ក្រុងប៉ោយប៉ែត ៖ ជនសង្ស័យម្នាក់ ត្រូវកម្លាំងកងរាជអាវុធហត្ថក្រុងប៉ោយប៉ែត ធ្វើការចាប់ខ្លួនបន្ទាប់ពីជននេះបានធ្វើសកម្មភាពវ៉ៃក្បាលជនរងគ្រោះម្នាក់មួយដបស្រា បណ្តាលឱ្យបែកក្បាលហូរឈាម សស្រាក់ស្រោចពេញខ្លួន កាលពីវេលាម៉ោង៧យប់ថ្ងៃទី១៣មេសា នៅចំណុចអូរព្រំដែន ខាងលិចកាស៊ីណូផ្កាយប្រាំ ស្ថិតនៅក្នុងភូមិក្បាលស្ពានមួយ សង្កាត់ប៉ោយប៉ែត ក្រុងប៉ោយប៉ែត។
ជនសង្ស័យឈ្មោះ ពោងមិះ ភេទ ប្រុស អាយុ ៣២ឆ្នាំ រស់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត។
លោក ហម មុត មេបញ្ជាកាកងរាជអាវុធហត្ថ ក្រុងប៉ោយប៉ែត បានប្រាប់ឱ្យដឹងថា មុននិងឈានដល់ការឃាត់ខ្លួនជនសង្ស័យខាងលើនេះ គឺយោងទៅតាមពាក្យបណ្តឹងរបស់ជនរងគ្រោះ និងតាមបទបញ្ជារបស់លោកមេបញ្ជាកាកងរាជអាវុធ ខេត្តបន្ទាយមានជ័យ ទើបនៅរសៀលម៉ោង ២ ថ្ងៃ ទី១៩ មេសា ២០១៤ ឃាត់ខ្លួនជនសង្ស័យបាន នៅចំណុចផ្សាររ៉ា ក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខណះជនសង្ស័យរត់គេចខ្លួនមួយរយះ។
លោកមេបញ្ជាកា បានបន្តថា ករណីខាងលើនេះ គឺជារឿងគុំនុំចាស់ ដែលផ្តើមចេញពីទំនាស់ពាក្យសម្តីបន្តិចបន្តួចប៉ុណ្ណោះរហូតដល់ប្រើអំពើហិង្សា ដោយវ៉ៃក្បាលជនរងគ្រោះមួយដបស្រា រហូតបែកក្បាលហូរឈាមស្រោចពេញខ្លួន ។
ក្រោយការឃាត់ខ្លួន ជនសង្ស័យបានសារភាពថា ខ្លួនពិតជាបានប្រព្រិត្តដូចការចោទប្រកាន់ ប្រាកដមែន ពីព្រោះមានទំនាស់ពាក្យសម្តីគ្នានាពេលកន្លងមក។ផ្អែកតាមចម្លើយសារភាពរបស់ជនសង្ស័យ ដូច្នោះជនសង្ស័យត្រូវបានកសាងសុំនុំរឿងបញ្ជូនទៅកាន់កងរាជអាវុធហត្ថខេត្តបន្ទាយមានជ័យ ដើម្បីចាត់ការតាមនិតិវិធីច្បាប់។
ចែករំលែកព័តមាននេះ