រដ្ឋអារីហ្សូណា, សហរដ្ឋអាមេរិក៖ ដាក់ពន្ធនាគារអ្នកគ្រូបង្រៀនថ្នាក់អនុវិទ្យាល័យម្នាក់ពីបទល្បួងក្មេងអាយុជាង១០ឆ្នាំរួមរ័ក។ ជនជាប់ចោទឈ្មោះប្រ៊ីតថានី ហ្សាម៉ូរ៉ា (Brittany Zamora) អាយុ២៨ឆ្នាំ ជាគ្រូបង្រៀនថ្នាក់ទី៦នៅរដ្ឋអារីហ្សូណា សហរដ្ឋអាមេរិក…
រដ្ឋអារីហ្សូណា, សហរដ្ឋអាមេរិក៖ ដាក់ពន្ធនាគារអ្នកគ្រូបង្រៀនថ្នាក់អនុវិទ្យាល័យម្នាក់ពីបទល្បួងក្មេងអាយុជាង១០ឆ្នាំរួមរ័ក។ ជនជាប់ចោទឈ្មោះប្រ៊ីតថានី ហ្សាម៉ូរ៉ា (Brittany Zamora) អាយុ២៨ឆ្នាំ ជាគ្រូបង្រៀនថ្នាក់ទី៦នៅរដ្ឋអារីហ្សូណា សហរដ្ឋអាមេរិក ត្រូវតុលាការផ្ដន្ទាទោសឱ្យជាប់ពន្ធនាគារម្ភៃឆ្នាំ បន្ទាប់ពីនាងឆ្លើយសារភាពថាបានរួមរ័កជាមួយកុមារាអាយុ១៣ឆ្នាំជាច្រើនលើក ច្រើនសា។
ស្ត្រីរូបនេះ បើមើលពីសម្បកក្រៅ ជាអ្នកគ្រូបង្រៀនដ៏ថ្លៃថ្នូរម្នាក់។ ប៉ុន្តែធាតុពិត អ្នកគ្រូជាមនុស្សមានចិត្តអកុសលធម៌នៅក្នុងខ្លួន។ នាងនៅតែគិតថាខ្លួនជាមនុស្សល្អត្រឹមត្រូវគ្រប់ដប់ទាំងអត្តចរិត និងគំនិតមារយាទ។ នាងថានាងពុំមែនជាមនុស្សដែលបង្កផលប៉ះពាល់ចំពោះសង្គមទេ។
សមត្ថកិច្ចអះអាងថាអ្នកគ្រូប្រ៊ីតថានីបានរួមរ័កជាមួយកុមារានោះជាច្រើនដង។ ជួនកាលអ្នកគ្រូនាំកុមារចូលទៅក្នុងរថយន្ត, ជួនកាលប្រព្រឹត្តនៅក្នុងថ្នាក់រៀន។ មានពេលមួយនោះ, អ្នកគ្រូប្រព្រឹត្តទង្វើរួមរ័កនៅក្នុងថ្នាក់រៀន ដោយចាត់តាំងកូនសិស្សម្នាក់អាយុ១១ឆ្នាំជួយមើលផ្លូវនៅមាត់ទ្វារ ដើម្បីកុំឱ្យមានមនុស្សចូលទៅរំខាន។
អ្នកគ្រូរូបនេះឆ្លើយសារភាពថាខ្លួនបានប្រព្រឹត្តអំពើអនាចារទៅលើកុមារជាអនីតិជនចំនួនដប់ករណី, បៀតបៀនកុមារចំនួន២ករណី, យករូបអាសអាភាសឱ្យកុមារជាអនីតិជនមើលមួយករណី និងប្រព្រឹត្តទង្វើអសីលធម៌ផ្លូវភេទជាសាធារណៈមួយករណី។ អង្គជំនុំជម្រះសម្រេចថាទណ្ឌិតរូបនេះមិនអាចមានឱកាសនៅក្រៅឃុំទេ។ ត្រូវតែអនុវត្តទោសនៅក្នុងពន្ធនាគារឱ្យបានគ្រប់ចំនួនម្ភៃឆ្នាំ។
ស្ត្រីដែលជាម្ដាយចុងរបស់កុមារនោះប្រាប់ថាមុនដំបូង, គាត់មិននឹកស្មានថាមានរឿងធំដល់ថ្នាក់នេះទេ។ គាត់គ្រាន់តែសង្ស័យថាហេតុអ្វីអ្នកគ្រូចាំបាច់បិទទ្វារដាក់គន្លឹះពីខាងក្នុងនៅពេលបង្រៀន? គាត់ក៏លួចដំឡើងសូហ្វវែ (software) នៅលើទូរស័ព្ទរបស់កូន។ កាលណាអ្នកគ្រូ និងកុមារផ្ញើសារឆ្លើយឆ្លងគ្នា, គាត់អាចឆែកមើលឃើញទាំងអស់។
នៅក្នុងតុលាការ, ម្ដាយកុមារនោះប្រាប់ថាអ្នកគ្រូប្រ៊ីតថានីប្រើយុទ្ធសាស្ត្រអូសទាញកូនរបស់គាត់សម្បើមណាស់។ អ្នកគ្រូផ្ញើសារបង្កប់សុទ្ធតែពាក្យពេចន៍ស៊ីជម្រៅគួរឱ្យព្រឺព្រួច។ សូម្បីតែក្មេងដែលមិនទាន់ជ្រុះពន្លៃពីលើក្បាលក៏មានអារម្មណ៍ព្រឺសម្បុរខ្ញាកៗផងដែរ។ គាត់ជាគ្រូបង្រៀន។ ម៉្លោះហើយ គាត់សម្បូរពាក្យពេចន៍ផ្លែផ្កា ផ្ដោះផ្ដងគ្នា។ ជួនកាល អ្នកគ្រូថតរូបអាក្រាតរបស់ខ្លួនឯងផ្ញើទៅឱ្យកុមារនោះមើល។
អ្នកគ្រូប្រ៊ីតថានីថែមទាំងព្យាយាមប្រើប្រាស់យុទ្ធសាស្ត្របញ្ចុះបញ្ចូលសមត្ថកិច្ចផងដែរ។ នៅពេលចាប់ខ្លួន, អ្នកគ្រូប្រាប់ថាបើអ្នកគ្រូត្រូវជាប់គុកយូរដល់ថ្នាក់នេះ, អ្នកគ្រូប្រហែលជាមិនរស់ទេ។ អ្នកគ្រូមានរូបរាងតូចស្ដើង។ ដូចនេះ អ្នកគ្រូប្រាកដជាត្រូវអ្នកជាប់ឃុំចាប់ហែកជាចម្រៀកៗជាមិនខាន។ ចំណែកបុរសជាប្ដីរបស់អ្នកគ្រូ ទោះបីឃើញប្រពន្ធរបស់ខ្លួនប្រព្រឹត្តកំហុសដល់ថ្នាក់នេះហើយ, ក៏គាត់នៅតែឆ្លៀតនិយាយកាន់ជើងប្រពន្ធថែមទៀត។
នេះក៏ដោយសារតែទឹកចិត្តអាណិតស្រឡាញ់។ អាចនិយាយបានថាមកពីមាននិស្ស័យជាមួយគ្នាតាំងពីងអតីតជាតិផងក៏មិនដឹង។ គាត់គិតថាប្រពន្ធរបស់គាត់ជាមនុស្សល្អកម្ររកបាននៅក្នុងឆាកជីវិតរបស់គាត់។ ក្រោយពេលបែកធ្លាយរឿងនេះ,គាត់សុខចិត្តទៅលុតជង្គង់នៅចំពោះមុខឪពុកម្ដាយរបស់កុមាររូបនោះដើម្បីអង្វរលន់តួពួកគេ។ សូមកុំឱ្យពួកគេយករឿងនេះប្ដឹងសមត្ថកិច្ច។ ប៉ុន្តែឪពុកម្ដាយគេមិនព្រមទេ។ ធ្វើដាក់កូនគេដល់ថ្នាក់នេះហើយ។ គេត្រូវតែប្ដឹងដាក់ពន្ធនាគារឱ្យទាល់តែបាន៕
ប្រភព៖ People Magazine, The Independent
ចែករំលែកព័តមាននេះ