លោក កឹម សុខា ជាប់ទោស២៧ឆ្នាំ តែរស់នៅក្នុងផ្ទះ ហើយមិនអាចធ្វើនយោបាយបានឡើយ
- ភ្នំពេញ
រាជធានីភ្នំពេញ ៖ សាលាដំបូងរាជធានីភ្នំពេញនៅព្រឹកថ្ងៃទី៣ ខែមីនា ឆ្នាំ២០២៣នេះ បានប្រកាសសាលក្រម ដាក់ទោសឲ្យលោក កឹម សុខា ប្រធានអតីតគណបក្សសង្គ្រោះជាតិ…
រាជធានីភ្នំពេញ ៖ សាលាដំបូងរាជធានីភ្នំពេញនៅព្រឹកថ្ងៃទី៣ ខែមីនា ឆ្នាំ២០២៣នេះ បានប្រកាសសាលក្រម ដាក់ទោសឲ្យលោក កឹម សុខា ប្រធានអតីតគណបក្សសង្គ្រោះជាតិ ឲ្យជាប់ពន្ធនាគាររយៈពេល២៧ឆ្នាំ។
តែលោក កឹម សុខា មិនត្រូវបានបញ្ជូនទៅឲ្យរស់នៅ ឬឃុំខ្លួនក្នុងពន្ធនាគារណាមួយឡើយ ដោយតុលាការអនុញ្ញាតឲ្យនៅផ្ទះរបស់លោក ដែលមានអាស្រ័យដ្ឋាននៅសង្កាត់បឹងកក់ទី២ ខណ្ឌទួលគោក រាជធានីភ្នំពេញ។ នេះបើតាមលោក អាង ឧត្តម មេធាវីម្នាក់របស់លោក កឹម សុខា ដែលប្រាប់អ្នកកាសែត ក្រោយចេញពីសវនាការ។
ជាមួយគ្នានេះ អយ្យការសាលាដំបូងរាជធានីភ្នំពេញ បានចេញសេចក្តីប្រកាសអំពីសាលក្រមផ្តន្ទាទោស លោក កឹម សុខា នៅថ្ងៃទី០៣ ខែមីនា ឆ្នាំ២០២៣ ដោយបញ្ជាក់ថា អតីតប្រធាននៃអតីតគណបក្សសង្គ្រោះជាតិរូបនេះ ត្រូវបានកាត់ទោស ក្នុងសំណុំរឿង «សន្ទិដ្ឋភាពជាមួយបរទេស»។ យោងតាមសេចក្តីប្រកាសព័ត៌មានរបស់តុលាការបានបញ្ជាក់ថា លោក កឹម សុខា ក៏ត្រូវបានដកជាស្ថាពរនូវ សិទ្ធិបោះឆ្នោត សិទ្ធិឈរឈ្មោះឲ្យគេបោះឆ្នោត និងសិទ្ធិធ្វើសកម្មភាពនយោបាយផ្សេងទៀត តាមបញ្ញាត្តិមាត្រា៤៥០ នៃក្រមព្រហ្មទណ្ឌ។
ក្រៅពីនោះតុលាការបានដាក់ជនជាប់ចោទឲ្យស្ថិតក្រោមវិធានការត្រួតពិនិត្យតាមផ្លូវការ មិនត្រូវចាកចេញពីបរិវេណនៃលំនៅឋាន, មិនត្រូវឲ្យជួបបុគ្គលណាម្នាក់ ទាំងសញ្ជាតិខ្មែរ និងបរទេស លើកលែងតែក្រុមគ្រួសារ។
ខាងក្រោមនេះជា តាមសេចក្តីប្រកាសព័ត៌មានរបស់អយ្យការសាលាដំបូងរាជធានីភ្នំពេញ៖
ចែករំលែកព័តមាននេះ