រាជធានីភ្នំពេញ ៖ ពលរដ្ឋអ្នកចិញ្ចឹមត្រី អ្នកចិញ្ចឹមមាន់ និងកសិករប្រកបរបរកសិកម្មនានាតែងតែត្អូញត្អែរពីការដែលលក់ផលិតផលរបស់ពួកគាត់បានតម្លៃថោក មិនចំណេញ ប៉ុន្តែពលរដ្ឋអ្នកទទួលទាននិយាយថា ត្រី សាច់ និងបន្លែបង្ការនានានៅលើទីផ្សារបានឡើងថ្លៃមិនដែលមានពេលចុះថោកនោះឡើយ…
រាជធានីភ្នំពេញ ៖ ពលរដ្ឋអ្នកចិញ្ចឹមត្រី អ្នកចិញ្ចឹមមាន់ និងកសិករប្រកបរបរកសិកម្មនានាតែងតែត្អូញត្អែរពីការដែលលក់ផលិតផលរបស់ពួកគាត់បានតម្លៃថោក មិនចំណេញ ប៉ុន្តែពលរដ្ឋអ្នកទទួលទាននិយាយថា ត្រី សាច់ និងបន្លែបង្ការនានានៅលើទីផ្សារបានឡើងថ្លៃមិនដែលមានពេលចុះថោកនោះឡើយ ។
ជាក់ស្តែងនាពេលនេះកសិករចិញ្ចឹមត្រីបានត្អូញថា ត្រីអណ្តែក ត្រីពោ ត្រីឆ្តោ ដែលគាត់ចិញ្ចឹមរកឈ្មួញទិញមិនបាន បើមានឈ្មួញទៅទិញគេឲ្យតម្លៃថោក ប៉ុន្តែប្រភេទត្រីទាំងអស់នោះលក់នៅលើទីផ្សារមិនថោកនោះឡើយ ។ ជាក់ស្តែងត្រីអណ្តែងកសិកអ្នកចិញ្ចឹមនិយាយថា ឈ្មួញទៅទិញពីពួកគាត់នៅកន្លែងចិញ្ចឹមឲ្យថ្លៃតែ ៤៥០០រៀលក្នុង ១គីឡូក្រាម ប៉ុន្តែត្រីប្រភេទនេះលក់នៅទីផ្សារមួយគីឡូក្រាមថ្លៃពី ៧ពាន់រៀលទៅ ២ម៉ឺនរៀល ។ ចំណែកត្រីពោ ត្រីឆ្កោ ដែលអ្នកចិញ្ចឹមត្រីថា ឈ្មួញចុះទៅទិញឲ្យថ្លៃតែ ៥ពាន់រៀលនៅក្នុងមួយគីឡូក្រាមនោះ នៅលើទីផ្សារគ្មានត្រីណាដែលមានតម្លៃពី ៦ឬ ៧ពាន់រៀលក្នុងមួយគីឡូក្រាមនោះឡើយ ។
តាមរបាយការណ៍របស់ក្រសួងពាណិជ្ជកម្ម នៅថ្ងៃទី ១ខែមីនា ឆ្នាំ ២០២១នេះ ត្រីឆ្តោមួយគីឡូក្រាម ២ម៉ឺនរៀល តម្លៃលក់នៅក្នុងផ្សារធំថ្មី ត្រីប្រាមួយគីឡូក្រាម ៩ពាន់រៀលលក់ផ្សារអូរឫស្សី ។ ជាមួយគ្នាតម្លៃមាន់ក៍ដូច្នេះដែរ លោក ម៉ៅ អ្នកចិញ្ចឹមមាន់នៅខេត្តតាកែវ និយាយថា មាន់រស់ឈ្មួញចុះទៅទិញដល់ផ្ទះរបស់លោកមួយគីឡូក្រាមតែ ១ម៉ឺនរៀលប៉ុណ្ណោះ។ អ្នកចិញ្ចឹមមាន់ម្នាក់នេះនិយាយថា ដោយសារតែជំងឺកូវីដ ធ្វើឲ្យពិធីរៀបការ ពិធីបុណ្យទាននានាមិនដំណើរការនោះ ឈ្មួញតែងតែទារទម្លាក់ថ្លៃមាន់រស់ ។ លោកទទួលស្គាល់ឈ្មួញទិញមាន់ពីលោកថោក តែមាន់លក់នៅលើទីផ្សារថ្លៃណាស់ ។ តាមក្រសួងពាណិជ្ជកម្មសាច់មាន់មួយគីឡូក្រាម ២៩០០០រៀល លក់នៅផ្សារដើមគរ ។
អ្នកស្រី ផានី ពលរដ្ឋរស់នៅរាជធានីភ្នំពេញ បានសម្តែងការងឿងឆ្លល់ក្នុងបញ្ហានេះដែរ ។ អ្នកស្រីបានឆ្ងល់តាំងពីពេលដែលកសិករនាំគ្នាផ្អើលថា ស៊ុតធ្លាក់ថ្លៃមកម្លេះ ។ អ្នកស្រីនិយាយថា គាត់ទទួលបានព័ត៌មានថា ស៊ុតកសិករមួយគ្រាប់លក់បានតែ ៤០០រៀល ប៉ុន្តែពេលអ្នកស្រីទៅផ្សារស៊ុតមួយគ្រាប់ ១ពាន់រៀល ។ «ខ្ញុំឆ្ងល់ណាស់ទំនិញនៅលើទីផ្សារឡើងថ្លៃរហូត ពិសេសកសិផលដែលគេអះអាងថា ដាំដុះ និងចិញ្ចឹមនៅក្នុងថ្លៃឡើងថ្លៃរហូត ។ អ្នកទិញចង់ទិញតែរបស់នៅក្នុងស្រុក តែម៉េចបានជាឈ្មួញយលចំណេញច្រើនម្លេះ មិនអាសូរអ្នកដាំ អ្នកចិញ្ចឹមផង ។ អ្នកស្រី ផានី និយាយនៅក្នុងផ្សារលក់កសិផលធម្មជាតិមួយកន្លែង ពេលគាត់ដើរទិញម្ហូប ។
អ្នកស្រី កែវ យ៉ាដា អ្នកចិញ្ចឹមត្រីនៅខេត្តសៀមរាប បានកត់សម្គាល់ថា ទំនិញនៅលើទីផ្សារឡើងថ្លៃជារហូតមិនដែលចុះនោះទេ ។ ជាក់ស្តែងប្រភេទត្រីនេះតែម្តង គឺឡើងថ្លៃរហូត។ ក្នុងនាមជាអ្នកចិញ្ចឹមត្រីម្នាក់ អ្នកស្រីនិយាយថា ឈ្មួញតែងតែទម្លាក់ថ្លៃការទិញចូល ហើយលក់ចេញក្នុងតម្លៃខ្ពស់ ។ អ្នកស្រីបន្តថាការរកស៊ីដែលយកចំណេញច្រើននេះ ចំណេញតែបុគ្គលមួយចំនួន ប៉ុន្តែពលរដ្ឋអ្នកទទួលទាននិងអ្នកចិញ្ចឹមរងគ្រោះ ។
ឈ្មួញដើរទិញត្រី ទិញបន្លែពីអ្នកដាំ ពីអ្នកចិញ្ចឹម យកទៅលក់តាមទីផ្សារមិនអាចទាក់ទងសូមការពន្យល់បានទេ ។ ជាមួយគ្នានេះដែលសូមជម្រាបថា សាច់ជ្រូកបច្ចុប្បន្នមួយគីឡូក្រាម ២៥០០០រៀល សម្រាប់សាច់សុទ្ធ ចំណែកសាច់គោ មួយគីឡូក្រាម ៤២ ០០០រៀល ៕
ចែករំលែកព័តមាននេះ