អាជ្ញាធរមីនបានរាយការណ៍ថា សំណល់យុទ្ធភ័ណ្ឌកាលសង្គ្រាមបំផ្លាញអនាគតគ្រួសារបុរសម្នាក់ទៀតហើយកាលពីថ្ងៃទី ០៩ ខែ មិថុនា ឆ្នាំ២០២៤ នៅវេលាម៉ោងប្រមាណជា ៩ និង ៧នាទីព្រឹក ។
ប្រភពដដែលបានឲ្យដឹងថា ជនរងគ្រោះ ឈ្មោះ ស៊ុំ សុខ ប៊ន អាយុ ៣៧ឆ្នាំ មុខរបរកសិករ បានចូលទៅបាញ់ថ្នាំស្មៅនៅចំណុចអូរកងឈ្លប ភូមិសង្គមថ្មី ឃុំថ្មដារ ស្រុកវាលវែង ខេត្តពោធិ៍សាត់ ក៏ចៃដន្យជាន់មីនបណ្តាលឱ្យផ្ទុះរងបួសដាច់ជើងស្តាំ និងរបួសផ្ទៃមុខ។
បច្ចុប្បន្ន ជនរងគ្រោះត្រូវបានបញ្ចូនមកសង្គ្រោះនៅមណ្ឌលសុខភាពថ្មដា និង ត្រៀមបញ្ជូនមកមន្ទីរពេទ្យបង្អែកខេត្ត។
អាជ្ញាធរមីន បានអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល។
ក្នុងរយៈពេល ៥ខែ នៃឆ្នាំ២០២៤ កម្ពុជាមានជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ចំនូន៣០ នាក់ ។ អត្រាគ្រោះថ្នាក់នេះ កើនឡើង ៥៨% ប្រៀបធៀបនឹងរយៈពេលដូចគ្នាក្នុង២០២៣ ដែលមានជនរងគ្រោះចំនួន១៩នាក់ ហើយករណីនេះបណ្តាលមកពីសកម្មភាពនៃការលេងគ្រាប់ ៦៤% ការរកស្បៀងអាហារ ១៣% ការសម្អាតដីធ្វើកសិកម្ម ១០% ការធ្វើសំណង់ ១០% និងការដុតភ្លើង ៣%។
ចាប់ពីឆ្នាំ១៩៧៩ ដល់ខែឧសភា ឆ្នាំ២០២៤ មានជនរងគ្រោះដោយសារមីន និងសំណល់ជាតិផ្ទុះពីសង្គ្រាមសរុបចំនួន ៦៥.០៦៧ នាក់ ក្នុងនោះរងគ្រោះដោយសារមីន ៧៩% និងសំណល់ជាតិផ្ទុះពីសង្គ្រាម ២១% ៕
ចែករំលែកព័តមាននេះ