រាជធានីភ្នំពេញ ៖ តបតាមការអញ្ជើញរបស់នាយករដ្ឋមន្រ្តីនៃសាធារណរដ្ឋអាស៊ែបៃហ្សង់ និង សាធារណរដ្ឋបេឡារុស នៅព្រឹកថ្ងៃទី២០ មេសា ២០១៤ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញដឹកនំាគណៈប្រតិភូរាជរដ្ឋាភិបាល អញ្ជើញទៅបំពេញទស្សនកិច្ចផ្លូវការនៅសាធារណរដ្ឋអាស៊ែបៃហ្សង់ និង សាធារណរដ្ឋបេឡារុស ។
យោងតាមសេចក្តីជូនព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិបានបញ្ជាក់ឲ្យដឹងថា អំឡុងពេលទស្សនកិច្ចនៅសាធារណរដ្ឋអាស៊ែបៃហ្សង់ ពីថ្ងៃទី២១ ដល់ថ្ងៃទី២៣ មេសា សម្តេចតេជោ ហ៊ុន សែន នឹងជួបសម្តែងការគួរសមជាមួយលោក អ៊ីលហាម អាលីយេវ ប្រធានាធិបតីនៃសាធារណរដ្ឋអាស៊ែបៃហ្សង់ លោក អុកតៃ អាសាដូវ ប្រធានរដ្ឋសភា នឹងជួបពិភាក្សាទ្វេភាគីជាមួយលោក អាធ័រ រ៉ាស៊ី ហ្សាដ នាយករដ្ឋមន្រ្តីនៃសាធារណរដ្ឋអាស៊ែបៃហ្សង់ ។ បន្ទាប់មកនឹងមានការចុះហត្ថលេខាលើអនុស្សរណៈនៃការយោគយល់គ្នា ស្តីពីការបង្កើតកិច្ចពិគ្រោះយោបល់ទ្វេភាគី ។
ដោយឡែកនៅសាធារណរដ្ឋបេឡារុស ពីថ្ងៃទី២៣ ដល់ថ្ងៃទី២៥ មេសា សម្តេចតេជោ ហ៊ុន សែន នឹងជួបសម្តែងការគួរសមជាមួយលោក អាឡិចសាន់ឌ័រ លូកាសិនកូ ប្រធានាធិបតីនៃសាធារណរដ្ឋបេឡារុស លោក អាន់ណាតូលី រូប៊ីននូវ ប្រធានក្រុមប្រឹក្សារដ្ឋសភាជាតិ និងជួបពិភាក្សាទ្វេភាគីជាមួយលោក មីខាយ មីយ៉ាស កូវិច នាយករដ្ឋមន្រ្តីនៃសាធារណរដ្ឋបេឡារុស ។
សេចក្តីជូនព័ត៌មានដដែលក៏បានបញ្ជាក់បន្ថែមទៀតថា អំឡុងពេលទស្សនកិច្ចនៅសាធារណរដ្ឋបេឡារុសនោះដែរ នាយករដ្ឋមន្រ្តីនៃប្រទេសទំាងពីរនឹងធ្វើជាសាក្សីក្នុងពិធីចុះហត្ថលេខាលើឯកសារចំនួន០៩ រួមមាន៖
០១-កិច្ចព្រមព្រៀងរវាងក្រសួងសុខាភិបាលនៃប្រទេសទំាងពីរ ស្តីពីកិច្ចសហប្រតិបត្តិការលើវិស័យសុខភាពសាធារណៈ ។
០២-កិច្ចព្រមព្រៀងសហប្រតិបត្តិការរវាងក្រសួងឧស្សាហកម្មនិងសិប្បកម្មកម្ពុជា និងក្រសួងឧស្សាហកម្មបេឡារុស ។
០៣-កិច្ចព្រមព្រៀងសហប្រតិបត្តិការរវាងក្រសួងរ៉ែ និងឋាមពលកម្ពុជា និងក្រសួងឧស្សាហកម្មបេឡារុស ។
០៤-កិច្ចព្រមព្រៀង ស្តីពីកិច្ចសហប្រតិបត្តិការពាណិជ្ជកម្ម និង សេដ្ឋកិច្ច ។
០៥-កិច្ចព្រមព្រៀង ស្តីពីការជំរុញនិងការការពារ ការវិនិយោគទៅវិញទៅមក ។
០៦-កិច្ចព្រមព្រៀង ស្តីពីកិច្ចសហប្រតិបត្តិការបច្ចេកទេសយោធា ។
០៧-អនុស្សរណៈនៃការយោគយល់គ្នាស្តីពីការបង្កើតទំនាក់ទំនងមិត្តភាព និង កិច្ចសហប្រតិបត្តិការរវាងរាជធានីភ្នំពេញ និង ទីក្រុងមិណស្ត៏ ។
០៨-អនុស្សរណៈនៃការយោគយល់គ្នារវាងធនាគារជាតិនៃប្រទេសទំាងពីរ ។
០៩-អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យកសិកម្ម ៕
ចែករំលែកព័តមាននេះ