កម្មកររោងចក្រ ហុង វ័ន ជិត១ពាន់នាក់ ធ្វើកូដកម្ម ក្រោយថៅកែកាត់លុយជំនាញ ៤ដុល្លារ ធ្លាប់ទទួលបាន ១៥ឆ្នាំមកហើយ
រាជធានីភ្នំពេញ ៖ កម្មករ កម្មការិនី រោងចក្រកាត់ដេរសម្លៀកបំពាក់ ហុង វ័ន ខេមបូឌា ហ្កាមេន ជិត១ពាន់នាក់…
រាជធានីភ្នំពេញ ៖ កម្មករ កម្មការិនី រោងចក្រកាត់ដេរសម្លៀកបំពាក់ ហុង វ័ន ខេមបូឌា ហ្កាមេន ជិត១ពាន់នាក់ បានខកខាន មិនបានធ្វើការងាររយៈពេលច្រើនថ្ងៃមកហើយ ដោយពួកគាត់បានប្រមូលផ្ដុំគ្នា ធ្វើកូដកម្ម ក្រោយពេលថៅកែកាត់ប្រាក់ជំនាញក្នុងម្នាក់ៗ ចំនួន ៤ដុល្លារ។ ដែលប្រាក់ជំនាញនេះ ពួកគាត់ទទួលបានរយៈពេល១៥ឆ្នាំកន្លងមកហើយ ស្រាប់តែនៅ១ខែចុងក្រោយនេះ ថៅកែ បានកាត់ផ្ដាច់ចោលអស់ ហើយបើកតែប្រាក់ខែតាមចំនួនកំណត់របស់ក្រសួងការងារ ឲ្យដល់ពួកគាត់ប៉ុណ្ណោះ ទើបពួកគាត់មិនព្រម រួចនាំគ្នាធ្វើកូកម្ម ដើម្បីទាមទារឲ្យថៅកែរោងចក្រផ្ដល់ប្រាក់ជំនាញនោះមកវិញ និងរក្សាឲ្យនៅដដែលជារៀងរហូត ។
កូដកម្មនេះ បានចាប់ផ្ដើមផ្ទុះកាលពីថ្ងៃទី២៤ ខែកុម្ភៈ ឆ្នាំ២០២៤ ហើយរហូតមកដល់វេលាព្រឹកថ្ងៃទី២៩ ខែកុម្ភៈ កម្មករ កម្មការិនីទាំងនោះ ពុំទាន់ចូលធ្វើការនៅឡើយ។ កម្មករបានបន្ត ប្រមូលផ្ដុំគ្នានៅមុខរោងចក្រ និងបានទាមទារ នូវលក្ខខណ្ឌការងារថ្មីៗមួយចំនួនថែមទៀតផង។ រោងចក្រខាងលើ មានទីតាំងស្ថិតនៅតាមបណ្ដោយមហាវិថីចោមចៅ ហៅផ្លូវវ៉េងស្រេង ក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
កម្មករខាងលើ បាននិយាយថា នៅក្នុងរោងចក្រកាត់ដេរសម្លៀកបំពាក់ ហុង វ័ន ខេមបូឌា ហ្កាមេន នេះមានកម្មករ កម្មការិនី បម្រើការងារចំនួន ៩៤៨នាក់ ហើយបាននាំគ្នាធ្វើកូដកម្មទាំងអស់គ្នាតែម្ដង។ ដើម្បីទាមទារសុំឲ្យថៅកែ ផ្ដល់ប្រាក់ជំនាញ ៤ដុល្លាររបស់កម្មករម្នាក់ៗ ដែលត្រូវបានថៅកែផ្ដាច់ចោលនោះមកវិញ ហើយក៏ទាមទារកុំឲ្យថៅកែកាត់ប្រាក់ឈ្នួល ក្នុងពេល ដែលពួកគាត់ធ្វើកូដកម្មកប៉ុន្មានថ្ងៃមកនេះ ព្រមទាំងសុំឲ្យថៅកែទូទាក់ប្រាក់ប្រាក់អតីតភាពការងារ ។
ក្រុមកម្មករខាងលើ បានរៀបរាប់ប្រាប់ទៀតថា ពួកគាត់មិនស្នើសុំឲ្យថៅកែ ដំឡើងប្រាក់ឈ្នួលឲ្យនោះឡើយ គឺទាមទារយកតែប្រាក់របស់ខ្លួន ដែលត្រូវថៅកែកាត់នោះមកវិញតែប៉ុណ្ណោះ។ រីឯប្រាក់ជំនាញ ៤ដុល្លារនោះ ពួកគាត់ទាំងអស់ទទួលបានរយៈពេល១៥ឆ្នាំកន្លងមកហើយ ប៉ុន្តែនៅរយៈពេល១ខែចុងក្រោយនេះ ស្រាប់តែថៅកែ កាត់ផ្ដាច់ មិនព្រមបើកឲ្យតទៅទៀត ជាហេតុធ្វើឲ្យកម្មករខាតបង់អត្ថប្រយោជន៍។ ទើបប្រមូលផ្ដុំគ្នាធ្វើការតវ៉ាបែបនេះតែម្ដង ពួកគាត់បានចាប់ផ្ដើមធ្វើការតវ៉ា នៅថ្ងៃទី២៤ ខែកុម្ភៈ ឆ្នាំ២០២៤ ដោយសារតែថៅកែមិនព្រមបើកប្រាក់ខាងលើនោះឲ្យ ហើយពួកគាត់ក៏អត់ចូលធ្វើការរហូតមកដល់ថ្ងៃទី២៩ ខែកុម្ភៈ។
ដោយឡែក អាជ្ញាធរខណ្ឌពោធិ៍សែនជ័យ បានប្រាប់ឲ្យដឹងថា រយៈពេលដែលកម្មករធ្វើការតវ៉ាប៉ុន្មានថ្ងៃកន្លងមកនេះ ក្រុមការងាខណ្ឌពោធិ៍សែនជ័យ រួមជាមួយក្រសួងការងារ និងបណ្ដុះបណ្ដាលវិជ្ជាជីវៈ (ក្រុមការងារដោះស្រាយបាតុកម្ម និងកូដកម្មរបស់ក្រសួង) បានចុះធ្វើការសម្របសម្រួលការតវ៉ារបស់កម្មករនៅរោងចក្រខាងលើ ។
ជាលទ្ធផល ៖ ១. ថៅកែរោងចក្របានឯកភាពយលព្រមផ្ដល់ប្រាក់ជំនាញ ចំនួន៤$ ដែលបានកាត់ផ្ដាច់នោះជូនកម្មករវិញ ហើយកម្មករបានសន្យា និងចូលធ្វើការវិញជាធម្មតា ថ្ងៃទី២៩ ខែកុម្ភៈ ។
២. ប៉ុន្តែដល់ថ្ងៃសន្យាកម្មករ នៅតែមិនព្រមចូលធ្វើការវិញ ហើយបានបន្តការតវ៉ាទៀត ហើយបានទាមទារឲ្យភាគីរោងចក្រ កុំកាត់ប្រាក់ឈ្នួលនៅក្នុងអំឡុងពេលដែលពួកគាត់ធ្វើកូដកម្ម រយៈពេល៥ថ្ងៃ ។
៣. មកដល់នៅថ្ងៃទី២៩ ខែកុម្ភៈ ឆ្នាំ២០២៤នេះ កម្មករ ទាមទារនូវលក្ខខណ្ឌការងារថ្មីមួយទៀត គឺឲ្យភាគីរោងចក្រធ្វើការទូទាត់ប្រាក់អតីតភាពការងារ ដែលពួកគាត់ធ្វើការរយៈពេលច្រើនឆ្នាំមកនេះ ឲ្យបានរួចរាល់ ទើបព្រមចូលធ្វើការងារវិញ ដូច្នេះដំណោះស្រាយមិនអាច និងបញ្ចប់បានឡើយ ៕
ចែករំលែកព័តមាននេះ