ឥណ្ឌាប្រើទូរទេះភ្លើង៥០០បន្ថែម ធ្វើជាគ្រែបណ្ដោះអាសន្ន សម្រាប់អ្នកជំងឺកូវីដ-១៩
ទីក្រុងដេលី ៖ រដ្ឋមន្ត្រីក្រសួងមហាផ្ទៃ លោក អាមីត សារ Amit Shah បានប្រកាសវិធានការជាកញ្ចប់បន្ទាន់ថ្មីមួយ សម្រាប់រដ្ឋធានីដេលី…
ទីក្រុងដេលី ៖ រដ្ឋមន្ត្រីក្រសួងមហាផ្ទៃ លោក អាមីត សារ Amit Shah បានប្រកាសវិធានការជាកញ្ចប់បន្ទាន់ថ្មីមួយ សម្រាប់រដ្ឋធានីដេលី ស្របពេលមានការកើនឡើងយ៉ាងឆាប់រហ័ស នៃអ្នកឆ្លងវីរុសកូវីដ-១៩ ។ វិធានការនោះគឺ ប្រទេសឥណ្ឌានឹងបំលែងទូរទេះភ្លើងចំនួន ៥០០បន្ថែមទៀត ដើម្បីបង្កើតជាគ្រែចំនួន ៨,០០០ សម្រាប់អ្នកជំងឺ ។ រួមទាំងត្រូវការ គិលានុបដ្ឋាយិកា ថែទាំតាមគេហដ្ឋាន ជាចាំបាច់ផងដែរ នេះបើយោងតាមការចុះផ្សាយរបស់ BBC នៅព្រឹកថ្ងៃទី១៥ មិថុនានេះ ។
រដ្ឋមន្ត្រីក្រសួងមហាផ្ទៃ Amit Shah បានជួបពិភាក្សាជាមួយលោកនាយករដ្ឋមន្ត្រី អាវីន ខេជីរីវ៉ាល Arvind Kejriwal រួចហើយដើម្បីដោះស្រាយវិបត្តិនេះ ។
ចំនួនអ្នកឆ្លង COVID-19 ប្រចាំថ្ងៃ នៅឥណ្ឌាបានកើនខ្ពស់ជិត ១២.០០០នាក់ ។ ខណៈដែល ចំនួនឆ្លងសរុប បានបញ្ជាក់ជាផ្លូវការ កើនឡើងដល់ជាង ៣៣០.០០០ ករណីហើយ នាំឲ្យប្រទេសឥណ្ឌាស្ថិតនៅលំដាប់ទី៤ នៅលើពិភពលោក បន្ទាប់ពីសហរដ្ឋអាមេរិក ប្រេស៊ីល និងរុស្ស៊ី ។ ហើយនៅក្នុងប្រទេសឥណ្ឌា ចំនួនអ្នកជំងឺកូវីដ១៩ យ៉ាងហោចណាស់ ៩.២០០ នាក់ហើយបានស្លាប់ នេះបើយោងតាមប្រភពផ្លូវការ ពីទិន្នន័យដែលបានចេញផ្សាយដោយសាកលវិទ្យាល័យ ចន ហបគីនស៍ ។
សារព័ត៌មានរបស់ឥណ្ឌា បានរាយការណ៍ថា ដេលី គឺជារដ្ឋដែលរងគ្រោះខ្លាំងជាងគេទី៣ នៅក្នុងប្រទេស បន្ទាប់ពី Maharashtra និង Tamil Nadu ។
របាយការណ៍ដដែលបានបង្ហាញថា គ្រែសម្រាប់អ្នកជំងឺ Covid-19 ក្នុងទីក្រុងដេលី គិតទូទាំងមន្ទីរពេទ្យឯកជន និងរដ្ឋ មានចំនួន ៩.៦៩៨ គ្រែ ក្នុងនោះសល់ ៤.២៤៨ គ្រែទៀត នៅទំនេរ ។
ទោះជាយ៉ាងនេះក្តី លោកនាយករដ្ឋមន្ត្រី អាវីន ខេជីរីវ៉ាល គ្រោងនឹងប្រើប្រាស់សណ្ឋាគារចំនួន៤០ និងសាលពិធីជប់លៀង ចំនួន៧៧ បង្កើតជាមន្ទីរពេទ្យបណ្តោះអាសន្ន ។
ប្រទេសឥណ្ឌា បានចាប់ផ្តើមបំលែងទូរថភ្លើង ទៅជាបន្ទប់សម្រាកព្យាបាល ដាច់ដោយឡែកពីគ្នា កាលពីខែមេសា នៅពេលដែលមួយផ្នែកធំ នៃបណ្តាញផ្លូវដែក ត្រូវបានផ្អាក ដោយសារការបិទប្រទេស ដើម្បីបង្ការការរាតត្បាតនៃវីរុសនេះ ។
កាលពីខែមុន រដ្ឋាភិបាលឥណ្ឌា បានប្រកាសបញ្ចប់ការបិទប្រទេស ដែលបានចាប់ផ្តើមនៅថ្ងៃទី២៥ ខែមីនា ។ នៅពេលការរឹតបន្តឹងបានចាប់ផ្តើមបន្ធូរបន្ថយនោះ ចរាចរណ៍ផ្លូវថ្នល់ និងយន្ដហោះ បានកើនឡើង ហើយអាជីវកម្ម និងកន្លែងធ្វើការជាច្រើន ក៏បានបើកដំណើរការវិញ ។ ទីផ្សារមានមនុស្សកកកុញ ម្តងទៀត ។ កត្តាទាំងនេះ ទំនងធ្វើឲ្យមានការកើនឡើងយ៉ាងឆាប់រហ័ស នៃអ្នកឆ្លងវីរុសកូវីដ-១៩ ក្នុងប្រទេសឥណ្ឌា ៕
ចែករំលែកព័តមាននេះ