលលក្ខខណ្ឌការងារ ដែលធ្វើឲ្យគេស្នាក់នៅបំពេញការងារ ហើយពេលត្រឡប់ទៅកម្ពុជាវិញ បាននាំយកទៅជាមួយ នូវបច្ចេកទេសទំនើបទៅបង្កើតការងារនៅកម្ពុជា រួមចំណែកដល់ការអភិវឌ្ឍសេដ្ឋកិច្ច នៅកម្ពុជាផងដែរ ។
ការសំណូមពរ នៅព្រឹកថ្ងៃទី១០ ខែកញ្ញា ឆ្នាំ២០២៤ នៅពេលសម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញជួបពិភាក្សាការងារជាមួយឯកឧត្តម អ៊ូ វ៉ន់ស៊ីក (Woo Won-Shik) ប្រធានរដ្ឋសភា នៃសាធារណរដ្ឋកូរ៉េ នៅវិមានរដ្ឋសភាសាធារណរដ្ឋកូរ៉េ ។
នៅក្នុងជំនួប សម្តេចតេជោ ហ៊ុន សែន ក៏បានលើកឡើងដែរថា ប្រទេសទាំងពីរសាធាណរដ្ឋកូរ៉េ និងកម្ពុជា ជាប្រទេសដន្លងនឹងគ្នា ដោយប្រជាជនកម្ពុជា ជាពិសេស គឺស្ត្រីកម្ពុជា បានរៀបការជាមួយជនជាតិកូរ៉េច្រើន ប្រមាណជា៨,០០០នាក់ ជីវិតកូនចៅរហូតដល់ទៅប្រមាណជា៧៥,០០០នាក់ ។
សម្ដេចបានសំណូមពរឲ្យរដ្ឋាភិបាលកូរ៉េ ផ្តល់ឱកាសឲ្យកូនចៅពលរដ្ឋទាំងអស់នោះ បានរៀនភាសាខ្មែរ និងភាសាកូរ៉េ ផងដែរ ដើម្បីមានលទ្ធភាពក្នុងការធ្វើទំនាក់ទំនងទៅវិញទៅមក ក៏ដូចជារួមចំណែកក្នុងការជួយដល់សេដ្ឋកិច្ចរបស់ប្រទេសកូរ៉េ ផងដែរ ។
ជាមួយគ្នានេះ សម្ដេចតេជោ ប្រធានព្រឹទ្ធសភា បានថ្លែងអំណរគុណផងដែរ ចំពោះសាធារណរដ្ឋកូរ៉េ ដែលបានជួយបណ្តុះបណ្តាលកីឡាករកម្ពុជា ក្នុងការចូលរួមប្រកួតជាមួយ កីឡាស៊ីហ្គេម នៅកម្ពុជា កាលពីឆ្នាំ២០២២ កន្លងមកនេះ ដែលក្នុងនោះក៏មានវត្តមានរបស់កីឡាករស្នុកឃី ដ៏ល្បីរបស់កូរ៉េ ជាជនជាតិខ្មែរ ផងដែរ ។
សម្ដេច ក៏បានថ្លែងអំណរគុណផងដែរ និងអបអរសាទរចំពោះការកើនឡើងក្នុងវិស័យសេដ្ឋកិច្ច ពាណិជ្ជកម្ម និងការវិនិយោគ ដែលធ្វើឲ្យទំហំពាណិជ្ជកម្មមានការកើនឡើង ហើយសូមថ្លែងអំណរគុណ និងសូមឲ្យរដ្ឋាភិបាលកូរ៉េ ជំរុញឲ្យអ្នកវិនិយោគទុនច្រើនថែមទៀត ទៅកម្ពុជា។ បច្ចុប្បន្ននេះ កម្ពុជាមិនគ្រាន់តែឈាន ដែលពីមុនជាអ្នកនាំចូល ឥឡូវនេះកម្ពុជា មានលទ្ធភាពក្នុងការផលិត ដើម្បីនាំចេញផងដែរ ។
សម្តេចតេជោ ហ៊ុន សែន ក៏បានរំឭកថា សម្តេច និងឯកឧត្តម មូន ជេអ៊ីន បានពិភាក្សាគ្នា និងជំរុញឲ្យមានកិច្ចព្រមព្រៀងពាណិជ្ជកម្មសេរី ហើយពេលនេះរាជរដ្ឋាភិបាលថ្មីរបស់កម្ពុជា និងរដ្ឋាភិបាលកូរ៉េ បានចុះកិច្ចព្រមព្រៀងលើកិច្ចព្រមព្រៀងពាណិជ្ជកម្មសេរីនេះ។ តាមរយៈកិច្ចព្រមព្រៀងបង្កើតតំបន់សេដ្ឋកិច្ចពិសេស គឺអាចនឹងចេញជារូបរាង ដែលបង្កលក្ខណៈឲ្យអ្នកវិនិយោគកូរ៉េ ទៅមកវិនិយោគនៅកម្ពុជា មានការកើនឡើងសម្រាប់ធ្វើការកែច្នៃ និងនាំចេញមកកូរ៉េវិញ ។
សម្តេចតេជោ ប្រធានព្រឹទ្ធសភា បានជម្រាបផងដែរថា រាជរដ្ឋាភិបាលអាណត្តិថ្មីរបស់សម្ដេចធិបតី ហ៊ុន ម៉ាណែត នឹងខិតខំការពារអ្នកវិនិយោគទុនកូរ៉េ និងខិតខំប្រឹងប្រែង ដើម្បីការពារធានា នូវសុខសន្តិភាពជារួមសម្រាប់អ្នកវិនិយោគពីបរទេសទាំងអស់ ។
សម្ដេចក៏បានថ្លែង នូវការអបអរសាទរ និងទន្ទឹងរង់ចាំការស្ថាបនាស្ពានមិត្តភាពកម្ពុជាកូរ៉េ ដែលនឹងឆ្លងទន្លេសាប និងទន្លេមេគង្គ ដែលអាចចេញជារូបរាងនៅពេលឆាប់ៗខាងមុខ។ ទន្ទឹមនេះ ក៏សូមថ្លែងអំណរគុណសាធារណរដ្ឋកូរ៉េ ដែលកំពុងបន្តជួយផ្លូវជាតិលេខ៤៨, លេខ២ និងលេខ២១ ។
សម្ដេចតេជោ បានថ្លែងអំណរគុណផងដែរ ចំពោះការយកចិត្តទុកដាក់របស់សាធារណរដ្ឋកូរ៉េ ក្នុងការលើកកម្ពស់កម្រិតកិច្ចប្រជុំមេគង្គជប៉ុនពីថ្នាក់រដ្ឋមន្ត្រីការបរទេស ទៅជាកិច្ចប្រជុំកំពូល។ ប៉ុន្ដែសម្ដេចបង្ហាញការសោកស្ដាយ ដែលកិច្ចប្រជុំនេះ មិនអាចប្រព្រឹត្តទៅបានដោយសារបញ្ហាមីយ៉ាន់ម៉ា ។
ទោះជាយ៉ាងនេះក៏ដោយ គម្រោងនានា ដែលពាក់ព័ន្ធកិច្ចសហប្រតិបត្តិការមេគង្គជប៉ុន ត្រូវបន្តជាធម្មតាមិនត្រូវឲ្យមានស្ទះរាំងដោយសារវិបត្តិនៅមីយ៉ាន់ម៉ានោះទេ។ សម្ដេចគូសបញ្ជាក់ថា គម្រោងមេគង្គជប៉ុននានា បានជួយទាក់ទងទៅដល់ការប្រយុទ្ធប្រឆាំងនឹងការប្រែប្រួលអាកាសធាតុ និងនិរន្តរភាពនៃការថែទាំប្រទេសនៅតាមដងទន្លេ ផ្នែកអេកូឡូស៊ីផងដែរ។ សម្ដេចក៏បានជម្រាបផងដែរ អំពីការលះបង់អំណាច ហើយរៀបចំឱ្យមានការផ្លាស់ប្តូរ មកអ្នកជំនាន់ក្រោយ ដើម្បីរក្សាសុខសន្តិភាព ស្ថិរភាពរយៈពេលវែង ។
ជាចុងក្រោយ សម្ដេចតេជោ ប្រធានព្រឹទ្ធសភា បានអញ្ជើញឯកឧត្តម អ៊ូ វ៉ន់ស៊ីក ប្រធានសភា នៃសាធារណរដ្ឋកូរ៉េ បំពេញទស្សនកិច្ចនៅកម្ពុជា តាមពេលវេលាសមស្របនៅពេលខាងមុខ ៕
ចែករំលែកព័តមាននេះ