ខេត្តបាត់ដំបង ៖ ដើម្បីបំផុសចលនាដល់ប្រជាពលរដ្ឋ ឱ្យចូលរួមយ៉ាងសកម្មក្នុងការចូលរួមថែរក្សាពូជត្រីឱ្យមាននៅក្នុងទឹក បង្កើនផលត្រីក្នុងធម្មជាតិផង នាថ្ងៃទី ៣១ ខែកក្កដា ឆ្នាំ ២០២២…
ខេត្តបាត់ដំបង ៖ ដើម្បីបំផុសចលនាដល់ប្រជាពលរដ្ឋ ឱ្យចូលរួមយ៉ាងសកម្មក្នុងការចូលរួមថែរក្សាពូជត្រីឱ្យមាននៅក្នុងទឹក បង្កើនផលត្រីក្នុងធម្មជាតិផង នាថ្ងៃទី ៣១ ខែកក្កដា ឆ្នាំ ២០២២ មីជាតិ បានសហការជាមួយ មន្ទីរកសិកម្ម រុក្ខាប្រមាញ់ និងនេសាទ និងរដ្ឋបាលស្រុកគាស់ក្រឡ រៀបចំពិធីអបអរសាទរទិវាមច្ឆជាតិ ឆ្នាំ២០២២ ដោយមានការចូលរួមពីសំណាក លោក សោមនស្ស វិបុល ប្រធានជាន់ខ្ពស់ផ្នែកពាណិជ្ជកម្ម នៃក្រុមហ៊ុន វ័ន ហ្វ្រេតធើនីធី (មីជាតិ), លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង, លោក ញឹក សារ៉ែន អភិបាល នៃគណៈអភិបាលស្រុកគាស់ក្រឡ ខេត្តបាត់ដំបង, និងខណ្ឌរដ្ឋបាលជលផលខេត្ត អាជ្ញាធរមូលដ្ឋាន មន្ត្រីរាជការ ថ្នាក់ដឹកនាំ បុគ្គលិកមីជាតិ និងប្រជាពលរដ្ឋប្រមាណជាង ១០០ នាក់ ដែលប្រព្រឹត្តទៅនៅ បឹងជម្រកត្រីសហគមន៍ សម្តេចក្រឡាហោម ភូមិបឹងព្រះ ឃុំព្រះផុស ស្រុកគាស់ក្រឡ ខេត្តបាត់ដំបង ។
ថ្លែងក្នុងពិធីនោះ លោក សោមនស្ស វិបុល ប្រធានជាន់ខ្ពស់ផ្នែកពាណិជ្ជកម្ម នៃក្រុមហ៊ុន វ័ន ហ្វ្រេតធើនីធី (មីជាតិ) បានគូសបញ្ជាក់ថា ៖ «ព្រឹត្តិការណ៍ មីជាតិ ផ្តល់មច្ឆជាតិរក្សា និរន្តរភាពធម្មជាតិ នាពេលនេះគឺធ្វើឡើង ក្នុងអត្ថន័យនៃការ អបអរសាទរទិវាមច្ឆជាតិ និងជាមួយវត្ថុបំណង ដើម្បីបំផុសស្មារតីចូលរួមក្នុងការអភិវឌ្ឍ និងអភិរក្ស ថែរក្សាពូជត្រី ក៏ដូចជាវារីជាតិផ្សេងៗទៀត ឲ្យបានគង់វង្សធានានិរន្តរភាពធនធានជលផល និងដើម្បីបំពេញបន្ថែម ឱ្យបឹងជម្រកត្រីសហគមន៍ សម្បូរមច្ឆជាតិសម្រាប់ជាប្រភពមេពូជនាថ្ងៃអនាគត និងបំពេញសេចក្ដីត្រូវការរបស់ប្រជាពលរដ្ឋក្នុងតំបន់ ។ ទន្ទឹមនឹងនេះដែរ លោកប្រធានជាន់ខ្ពស់ ក៏បានសំណូមពរដល់ប្រជាពលរដ្ឋទាំងអស់ ត្រូវរួមចំណែកគ្នាចូលរួមថែរក្សា ការពារធនធានមច្ឆជាតិ ដោយមិនត្រូវប្រើប្រាស់ឧបករណ៍នេសាទខុសច្បាប់ ដែលធ្វើឲ្យបាត់បង់ពូជត្រី និងលើកទឹកចិត្តឱ្យមានការបង្កើតជាសហគមន៍ស្រះជម្រកត្រី ដើម្បីចូលរួមថែរក្សា អភិរក្សពូជត្រី សម្រាប់ផ្គត់ផ្គង់បំពេញតម្រូវការ បង្កើនប្រាក់ចំណូល លើកកម្ពស់ជីវភាពរស់នៅរបស់ប្រជាពលរដ្ឋផងដែរ» ។
លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង បានមានប្រសាសន៍ថា ដើម្បីចូលរួមរក្សាឱ្យបាននូវធនធានមច្ឆជាតិកាន់តែសំបូរបែបថែមទៀត ក៏សូមមន្ត្រីជំនាញ និងអាជ្ញាធរមូលដ្ឋានទាំងអស់ ចូលរួមសហការគ្នាខិតខំស្តារទំនប់បឹង បន្ថែមទៀតឲ្យបានច្រើន និងគ្រប់ទីកន្លែង ជាពិសេស ត្រូវបន្តស្វែងរក វិស័យឯកជន ក៏ដូចជាដៃគូអភិវឌ្ឍនានា ក្នុងការចូលរួមព្រលែងពូជត្រីឲ្យបានញឹកញាប់ នៅតាមបឹងធម្មជាតិ តួយ៉ាងដូចកិច្ចការដែលយើងកំពុងធ្វើជាមួយ ក្រុមហ៊ុន មីជាតិស្រាប់នាពេលនេះ ។ ម្យ៉ាងទៀត លោក ក៏បានស្នើដល់អាជ្ញាធរមូលដ្ឋានខិតខំរក្សាផ្ទៃបឹងនេះ និងរបងដែលក្រុមហ៊ុនទើបផ្តល់ជូន ចៀសវាងការរំលោ.ភបំពានកាន់កា.ប់ពីប្រជាពលរដ្ឋនៅជុំវិញបរិវេណបឹង ព្រោះបឹងទាំងនេះជាសម្បត្តិសាធារណៈរបស់រដ្ឋ ដែលបម្រើផលប្រយោជន៍ឲ្យប្រជាពលរដ្ឋជារួម ។
លោក ញឹក សារ៉ែន អភិបាល នៃគណៈអភិបាលស្រុកគាស់ក្រឡ ខេត្តបាត់ដំបង បានសម្តែងការកោតសសើរនូវទឹកចិត្ត និងគំនិតផ្តួចផ្តើម របស់ក្រុមហ៊ុនមីជាតិ ដែលលះបង់ធនធានពីប្រាក់ចំណេញរបស់ខ្លួន ក្នុងការលែងកូនត្រីពូជ និងធ្វើរបងខាងមុខបឹង ក្នុងឱកាសអបអរសាទរទិវាមច្ឆជាតិ ឆ្នាំ២០២២ ។ លោកបានបន្តទៀតថា ការចូលរួមរបស់មីជាតិ នេះជាឆន្ទះដ៏វិសេសវិសាល ដែលក្រុមហ៊ុនឯកជន ចូលរួមគាំទ្រដោយផ្ទាល់ តាមរយៈការបង្កើតនូវគំនិតផ្តួចផ្តើមថ្មីៗ ដើម្បីចូលរួមជាមួយរាជរដ្ឋាភិបាល ក៏ដូចជាសហគមន៍ ។
គួសបញ្ជាក់ផងដែល ជាមួយគម្រោង “មីជាតិ ផ្តល់មច្ឆជាតិ រក្សានិរន្តរភាពធម្មជាតិ” ក្នុងឱកាសអបអរសាទរទិវាមច្ឆជាតិ ឆ្នាំ២០២២ ក្រុមហ៊ុនមីជាតិ បាននាំមកនូវត្រីឆ្ពិន, ត្រីទីឡាព្យា, ត្រីប្រា, ត្រីរ៉ស់ និងអន្ទង់ចំនួន ១០០០០ក្បាល មកលែង ក្នុងបឹងជម្រកត្រីសហគមន៍ សម្តេចក្រឡាហោម និងបន្ថែមពីនេះ ដោយមើលឃើញពីតម្រូវការចាំបាច់ របស់សហគមន៍ មីជាតិ បានបំពេញបន្ថែមនូវសំណើរក្នុងការឧបត្ថម្ភ របងខាងមុខបឹង ដើម្បីរក្សាការពារ ពីការទន្ទ្រានរបស់សត្វពាហនៈ ៕ អត្ថបទសហការ
ចែករំលែកព័តមាននេះ