បរទេស ៖ «បាល់ទាត់» គឺជាកីឡាដែលពេញនិយមបំផុតនៅលើពិភពលោក ដូច្នេះមិនមែនជារឿងចម្លែកនោះទេ ដែលកីឡាករបាល់ទាត់កំពូលៗមួយចំនួនរបស់ពិភពលោក ទទួលបានថ្លៃពលកម្មរាប់រយលានសម្រាប់ការបង្ហាញពីសមត្ថភាពដ៏អស្ចារ្យរបស់ពួកគេ នៅលើទីលានប្រកួត។ តួយ៉ាង ខ្សែប្រយុទ្ធព័រទុយហ្គាល់…
បរទេស ៖ «បាល់ទាត់» គឺជាកីឡាដែលពេញនិយមបំផុតនៅលើពិភពលោក ដូច្នេះមិនមែនជារឿងចម្លែកនោះទេ ដែលកីឡាករបាល់ទាត់កំពូលៗមួយចំនួនរបស់ពិភពលោក ទទួលបានថ្លៃពលកម្មរាប់រយលានសម្រាប់ការបង្ហាញពីសមត្ថភាពដ៏អស្ចារ្យរបស់ពួកគេ នៅលើទីលានប្រកួត។ តួយ៉ាង ខ្សែប្រយុទ្ធព័រទុយហ្គាល់ Cristiano Ronaldo បច្ចុប្បន្នគឺជាកីឡាករបាល់ទាត់មានថ្លៃពលកម្មខ្ពស់បំផុតលើពិភពលោក ដោយទទួលបាន ២០០លានអឺរ៉ូក្នុងមួយឆ្នាំពីក្លិប Al Nassr នៅលីគកំពូលអារ៉ាប៊ីសាអូឌីត។
ទោះជាយ៉ាងណាក៏ដោយ អ្នកមិនចាំបាច់រត់នៅលើទីលាន ដើម្បីរកប្រាក់ចំណូលដ៏ច្រើនសន្ធឹកសន្ធាប់បែបនេះទេ។ ជាក់ស្តែង នៅក្នុងនាមជាគ្រូបង្វឹកដែលប្រើប្រាស់ប្រាជ្ញា និងយុទ្ធសាស្ត្រ ដើម្បីទទួលខុសត្រូវផ្នែកដ៏សំខាន់របស់ក្រុមរបស់ខ្លួននោះ ក៏កំពុងតែទទួលបានប្រាក់បៀវត្សដ៏ច្រើនផងដែរ។ យោងតាមប្រភពពីគេហទំព័រ Celebrity Net Worth បានចេញផ្សាយបញ្ជីគ្រូបង្វឹកបាល់ទាត់មានទ្រព្យសម្បត្តិច្រើនជាងគេទាំង៨រូប នៅលើពិភពលោកប្រចាំឆ្នាំ ២០២៤ ដែលមានដូចខាងក្រោម ៖
Sir Alex Ferguson ទ្រព្យសម្បត្តិសរុប ៧០លានដុល្លារអាមេរិក
អតីតខ្សែប្រយុទ្ធឆ្នើមជនជាតិស្កុតឡែន លោក Alex Ferguson គឺជាគ្រូបង្វឹកបាល់ទាត់ដែលទទួលបានជោគជ័យបំផុតក្នុងប្រវត្តិសាស្ត្របាល់ទាត់ចក្រភពអង់គ្លេស ដោយបានឈ្នះជើងឯកពានរង្វាន់លីគកំពូលអង់គ្លេស Premier League ១៣សម័យកាល ជាមួយក្រុម Manchester United ។ បន្ទាប់ពីចូលនិវត្តន៍កាលពីឆ្នាំ ២០១៣ លោក Ferguson បានប្តូរការយកចិត្តទុកដាក់ខ្ពស់ទៅលើបាល់ទាត់ ដោយលោកបង្វែរចំណាប់អារម្មណ៍ទៅលើកីឡាប្រណាំងសេះ។
លោក Zinedine Zidane ទ្រព្យសម្បត្តិសរុប ១២០លានដុល្លារអាមេរិក
វីរបុរសបាល់ទាត់បារាំងឈ្នះពានរង្វាន់ World Cup ឆ្នាំ ១៩៩៨ វ័យ៥២ឆ្នាំរូបនេះ ជាប់ឈ្មោះជាកីឡាករឆ្នើមប្រចាំឆ្នាំរបស់សហព័ន្ធបាល់ទាត់ពិភពលោក FIFA ចំនួន៣ដង មុនព្យួរស្បែកជើងនៅក្នុងឆ្នាំ ២០០៦។ Zidane បានចាប់ផ្តើមអាជីពជាគ្រូបង្វឹកលើកដំបូងនៅក្នុងក្រុមឈុត B របស់ក្លិប Real Madrid កាលពីឆ្នាំ ២០១៤ មុនពេលក្លាយជាគ្រូបង្វឹកក្រុមឈុតធំ Real Madrid នៅ២ឆ្នាំក្រោយ ហើយបានដឹកនាំក្រុមរហស្សនាមស្តេចសមួយចំនួន២លើក អំឡុងឆ្នាំ ២០១៦ ដល់ ២០១៨ និងលើកទី២ អំឡុងឆ្នាំ ២០១៩ ដល់ ២០២១។ Zidane ដែលបច្ចុប្បន្នទំនេរមិនទាន់មានក្រុមដឹកនាំ ត្រូវបានរាយការណ៍ថា បង្កើនចំនួនទ្រព្យសម្បត្តិរបស់គាត់ តាមរយៈកិច្ចព្រមព្រៀងភាពជាដៃគូជាមួយក្រុមហ៊ុនធំៗដូចជា Adidas, Lego, Audi, Volvic និង Christian Dior ។
លោក Jose Mourinho ទ្រព្យសម្បត្តិសរុប ១២០លានដុល្លារអាមេរិក
ទទួលបានការតែងតាំងជាគ្រូបង្វឹកជនជាតិព័រទុយហ្គាល់ល្អបំផុតប្រចាំសតវត្ស កាលពីឆ្នាំ ២០១៥ ដោយសហព័ន្ធបាល់ទាត់ព័រទុយហ្គាល់ លោក Jose Mourinho មានភាពល្បីល្បាញដោយសារគាត់ជាគ្រូបង្វឹកសង្គ្រាមចិត្តសាស្ត្រទាំងលើទីលាន និងលើប្រព័ន្ធផ្សព្វផ្សាយ ដើម្បីបង្កើតរឿងរ៉ាវដ៏ចាប់អារម្មណ៍ជាច្រើន និងទម្រង់ដាក់សម្ពាធទៅលើគូប្រកួតរបស់ខ្លួន។
អតីតខ្សែបម្រើជនជាតិព័រទុយហ្គាល់ ដែលឈានដល់វ័យ៦១ឆ្នាំរូបនេះ បច្ចុប្បន្នកំពុងដឹកនាំក្រុម Fenerbahce នៅលីគកំពូលតួកគី គឺជាគ្របង្វឹកម្នាក់ក្នុងចំណោមគ្រូបង្វឹកតែ៦នាក់ប៉ុណ្ណោះ ដែលបានឈ្នះពានរង្វាន់អឺរ៉ុបជាមួយក្លិបពីរផ្សេងគ្នា ហើយក៏ជាគ្រូបង្វឹកតែម្នាក់គត់ ដែលបានឈ្នះពានរង្វាន់កំពូលទាំង៣របស់ UEFA រួមមាន Champions League, Europa League និង Conference League។
លោក Diego Simeone ទ្រព្យសម្បត្តិសរុប ១៣០លានដុល្លារអាមេរិក
អតីតខ្សែបម្រើជម្រើសជាតិអាហ្សង់ទីនវ័យ៥៤ឆ្នាំរូបនេះ បានចាប់ផ្តើមអាជីពជាគ្រូបង្វឹកនៅឆ្នាំ ២០០៦។ សព្វថ្ងៃនេះ លោកជាគ្រូបង្វឹកដែលបម្រើការបានយូរជាងគេនៅលីគកំពូលអេស្ប៉ាញ La Liga បន្ទាប់ពីចាប់ផ្តើមដឹកនាំ Atletico Madrid ក្នុងឆ្នាំ ២០១១។ កាលពីខែវិច្ឆិកា ឆ្នាំមុន លោកបានសម្រេចចុះហត្ថលេខាលើកិច្ចសន្យារយៈពេល៣ឆ្នាំបន្ថែមទៀតជាមួយក្លិបនេះ ដែលទទួលបានប្រាក់បៀវត្សត្រូវនាមប៉ាន់ស្មានថា ១៧.៦ លានដុល្លារក្នុងមួយឆ្នាំ។ នេះបើតាមរបាយការណ៍ពីកាសែត New York Times។
លោក Wayne Rooney ទ្រព្យសម្បត្តិសរុប ១៧០លានដុល្លារអាមេរិក
ឈរកំពូលតារាង ហើយជាពិសេសវ័យក្មេងជាងគេ គឺជាអតីតខ្សែប្រយុទ្ធឆ្នើមរបស់ក្រុមជម្រើសជាតិអង់គ្លេស និងបច្ចុប្បន្នជាគ្រូបង្វឹកអាជីព Wayne Rooney ដែលល្បីល្បាញខ្លាំងតាមរយៈការឈ្នះជើងឯកលីគកំពូលអង់គ្លេស Premier League ៥សម័យជាមួយនឹងក្លិប Manchester United។
Rooney បានប្រកាសចូលនិវត្តន៍ជាផ្លូវការក្នុងនាមជាកីឡាករក្នុងឆ្នាំ ២០២១ នៅពេលកំពុងលេងនៅក្នុងនាមជាកីឡាករផង និងអ្នកគ្រូបង្វឹកផងជាមួយក្រុម Derby County អំឡុង ២០២០ ដល់ឆ្នាំ ២០២២។ ក្រៅពីដឹកនាំក្រុម Derby អតីតខ្សែប្រយុទ្ធឆ្នើមក្រុម Everton, Man United, D.C. United និង Derby County វ័យ៣៨ឆ្នាំរូបនេះ បានបន្តដឹកនាំក្រុម D.C. United, Birmingham City និងបច្ចុប្បន្នកំពុងដឹកនាំក្រុម Plymouth Argyle ក្រោយចូលកាន់តំណែងកាលពីខែឧសភាកន្លងទៅ ដោយបានចុះកុងត្រារយៈពេល៣ឆ្នាំផងដែរ។
បើតាមប្រភពពីទីភ្នាក់ងារសារព័ត៌មាន AP បានឱ្យដឹងថា ប្រាក់ចំណូលដ៏សំខាន់របស់ Rooney ទទួលបានពីភាពជាដៃគូជាមួយក្រុមហ៊ុនដូចជា Nike, Ford, Nokia និង Coca Cola ដើម្បីប្រាក់ចំណូលដែលមានស្រាប់របស់ខ្លួន៕ (ប្រភព ៖ South China Morning Post)
ចែករំលែកព័តមាននេះ