រាជធានីភ្នំពេញ ៖ ដោយពិនិត្យឃើញថា បច្ចុប្បន្នមានកំហុសឆ្គងច្រើនក្នុងការសរសេរអក្ខរាវិរុទ្ធភាសាខ្មែរ និងដើម្បីកែទម្លាប់ ព្រមទាំងលើកស្ទួយអក្សរសាស្ត្រខ្មែរ វប្បធម៌ខ្មែរ ក្រុមអ្នកស្រឡាញ់អក្សរសាស្ត្រខ្មែរ មួយក្រុមបាននិងកំពុងរៀបចំកម្មវិធីប្រកួតសរសេរតាមអានជាសាធារណៈមួយដែលមានឈ្មោះថា «សំណេរអង្គរ»…
រាជធានីភ្នំពេញ ៖ ដោយពិនិត្យឃើញថា បច្ចុប្បន្នមានកំហុសឆ្គងច្រើនក្នុងការសរសេរអក្ខរាវិរុទ្ធភាសាខ្មែរ និងដើម្បីកែទម្លាប់ ព្រមទាំងលើកស្ទួយអក្សរសាស្ត្រខ្មែរ វប្បធម៌ខ្មែរ ក្រុមអ្នកស្រឡាញ់អក្សរសាស្ត្រខ្មែរ មួយក្រុមបាននិងកំពុងរៀបចំកម្មវិធីប្រកួតសរសេរតាមអានជាសាធារណៈមួយដែលមានឈ្មោះថា «សំណេរអង្គរ» ហើយដែលនឹងប្រារព្វធ្វើឡើងនាពេលដ៏ខ្លីខាងមុខនេះ នៅអតីតរាជធានីអង្គរ ក្នុងខេត្តសៀមរាប ក្រោមការជួយសម្របសម្រួលធ្វើឱ្យគម្រោងនេះលេចចេញជារូបរាងឡើងដោយសារព័ត៌មានថ្មីៗ ។
«សំណេរអង្គរ» គឺជាកម្មវិធីមួយដែលបង្កើតឡើងដើម្បីលើកកម្ពស់អក្សរសាស្ត្រខ្មែរ តាមរយៈការសរសេរតាមអាន ។ កម្មវិធីនេះអាចនឹងក្លាយទៅជាទិវាសរសេរតាមអានជារៀងរាល់ឆ្នាំនាពេលអនាគត ដោយផ្តោតលើប្រធានបទស្តីពីរមណីយដ្ឋានអង្គរ ។ ដោយពិនិត្យឃើញកម្រិតអក្សរសាស្ត្រខ្មែរ ទាំងវេយ្យាករណ៍ ទាំងអក្ខរាវិរុទ្ធ ហាក់បីដូចជាមានការធ្លាក់ចុះគួរឱ្យព្រួយបារម្ភក្នុងចំណោមមហាជន សិស្ស និងនិស្សិតនោះ កម្មវិធី «សំណេរអង្គរ» តាមរយៈការសរសេរតាមអានក៏ត្រូវបង្កើតឡើង ។ ថ្វីត្បិតជាលំហាត់ខួរក្បាលបែបបុរាណបន្តិចមែន ប៉ុន្តែកិច្ចការនេះមានប្រយោជន៍មិនអាចកាត់ថ្លៃបានសម្រាប់កែលម្អសំណេរឱ្យកាន់តែប្រសើរ ជាពិសេសនៅក្នុងយុគ្គសម័យឌីជីថល ។
នៅថ្ងៃទី ២២ ខែធ្នូ ឆ្នាំ ២០២៣ នេះ ក្រុមអ្នកស្រឡាញ់អក្សរសាស្ត្រខ្មែរ និងជាក្រុមអ្នកផ្តួចផ្តើមគំនិតនៅក្នុងកម្មវិធីនេះ លោក លីម ប៊ុនហុក បានឱ្យដឹងថា ការរៀបចំកម្មវិធី «សំណេរអង្គរ» នឹងធ្វើនៅបរិវេណស្ពានហាល ខាងលិចអង្គរវត្ត នៅថ្ងៃអាទិត្យ ទី ២១ ខែមករា ឆ្នាំ ២០២៤ ខាងមុខនេះ ចាប់ពីម៉ោង ៧ ព្រឹក តទៅ ។ លោកថា អ្នកស្រឡាញ់ភាសាខ្មែរ អ្នកចង់លើស្ទួយភាសាខ្មែរ អ្នកពូកែភាសាខ្មែរ សុទ្ធតែអាចចូលរួមប្រកួតបានទាំងអស់ ដោយមិនកំណត់អាយុឡើយ ក្នុងនោះមានទាំងសិស្ស-និស្សិត ហើយសូម្បីតែជនបរទេសដែលចេះភាសាខ្មែរក៏អាចចូលរួមប្រកួតក្នុងកម្មវិធីនេះបានផងដែរ ។
លោក លីម ប៊ុនហុក ឱ្យដឹងទៀតថា គោលបំណងសំខាន់បំផុតនោះ គឺចង់បំផុសចលនាមហាជនទូទាំងប្រទេសឱ្យស្រឡាញ់អក្សរសាស្ត្រខ្មែរ ចូលរួមជាមួយគ្នាដើម្បីអភិរក្ស ធ្វើយ៉ាងណាសរសេរកុំឱ្យខុស ។ លោកថា នេះជាលើកទី ១ នៃការសរសេរតាមអានថ្នាក់ជាតិ ដោយសារយើងទើបងើបពីជំងឺកូវីដ-១៩ អ៉ីចឹងហើយយើងចង់ស្តាវិស័យទេសចរណ៍ជាតិផង និងចង់រំលេចអំពីសារៈសំខាន់នៃអក្សរសាស្ត្រខ្មែរផងនោះ ទើបនេះជាចលនាមួយបំផុសឱ្យប្រជាពលរដ្ឋយើងគ្រប់វ័យយល់ និងស្រឡាញ់អក្សរសាស្ត្រខ្មែរ ។ ហើយលើកទី ១ នេះដែរ គឺជានិមិត្តរូបសម្រាប់ការប្រកួតដែលឆ្នាំក្រោយទៀតអាចនឹងធ្វើនៅរាជធានីភ្នំពេញ និងឆ្នាំបន្តបន្ទាប់ទៀតយើងអាចរើសតាមខេត្តផ្សេងៗ ដើម្បីឱ្យចលនានេះអាចរុញទៅដល់ខេត្តទាំងអស់នៅក្នុងព្រះរាជាណាចក្រកម្ពុជា តែម្តង ។ លោកបានអះអាងថា កម្មវិធី «សំណេរអង្គរ» នេះទទួលបានការគាំទ្រយ៉ាងពេញទំហឹងពីរដ្ឋមន្ត្រីក្រសួងអប់រំ យុវជន និងកីឡា, រដ្ឋមន្ត្រីក្រសួងវប្បធម៌ និងវិចិត្រសិល្បៈ ហើយដែលលោកជំទាវ ភឿង សកុណា នឹងជាអ្នកអានសំណេរតាមអានដោយផ្ទាល់ និងក៏មានការគាំទ្រពីរដ្ខមន្ត្រីក្រសួងទេសចរណ៍ ផងដែរ ។
ទោះជាយ៉ាងណាក៏ដោយលោក លីម ប៊ុនហុក បញ្ជាក់ថា ការរៀបចំកម្មវិធី «សំណេរអង្គរ» នេះពិតជាមានការលំបាកផងដែរទាក់ទងទៅនឹងថវិកាសម្រាប់រៀបចំ ដោយលោកបានអំពាវនាវដល់ សប្បុរសជននានាជួយឧបត្ថម្ភទៅតាមលទ្ធភាពទោះជាតិចក្តី ច្រើនក្តី ដើម្បីបុព្វហេតុអក្សរសាស្ត្រខ្មែរ ។
សូមបញ្ជាក់ថា កម្មវិធីនេះកំណត់ចំនួនអ្នកចូលរួមត្រឹមតែ ១០០០ នាក់ប៉ុណ្ណោះ ហើយរហូតមកដល់ពេលនេះមានអ្នកចុះឈ្មោះចូលរួមជិត ៥០០ នាក់រួចមកហើយ ។ ហើយការចុះឈ្មោះចុងក្រោយត្រឹមថ្ងៃទី ៧ ខែមករា ២០២៣ ។ បងប្អូនគ្រប់វ័យ ក៏ដូចជា សិស្ស-និស្សិត ដែលស្រឡាញ់ និងចង់លើស្ទួយអក្សរសាស្ត្រខ្មែរ អាចចុះឈ្មោះចូលរួមប្រកួតតាមវិធីងាយៗបំផុត តាមរយៈ Telegram ដែលមានលេខទូរស័ព្ទ ៖ ០៩២ ៣៣៧ ៦២៦ ។
ចំពោះរង្វាន់សម្រាប់ជ័យលាភីលេខ ១ ទទួលបានការស្នាក់នៅក្នុងសណ្ឋាគារផ្កាយ ៥ ចំនួន ១ បន្ទប់ គ្រែ ២ សម្រាប់ ៣ យប់ នៅសៀមរាប ជាមួយប្រាក់រង្វាន់ ១ លាន ២ សែនរៀល ។ ជ័យលាភីលេខ ២ ទទួលបានការស្នាក់នៅក្នុងសណ្ឋាគារផ្កាយ ៤ ចំនួន ១ បន្ទប់ គ្រែ ២ សម្រាប់ ៣ យប់ នៅសៀមរាប ជាមួយប្រាក់រង្វាន់ ៨០ ម៉ឺនរៀល ។ និងជ័យលាភីលេខ ៣ ទទួលបានការស្នាក់នៅក្នុងសណ្ឋាគារផ្កាយ ៣ ចំនួន ១ បន្ទប់ គ្រែ ២ សម្រាប់ ៣ យប់ នៅសៀមរាប ជាមួយប្រាក់រង្វាន់ ៤០ ម៉ឺនរៀល ។ ក្រៅពីនេះមានរង្វាន់លួងចិត្តច្រើនទៀត ៕
ចែករំលែកព័តមាននេះ