លោកឧត្តមសេនីយ៍ត្រី នូវ ដារ៉ា ស្នងការរងទទួលផែនប្រឆាំងបទល្មើសសេដ្ឋកិច្ចដល់អាយុត្រូវចូលនិវត្តន៍ហើយ ប៉ុន្តែនៅបន្តការងារធម្មតា ខណៈមន្ត្រីនគរបាលមួយចំនួនទៀតរាប់ចាប់ពីលោកឧត្តមសេនីយ៍ទោ ងួន គឿន, លោកឧត្តមសេនីយ៍ទោ យិន ចំណាន (អតីតស្នងការនគរបាលខេត្តរតនគិរី), លោកឧត្តមសេនីយ៍ត្រី ជា ប៊ុនធឿន (អតីត
ខេត្តរតនគិរី ៖ លោកឧត្តមសេនីយ៍ត្រី នូវ ដារ៉ា ស្នងការរងទទួលផែនប្រឆាំងបទល្មើសសេដ្ឋកិច្ចដល់អាយុត្រូវចូលនិវត្តន៍ហើយ ប៉ុន្តែនៅបន្តការងារធម្មតា ខណៈមន្ត្រីនគរបាលមួយចំនួនទៀតរាប់ចាប់ពីលោកឧត្តមសេនីយ៍ទោ ងួន គឿន, លោកឧត្តមសេនីយ៍ទោ យិន ចំណាន (អតីតស្នងការនគរបាលខេត្តរតនគិរី), លោកឧត្តមសេនីយ៍ត្រី ជា ប៊ុនធឿន (អតីតស្នងការរងនគរបាលខេត្តរតនគិរី) និងមន្ត្រីនគរបាលថ្នាក់វរសេនីយ៍ ព្រមទាំងថ្នាក់អនុសេនីយ៍ជាច្រើនរូបទៀត ឲ្យតែដល់អាយុចូលត្រូវនិវត្តន៍ គឺពួកគាត់បំពេញសាលាកបត្រព័ត៌មានរបស់មន្ត្រីនគរបាលជាតិ ពោលគឺគោរពច្បាប់ តែលោក នូវ ដារ៉ា អត់ព្រមចូលនិវត្តន៍ ធ្វើឱ្យគេច្រណែននិន្ទាខ្លាំងណាស់ ច្បាប់តែមួយមិនស្មើភាពគ្នាសោះ។
ជាក់ស្តែងលោក នូវ ដារ៉ា មានអត្តលេខ០៩៥៧០ កើតនៅថ្ងៃទី០៦ ខែតុលា ឆ្នាំ១៩៦០ ទីកន្លែងកំណើតនៅភូមិ១ ស្ថិតក្នុងសង្កាត់ឡាបានសៀក ក្រុងបានលុង ខេត្តរតនគិរី។
បើតាមមន្ត្រីនគរបាលដែលចូលនិវត្តន៍ (សូមមិនបញ្ចេញឈ្មោះ) បានប្រាប់កោះសន្តិភាពនៅថ្ងៃទី២១ ខែកញ្ញា ឆ្នាំ២០២៣នេះថា «ការកំណត់អាយុចូលនិវត្តន៍របស់មន្ត្រីនគរបាលជាតិ គឺកំណត់ទៅតាមឋានន្តរស័ក្តិ។ បើឧត្តមសេនីយ៍ត្រី ដូចជារូបលោក នូវ ដារ៉ា គឺអាយុ៦០ឆ្នាំ ត្រូវចូលនិវត្តន៍ (១៩៦០-២០២៣) លើសអាយុជាង៣ឆ្នាំមកហើយ»។
ប្រភពខាងលើបន្តថា «មន្ត្រីនគរបាលទាំងអស់ដល់អាយុចូលនិវត្តន៍ គឺនាយកដ្ឋានបុគ្គលិកផ្នែកសោធននិវត្តន៍ នៃអគ្គស្នងការនគរបាល ផ្ញើសាលាកបត្រព័ត៌មានឲ្យបំពេញ រួចផ្ញើត្រឡប់ទៅវិញពេលចូលនិវត្តន៍ (សម្រាកការងារ) ត្រូវបើកប្រាក់ខែនៅខាងក្រសួងសង្គមកិច្ច ប៉ុន្តែបែរជាគាត់មិនបំពេញសាលាកបត្រព័ត៌មានចូលនិវត្តន៍ទេ នៅសម្ងំបើកប្រាក់ខែជាមន្ត្រីនគរបាលថ្នាក់ឧត្តមសេនីយ៍ត្រីធម្មតា បណ្តាលឲ្យខាតបង់ថវិកាជាតិផងដែរ»។
ទាក់ទិនទៅនឹងព័ត៌មានខាងលើនេះដែរ លោកឧត្តមសេនីយ៍ទោ អ៊ុង សុភាព ស្នងការនគរបាលខេត្តរតនគិរី កន្លងទៅបានប្រាប់អង្គភាពព័ត៌មានក្នុងស្រុកថា «លោកឧត្តមសេនីយ៍ត្រី នូវ ដារ៉ា គាត់តែងតាំងដោយព្រះរាជក្រឹត្យ ហើយបើដាក់ឲ្យចូលនិវត្តន៍ក៏ព្រះរាជក្រឹត្យដែរ»។
លោកបន្តថា «អង្គភាពសាម៉ីមិនទាន់ទទួលបានព្រះរាជក្រឹត្យដាក់ឲ្យចូលនិវត្តន៍នោះទេ ចឹងបើមាន នឹងអញ្ជើញសាម៉ីខ្លួនមកបំពេញបែបបទបញ្ជូនទៅថ្នាក់លើ»។
ជាមួយគ្នានឹងការដែលលោកឧត្តមសេនីយ៍ត្រី នូវ ដារ៉ា លើសអាយុប្រមាណជាង៣ឆ្នាំ (មិនចូលនិវត្តន៍) នៅបន្តដឹកនាំការងារប្រឆាំងបទល្មើសសេដ្ឋកិច្ច នៃស្នងការនគរបាលខេត្តរតនគិរី បើកប្រាក់ខែរដ្ឋធម្មតាខាងលើនេះដែរ កោះសន្តិភាពមិនអាចសុំការបំភ្លឺពីសាម៉ីខ្លួនបានទេ នៅព្រឹកថ្ងៃទី២១ ខែកញ្ញា ឆ្នាំ២០២៣នេះ។
ប៉ុន្តែពាក់ព័ន្ធក្នុងករណីខាងលើនេះដែរ សារព័ត៌មានកោះសន្តិភាពយើងបានទាក់ទងលោក នូវ ដារ៉ា តាមទូរស័ព្ទនៅថ្ងៃទី២១ ខែកញ្ញា ឆ្នាំ២០២៣ វេលាមោង១និង២២នាទីរសៀលថ្ងៃខែដដែលនេះ បានបញ្ជាក់ថា «បើចង់ដឹងរឿងនឹង សារព័ត៌មានទៅសួរថ្នាក់លើទៅ»។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ