រាជធានីភ្នំពេញ ៖ បុរសជនជាតិអាមេរិកម្នាក់ត្រូវបុរសជាអតីតប្តីសង្សាររបស់ខ្លួនកាប់ចំក្បាលផ្នែកខាងក្រោយចំនួន២កាំបិតប៉័ុងតោបណ្តាលឱ្យបែកឈាមហូរស្រោចខ្លួន រួចរត់គេចខ្លួនបាត់។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១០ និង៣០នាទីព្រឹក ថ្ងៃទី១៨ មិថុនា ២០១៤ នៅផ្ទះជួលលេខ៤៤E3 អគារប៊ូឌិញ ផ្លូវសុធារស សង្កាត់ទន្លេបាសាក់ ខណ្ឌចំការមន។
ជនជាតិអាមេរិកដែលត្រូវគេវាយបែកក្បាលឈ្មោះ Glover Maurice អាយុ៣១ឆ្នាំ ចំណែកបុរសដែលកាប់ជនជាតិអាមេរិកឈ្មោះអម វិចសុភា អាយុ៣៥ឆ្នាំ មានទីលំនៅក្នុងសង្កាត់ផ្សារថ្មីទី២ ខណ្ឌដូនពេញ រីឯអតីតប្រពន្ធឈ្មោះពិន សាវន អាយុ២៧ឆ្នាំ ជាកម្មករជំនាញដាំដុះសួនច្បារ និងរុក្ខជាតិ មានទីលំនៅក្នុងសង្កាត់ជ្រោយចង្វារ ខណ្ឌប្ញស្សីកែវ ។
ប្រភពព័ត៌មានពីស្ត្រីជាអតីតប្រពន្ធបានប្រាប់ថា នាង និងអតីតស្វាមីបានរៀបការជាមួយគ្នាតាមច្បាប់ និងរួមរស់ជាមួយគ្នាបានរយៈពេល៨ឆ្នាំ បានកូនប្រុសស្រី៣នាក់ ដោយសារតែការរស់នៅមិនចុះសម្រុងនឹងគ្នានាងក៏បានលែងលះគ្នាអស់រយៈពេល៣ឆ្នាំមកហើយ ហើយការលែងលះគ្នានោះបានដោះស្រាយគ្នាត្រឹមតែសាលាសង្កាត់ប៉ុណ្ណោះ ដោយសំអាងថា ពួកគេរៀបការហើយមិនបានចុះអេតាស៊ីវិល ហើយនាងទើបតែបានស្គាល់បុរសជាជនជាតិអាមេរិកជាសង្សារ និងរស់នៅជាមួយគ្នាបានរយៈពេលជាង២ខែប៉ុណ្ណោះ ក៏កើតមានហេតុការណ៍នេះតែម្តង៕
ចែករំលែកព័តមាននេះ