យោងតាមការសិក្សាមួយដែលចេញផ្សាយកាលពីពេលថ្មីៗនេះឱ្យដឹងថា ប្រជាជនហ្វ៊ីលីពីនភាគច្រើនប្រើប្រាស់ទូរស័ព្ទមិនគ្រាន់តែដើម្បីទាក់ទងប៉ុណ្ណោះទេ តែថែមទាំងប្រើជាកុំព្យូទ័រចល័តថែមទៀតផង ។NTS ដែលជាក្រុមហ៊ុនស្រាវជ្រាវតម្រូវការអតិថិជនលើពិភពលោកបាននិយាយនៅក្នុងរបាយការណ៍របស់ខ្លួនថា អ្នកប្រើប្រាស់ហ្វ៊ីលីពីនមិនគ្រាន់តែប្រើទូរស័ព្ទចល័តសម្រាប់ទាក់ទង និងផ្ញើសារប៉ុណ្ណោះទេ តែថែមទាំងប្រើជាមធ្យោបាយភ្ជាប់អុីនធើរណេតដែលអាចឱ្យអ្នកប្រើប្រាស់អនឡាញបានគ្រប់ពេល ។
យោងតាមការសិក្សាស្រាវជ្រាវដែលធ្វើឡើងកាលពីខែវិច្ឆិកា ឆ្នាំ២០១២ ដល់ខែមករា ឆ្នាំ២០១៣ បានបង្ហាញថា ក្នុងចំណោមអ្នកឆ្លើយតប៣៨.០០០នាក់នៅទីក្រុងម៉ានីលបានឱ្យដឹងថា ៧៥%នៃអ្នកឆ្លើយតបដែលបានធ្វើការអង្កេតបានប្រើប្រាស់ទូរស័ព្ទចល័តដើម្បីថតរូប និងវីដេអូ ៤៥%ប្រើដើម្បីឆែកអុីនធើរណេត ៤៤%ភ្ជាប់បណ្តាញសង្គម និង៣៧%ឆែកអីុម៉ែល ។នាយកគ្រប់គ្រងក្រុមហ៊ុន NTS លោក Gary de Ocampo និយាយថា ផ្អែកលើការរកឃើញនៃការសិក្សានោះ កំណើនសកម្មភាពចល័តគ្រប់រូបភាពនេះបង្ហាញពីនិន្នាការចេះតែកើនឡើងនៃការប្រើប្រាស់ Wi-Fi តាមទីសាធារណៈ ។
នៅក្នុងឆ្នាំ២០១៣ នេះអ្នកឆ្លើយតបប្រហែល៣៥% នៅក្នុងទីក្រុងម៉ានីលភ្ជាប់អុីនធើរណេតតាម Wi-Fi នៅតាមទីសាធារណៈ។
ការសិក្សានោះក៏បានបង្ហាញដែរថា អ្នកប្រើប្រាស់ជនជាតិហ្វ៊ីលីពីនទាំងនោះបានផ្លាស់ប្តូរអាទិភាពក្នុងការទិញរបស់ពួកគេពីការទិញទូរស័ព្ទដែលផ្អែកលើលក្ខណៈរូបីទៅជ្រើសរើសទូរស័ព្ទដែលនឹងធ្វើឱ្យបទពិសោធន៍ផ្ទាល់ខ្លួនកាន់តែប្រសើរឡើង ។ការប្រើប្រាស់ទូរស័ព្ទស្មាតហ្វូននៅក្នុងប្រទេសហ្វ៊ីលីពីនមានចំនួន៥៣% ធៀបនឹងការប្រើប្រាស់ទូរស័ព្ទចល័តសរុបចំនួន៨៩% ។
ការលក់ទូរស័ព្ទស្មាតហ្វូននៅក្នុងទីផ្សារប្រទេសហ្វ៊ីលីពីនកើនឡើងគួរឱ្យកត់សម្គាល់ ដោយសារតម្លៃទូរស័ព្ទបានធ្លាក់ចុះ ។ ក្រុមហ៊ុន NTS និយាយថា ប្រជាជនហ្វ៊ីលីពីនភាគច្រើនដែលរស់នៅទីក្រុងម៉ានីល មានទូរស័ព្ទស្មាតហ្មូនប្រើស្ទើរគ្រប់ដៃ ហើយអ្នកខ្លះមានលើសពីមួយគ្រឿងឡើងទៅ ៕
ចែករំលែកព័តមាននេះ