រដ្ឋញូជើស៊ី៖ ថ្មីៗនេះ បុរស២នាក់មិនត្រឹមតែវ៉ៃគ្នារវាងតួអង្គ និងតួអង្គនៅក្នុងហ្គេមប៉ុណ្ណោះទេ គាត់ជិះយន្តតាមវ៉ៃដល់ផ្ទះរបស់បុរសម្នាក់ទៀត។ បុរសម្នាក់រស់នៅរដ្ឋញូជើស៊ី (New Jersey) បានជិះយន្តហោះទៅរដ្ឋផ្លរីដាដើម្បីវ៉ៃបុរសម្នាក់ទៀតដែលជាអ្នកលេងហ្គេមអនឡាញ។ អាជ្ញាធរអះអាងថាបុរសជាជនដៃដល់ម្នាក់នោះវាយបុរសជនរងគ្រោះនឹងញញួរ។…
រដ្ឋញូជើស៊ី៖ ថ្មីៗនេះ បុរស២នាក់មិនត្រឹមតែវ៉ៃគ្នារវាងតួអង្គ និងតួអង្គនៅក្នុងហ្គេមប៉ុណ្ណោះទេ គាត់ជិះយន្តតាមវ៉ៃដល់ផ្ទះរបស់បុរសម្នាក់ទៀត។ បុរសម្នាក់រស់នៅរដ្ឋញូជើស៊ី (New Jersey) បានជិះយន្តហោះទៅរដ្ឋផ្លរីដាដើម្បីវ៉ៃបុរសម្នាក់ទៀតដែលជាអ្នកលេងហ្គេមអនឡាញ។ អាជ្ញាធរអះអាងថាបុរសជាជនដៃដល់ម្នាក់នោះវាយបុរសជនរងគ្រោះនឹងញញួរ។
បុរសជាជនសង្ស័យឈ្មោះអេតវើត កាង (Edward Kang) អាយុ២០ឆ្នាំត្រូវបានរដ្ឋអាជ្ញានៅប្រទេសអាមេរិកចោទប្រកាន់២ករណី។ ទី១-ចោទពីបទប៉ុនប៉ងមនុស្សឃាតដោយមិនបានគិតទុកជាមុន និងទី២-ចោទពីបទរំលោភលើលំនៅដ្ឋានរបស់អ្នកដទៃដោយពាក់ម៉ាស់សម្រាប់បិទបាំងអត្តសញ្ញាណ។ នេះបើយោងតាមកំណត់ត្រារបស់តុលាការ។ ជនដៃដល់រូបនេះត្រូវសមត្ថកិច្ចចាប់ខ្លួនកាលពីព្រឹកថ្ងៃអាទិត្យ។
អាជ្ញាធរយល់ថានេះជាសំណុំរឿងចម្លែកដែលតុលាការកាន់សំណុំរឿងជាច្រើនហើយពុំដែលមានករណីបែបនេះទេពីមុនមក។ ស្ដាប់ទៅហាក់ដូចជាមិនសមទំនង ហើយមិនសមនឹងកើតមានទាល់តែសោះ។ ជនជាប់ចោទឈ្មោះកាងម្នាក់នេះ និងជនរងគ្រោះដែលជាបុរសវ័យក្មេងប្រហាក់ប្រហែលគ្នាពុំដែលជួបគ្នាពីមុនមកទេ។ ពួកគេលេងហ្គេមអនឡាញឈ្មោះ ArcheAge នៅលើសឺវើ (server) ជាមួយគ្នា។ ក្រុមហ៊ុនដែលបើកដំណើរការហ្គេមប្រភេទនេះធ្លាប់បានប្រកាសកាលពីខែមេសាថាខ្លួនត្រៀមបិទដំណើរការសឺវើនៅទ្វីបអឺរ៉ុប និងអាមេរិកខាងជើងនៅថ្ងៃទី២៧ ខែមិថុនាព្រោះមិនសូវមានអ្នកលេង។
ជនជាប់ចោទឈ្មោះកាងបានជិះយន្តហោះពីតំបន់ញូវ៉ាក(Newark)នៃរដ្ឋញូជើស៊ីឆ្ពោះទៅទីក្រុងចាក់សុនវីល (Jacksonville) រដ្ឋផ្លរីដាកាលពីថ្ងៃព្រហស្បតិ៍សប្ដាហ៍មុន។ កាលនោះ គាត់ប្រាប់ម្ដាយថាគាត់ត្រូវទៅលេងមិត្តសម្លាញ់ម្នាក់ដែលស្គាល់គ្នានៅពេលលេងហ្គេម។ សមត្ថកិច្ចមិនបានទម្លាយអាថ៌កំបាំងថាហេតុអ្វីបានជាជនជាប់ចោទស្គាល់កន្លែងរស់នៅរបស់ជនរងគ្រោះ។
នៅពេលទៅដល់រដ្ឋផ្លរីដា គាត់ជិះតាក់ស៊ីទៅស្នាក់នៅសណ្ឋាគារ១កន្លែងនៅឆ្នេរខ្សាច់ហ្វឺណាន់ឌីណា (Fernandina Beach) ស្ថិតនៅចម្ងាយ៥៦គីឡូម៉ែត្រពីទីក្រុងចាក់សុនវីល។ ក្រោយមក គាត់ឆ្លៀតទិញញញួរ១ដើមនៅកន្លែងលក់គ្រឿងដែកនៅម្ដុំៗនោះ។ ជនជាប់ចោទក៏ធ្វើដំណើរទៅផ្ទះរបស់ជនរងគ្រោះនៅម្ដុំឆ្នេរខ្សាច់។ នៅពេលទៅដល់ឃើញទ្វារផ្ទះមិនបានចាក់សោទេនៅម៉ោង២រំលងអធ្រាត្រថ្ងៃអាទិត្យ។ ពេលនោះមានការប្រទាំងប្រទើសគ្នារវាងជនជាប់ចោទ និងជនរងគ្រោះនៅពេលជនរងគ្រោះងើបពីគ្រែគេង។ ក្រោយមកជនជាប់ចោទឈ្មោះកាងយកញញួរវាយសំពងចំក្បាលរបស់ជនរងគ្រោះ។
អ្នកទាំង២នៅតែបន្តប្រតាយប្រតប់គ្នា។ ជនរងគ្រោះស្រែកហៅអ្នកដទៃឱ្យជួយ។ ក្រោយមក ឪពុកចុងរបស់ជនរងគ្រោះស្ដាប់ឮ។ គាត់ក៏ចេញធ្វើអន្តរាគមន៍ និងជួយចាប់ក្រៀកជនជាប់ចោទឈ្មោះកាងនេះជាប់រហូតដល់សមត្ថកិច្ចមកដល់។ គ្រូពេទ្យពិនិត្យឃើញថាជនរងគ្រោះត្រូវក្បាលនឹងញញួរជាច្រើនកន្លែង។ គ្រាន់តែថាមិនធ្ងន់ធ្ងរដល់ស្លាប់ទេ។ នេះបើតាមការបញ្ជាក់របស់អាជ្ញាធរ។
នៅពេលកំពុងជាប់ឃុំ, ឈ្មោះកាងប្រាប់អ្នកស៊ើបអង្កេតថាជនរងគ្រោះជាមនុស្សអាក្រក់ណាស់លេងហ្គេមខូច។ គាត់បានសាកសួរអាជ្ញាធរថាតើត្រូវជាប់ពន្ធនាគាររយៈពេលប៉ុន្មានចំពោះអ្នកចូលផ្ទះរបស់គេដោយគ្មានការអនុញ្ញាត និងវាយតប់ទៅលើអ្នកដទៃ។ អាជ្ញាធរឆ្លើយតបថាគាត់អាចនឹងជាប់ពន្ធនាគារច្រើនឆ្នាំទម្រាំមានឱកាសលេងហ្គេមសាជាថ្មី។ តុលាការមិនទាន់តែងតាំងមេធាវីដើម្បីការពារក្ដីឱ្យជនជាប់ចោទនៅឡើយទេ។ នៅពេលជាប់ឃុំ គាត់មិនត្រូវគេវាយខ្នោងដៃទេ៕
ចែករំលែកព័តមាននេះ