ខេត្តក្រចេះ ៖ នៅរសៀលថ្ងៃទី០៧ កក្កដា នេះ ប្រជាពលរដ្ឋជាច្រើននាក់ បានប្រមូលផ្តុំគ្នាធ្វើបាតុកម្មតវ៉ានៅមុខខេត្ត ក្រោយពីមានការឃាត់ខ្លួនជនសង្ស័យម្នាក់មកសួរនាំ ពាក់ព័ន្ធការដាំនិងសង់ខ្ទមបែបអនាធិបតេយ្យនៅលើទីតាំងដីសម្បទានសេដ្ឋកិច្ចរបស់ក្រុមហ៊ុន ស៊ី…
ខេត្តក្រចេះ ៖ នៅរសៀលថ្ងៃទី០៧ កក្កដា នេះ ប្រជាពលរដ្ឋជាច្រើននាក់ បានប្រមូលផ្តុំគ្នាធ្វើបាតុកម្មតវ៉ានៅមុខខេត្ត ក្រោយពីមានការឃាត់ខ្លួនជនសង្ស័យម្នាក់មកសួរនាំ ពាក់ព័ន្ធការដាំនិងសង់ខ្ទមបែបអនាធិបតេយ្យនៅលើទីតាំងដីសម្បទានសេដ្ឋកិច្ចរបស់ក្រុមហ៊ុន ស៊ី អេច ភីប៊ី ឌីវេឡុបមេន ។
សូមរំលឹកថា កាលពីថ្ងៃទី៦ ខែកក្កដា កម្លាំងចម្រុះ ដឹកនាំដោយលោក កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ ក្រោមការសម្របសម្រួលពីលោក រ៉ា បូរ៉ាន់ឌី ព្រះរាជអាជ្ញារង សាលាដំបូងខេត្តក្រចេះ បានចុះអនុវត្តរុះរើរោង ខ្ទម និងឃាត់ខ្លួនមនុស្សម្នាក់មកសួរនាំ ដែលដាំ និងសង់បែបអនាធិបតេយ្យ នៅលើតាំងដីសម្បទានសេដ្ឋកិច្ចរបស់ក្រុមហ៊ុន ស៊ី អេច ភីប៊ី ឌីវេឡុបមេន ដែលមានទីតាំងស្ថិតនៅឃុំកំពង់ចាម ឃុំវឌ្ឍនៈ ស្រុកសំបូរ ខេត្តក្រចេះ។
ការចុះអនុវត្តការុះរើ រោង ខ្ទម នេះដែរ ក្រោយពីពិនិត្យឃើញថា មានការចូលកាប់រានទន្ទ្រានហ៊ុំព័ទ្ធយកដីរបស់រដ្ឋធ្វើកម្មសិទ្ធិស្ថិតក្នុងភូមិយាវ ឃុំកំពង់ចាម និងភូមិត្រាំដុំ ឃុំវឌ្ឍនៈ ស្រុកសំបូរ ខេត្តក្រចេះ ។ ក្នុងនោះ អាជ្ញាធរខេត្ត បានធ្វើការឃាត់ខ្លួនជនសង្ស័យម្នាក់ ដែលមានកាន់កាំបិតក្នុងដៃសង្ស័យថា គាត់ចូលកាប់ទន្ទ្រានហ៊ុមព័ទ្ធដីរដ្ឋដោយខុសច្បាប់ ដោយសារគាត់ស្ថិតក្នុងចំណុចទន្ទ្រានយ៉ាងអាណាធិបតេយ្យ យកមកសាកសួរ ស៉ើបអង្កេត ស្រាវជ្រាវរកអ្នកជាប់ពាក់
ព័ន្ធ ដើម្បីចាត់វិធានការទៅតាមផ្លូវច្បាប់។
ក្នុងការចុះអនុវត្តនោះដែរ ត្រូវបានពលរដ្ឋមួយក្រុមជឿការញុះញង់របស់មេខ្យល់ធ្វើការបះបោរបាតុកម្មបិទផ្លូវ មិនឲ្យធ្វើដំណើរ ទោះអាជ្ញាធរព្យាយាមសម្រប់សម្រួលជាមួយពួកគាត់យ៉ាងណា ក៍ពួកគាត់មិនព្រមស្ដាប់ដែរ រហូតដល់ម៉ោង៣ និង៣០នាទីរសៀលទើបពួកគាត់ព្រមបំបែកគ្នា។ហើយកម្លាំងចម្រុះនៅតែបន្តចុះអនុវត្ត និងរារាំងមិនឲ្យពលរដ្ឋចូលទៅកាប់ទន្ទ្រាន និងសង់រោង ខ្ទម នៅលើទីតាំងដីហាមឃាត់ ថែមទាំងដាក់កម្លាំងនៅយាមជាប្រចាំទៀតផង។
យោងតាមលិខិតរបស់រដ្ឋបាលខេត្តក្រចេះ លេខ ០៨៧ ស.ជ.ណ ចុះថ្ងៃទី០៥ ខែកក្កដា ឆ្នាំ២០២២ ជូនដំណឹងដល់បងប្អូនប្រជាពលរដ្ឋឲ្យឈប់ជឿតាមការញុះញង់របស់មេខ្យល់ គៀងគរ ចូលទៅកាប់ទន្ទ្រានហ៊ុំព័ទ្ធយកដីរបស់រដ្ឋ ក្នុងទីតាំងដីសម្បទានសេដ្ឋកិច្ចរបស់ក្រុមហ៊ុន ស៊ីអេចភីប៊ី ឌីវេឡុមេន ដែលនៅសល់និងបានកាយ ក្រវ៉ាត់ព្រំរួចហើយ បើបងប្អូននៅតែបន្តនិងត្រូវទទួលខុសត្រូវចំពោះមុខ ច្បាប់ជាធរមាន។
ចំពោះមេខ្យល់ត្រូវបញ្ឈប់សកម្មភាពញុះញង់ គៀងគរ ប្រជាពលរដ្ឋឱ្យចូលទៅកាប់ទន្ទ្រានហ៊ុំព័ទ្ធយកដីរបស់រដ្ឋដោយខុសច្បាប់បន្តទៀត ប្រសិនបើនៅតែបន្តប្រពឹត្តទង្វើនេះទៀត អង្គភាព-ស្ថាប័នមានសមត្ថកិច្ចនឹងអនុវត្តវិធានការ ច្បាប់យ៉ាងម៉ឺងម៉ាត់បំផុត។ ក្នុងករណីបងប្អូនប្រជាពលទៅដាក់ពាក្យស្នើសុំដីសម្បទានសង្គមកិច្ចនៅតាមភូមិឃុំសាម៉ីដែលខ្លួនរស់នៅ។
រដ្ឋបាលខេត្តក្រចេះបានបញ្ជាក់ថា គណៈកម្មាធិការគ្រប់គ្រង់ប្រើប្រាស់ និងបែងចែកដីថ្នាក់ខេត្ត បានកំណត់ទីតាំងដីសម្បទានសង្គមកិច្ច ស្ថិតនៅចំណុចស្រែភ្នី ភូមិយាវ ឃុំកំពង់ចាម ស្រុកសំបូរ ខេត្តក្រចេះ ។
ចែករំលែកព័តមាននេះ