ខេត្តកំពង់ឆ្នាំង ៖ សង្ឃ១អង្គបាននិមន្តរត់ចេញពីវត្ត បន្ទាប់ពីខ្ទាស់ទ្វារបន្ទប់ទឹកបង្ខាំងស្រីស្នេហ៍វ័យក្មេង ក្រោយពេលមានទំនាស់គ្នាពីរឿងស្នេហ៍ខុសតម្រា កាលពីវេលាម៉ោង២ និង៣០នាទីរសៀល ថ្ងៃទី៧ មករា ២០១៤ នៅបន្ទប់ទឹកក្នុងកុដិមួយស្ថិតក្នុងវត្តទេពធីតារាម ហៅវត្តយាយទេព ភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង តែរឿងរ៉ាវខាងលើនេះទើបបែកធ្លាយនៅព្រឹកថ្ងៃទី៩ មករា នេះ បន្ទាប់ពីនារីជាស្រីស្នេហ៍បានដាក់ពាក្យបណ្តឹងនៅនគរបាលក្រុងកំពង់ឆ្នាំង ហើយត្រូវបានមន្ត្រីនគរបាលទៅកាត់សោកុដិ និងសោបន្ទប់ទឹកដើម្បីពិនិត្យ។
ក្នុងបណ្តឹងនារីរងគ្រោះអាយុ២១ឆ្នាំ ដែលមានទីលំនៅក្នុងក្រុងកំពង់ឆ្នាំងបានឱ្យដឹងថា នាងបានស្រឡាញ់គ្នាជាមួយព្រះសង្ឃនាម ភន ធារី ព្រះជន្ម២៣វស្សា តាំងពីឆ្នាំ២០០៩មកម្ល៉េះ ប៉ុន្តែពួកនាងមិនដែលធ្វើអ្វីខុសប្រពៃណីនោះទេ ។ រហូតដល់ឆ្នាំ២០១០ មានយប់មួយព្រះសង្ឃអង្គនោះបានណាត់នាងឱ្យទៅជួប ហើយបាននាំនាងឡើងទៅលើអគារក្នុងវត្តជាន់ទី២ និងបានចាប់នាងរំលោភបានសម្រេច។ ពេលនោះលោកបានគំរាមថា កុំប្រាប់នរណាឱ្យសោះ បើហ៊ានប្រាប់គេនឹងអារ.កសម្លាប់ចោល ក្រោយពីពេលនោះមកបានប្រហែល៣ខែ លោកសង្ឃអង្គនោះបានទូរស៧ព្ទហៅនាងឱ្យទៅជួបនាងទៀត ហើយក៏បានចាប់រំលោភបានសម្រេចម្តងទៀត និងចាប់ពីពេលនោះមកមិនដែលបានធ្វើអ្វីទៀតទេ តែបានទាក់ទងគ្នាតាមទូរស័ព្ទក្នុងអត្ថន័យស្នេហារហូតមក ដោយសង្ឃអង្គនោះបានសន្យាថានឹងសឹកមកដណ្តឹងនាងតាមផ្លូវច្បាប់។
ប្រភពដដែលបន្តថា នៅថ្ងៃទី៥ មករា ២០១៤នេះ លោកសង្ឃនាម ភន ធារី បានឱ្យនាងមកជួប ហើយបានសុំដកទូរស័ព្ទនាងទុកឆែកលេខមើលក្រែងមានប្រុសស្នេហ៍ឯណាផ្សេងក្រៅពីលោកនាងក៏ព្រមទុកឱ្យ លុះដល់ថ្ងៃទី៦ មករា ម៉ោងប្រហែល២ជាង នាងបានទៅទារយកទូរស័ព្ទរបស់នាងវិញ លោកប្រាប់ថា ទូរស័ព្ទនៅក្នុងកុដិចូលទៅយកទៅ ពេលនោះលោកបានទាញទ្វារចាក់សោកុដិជាប់ទុកនាងនៅក្នុងកុដិ ហើយបង្ខំនាងរំលោភបានសម្រេច។ ក្រោយពេលរំលោភរួចហើយលោកសង្ឃនោះមិនបានឱ្យនាងត្រឡប់មកផ្ទះវិញទេ ដោយចាក់សោបង្ខាំងនាងមួយយប់ទល់ភ្លឺថ្ងៃទី៧ មករា ។ លុះម៉ោងជាង៩ព្រឹក ព្រះសង្ឃនោះមិនទាន់បានដោះលែងនាងឱ្យមកផ្ទះវិញទៀតដោយបានយកបាយទៅឱ្យនាងហូប តែនាងមិនហូប ហើយបានជជែកគ្នាពីរឿងសន្យាថា សឹកទៅដណ្តឹងនាងតាមច្បាប់ តែការសន្យាបានត្រឹមតែបបូរមាត់រយៈពេលជាច្រើនឆ្នាំមកហើយដោយសារតែការជជែកគ្នាមិនចុះសម្រុងពីរឿងចូលស្តីដណ្តឹងរៀបការតាមផ្លូវច្បាប់នេះមិនច្បាស់លាស់ទើបមានការទាស់សំដីគ្នា។
រហូតដល់ម៉ោងជាង២រសៀល ថ្ងៃទី៧ មករា នាងប្រាប់ថា ឈឺបត់ជើងទើបលោកសង្ឃនោះព្រមបើកទ្វារកុដិឱ្យនាងចេញមកបត់ជើងក្នុងបន្ទប់ទឹក ប៉ុន្តែអ្វីដែលស្មានមិនដល់នោះពេលនាងចូលក្នុងបន្ទប់ទឹកស្រាប់តែសង្ឃអង្គនោះបានយកសោមកខ្ទាស់ទ្វារពីក្រៅមិនឱ្យនាងចេញ ហើយសង្ឃអង្គនោះគេចខ្លួនបាត់តែម្តង។ នាងបញ្ជាក់ថា នាងជាប់ក្នុងបន្ទប់ទឹកនើជាងកន្លះម៉ោង ដោយស្រែកហៅឱ្យគេជួយតែគ្មានអ្នកណាឮទេ ក្រោយមកមានឈ្មោះធារ៉ាជាកូនសិស្សលោក និងជាគ្រូបង្រៀនបានឮ ហើយបានមកដោះសោទ្វារបន្ទប់ទឹកទើបនាងបានចេញមកវិញ ហើយបានរត់ទៅផ្ទះ និងបានប្រាប់ដល់ក្រុមគ្រួសារដាក់ពាក្យបណ្តឹងសង្ឃអង្គនោះពីបទរំលោភ និងបង្ខាំងមនុស្សខុសច្បាប់៕
ចែករំលែកព័តមាននេះ