សារព័ត៌មានបរទេសផ្សាយថា អាជ្ញាធរសិង្ហបុរីត្រៀមប្រកាសប្រើបទដ្ឋានដ៏តឹងរុឹងទៅលើពលករបរទេស ក្រោយពីជនជាតិសិង្ហបុរីចាប់ផ្តើមមានប្រតិកម្មប្រឆាំងនឹង«លំហូរចូលប្រទេស»របស់ពលករចំណាកស្រុក។ របាយការណ៍បញ្ជាក់ថា ចាប់តាំងពីថ្ងៃទី១ កញ្ញា ឆ្នាំ២០១២ តទៅពលករបរទេសដែលចង់ធ្វើការនៅសិង្ហបុរី ត្រូវបង្ហាញឯកសារ ឬភស្តុតាងដែលត្រួតពិនិត្យបានថា ខ្លួនមានចំណូលមិនតិចជាង៤.០០០ដុល្លារសិង្ហបុរី ឬហ្រែល៣.០០០ដុល្លារសហរដ្ឋអាមេរិក និងមានលទ្ធភាពគ្រប់គ្រាន់ក្នុងការចិញ្ចឹមប្តី ឬប្រពន្ធ រួមទាំងកូនរបស់ខ្លួនក្នុងអំឡុងពេលស្នាក់នៅក្នុងប្រទេស ។
ការកំណត់ប្រាក់ចំណូលថ្នាក់ទាបរបស់ពលករចំណាកស្រុកមានតម្លៃប្រហែល៣.០០០ដុល្លារសហរដ្ឋអាមេរិក ចាត់ទុកថាជាបទដ្ឋានដ៏តឹងរុឹង ។ក្រៅពីនេះពលករចំណាកស្រុកនឹងមិនអាចយកក្រុមគ្រួសារ ឬបងប្អូនក្នុងពិធីអាពាហ៍ពិពាហ៍របស់ខ្លួនចូលប្រទេសបន្តទៀតបាន លើកលែងតែការធ្វើដំណើរចូលសិង្ហបុរីក្នុងលក្ខណៈទេសចរណ៍ ឬប្រកបមុខជំនួញរយៈពេលខ្លី ។ ទោះជាបែបណាក៏ដោយ លក្ខខណ្ឌដ៏តឹងរុឹងនោះគ្មានសុពលភាពលាតសន្ធឹងដល់ពលករចំណាកស្រុកដែលនាំសមាជិកគ្រួសាររបស់ខ្លួនចូលរស់នៅក្នុងប្រទេសសិង្ហបុរីកាលពីមុនទេ ។
ឥរិយាបថចុងក្រោយរបស់អាជ្ញាធរសិង្ហបុរីបានកើតឡើង ក្រោយពីមានការមិនពេញចិត្តរបស់ជនជាតិសិង្ហបុរីជាច្រើន ចំពោះនយោបាយទទួលមនុស្សចូលប្រទេស ព្រោះមហាជនសម្លឹងឃើញថា ចំនួនពលករបរទេសចាប់ផ្តើមកើនឡើងច្រើនដោយគ្មានការគ្រប់គ្រង និងប៉ះពាល់ដល់សេដ្ឋកិច្ច រួមទាំងប៉ះពាល់ដល់ការប្រកបរបររកស៊ីចិញ្ចឹមជីវិតរបស់ជនជាតិសិង្ហបុរី ជាម្ចាស់ប្រទេស ។
ក្រៅពីនេះ ក្រសួងមហាផ្ទៃសិង្ហបុរី ក៏កំពុងត្រៀមស្នើឱ្យមានការបង្កើនទោសដល់អ្នកពាក់ព័ន្ធ និងយន្តការស៊ីស្នួលរៀបការដើម្បីនាំជនបរទេសចូលប្រទេស ដោយអ្នកប្រព្រឹត្តខុសអាចទទួលទោសពីការពិន័យដល់ទៅ១០០.០០០ដុល្លារសិង្ហបុរី ឬប្រហែល១៦.០០០ដុល្លារអាមេរិក និងជាប់ពន្ធនាគាររយៈពេល១០ឆ្នាំ ។ ចំណែកអ្នកបន្លំឯកសារដើម្បីបានចូលក្នុងប្រទេសត្រូវពិន័យ៨.០០០ដុល្លារសិង្ហបុរី ឬជាង៦.០០០ដុល្លារអាមេរិក និងជាប់ពន្ធនាគាររយៈពេល៥ឆ្នាំ ៕
ចែករំលែកព័តមាននេះ