រាជធានីភ្នំពេញ ៖ ជនសង្ស័យម្នាក់ក្នុងចំណោម២នាក់ត្រូវសមត្ថកិច្ចកងរាជអាវុធហត្ថខណ្ឌទួលគោកដេញចាប់បានកាលពីវេលាម៉ោង៩ព្រឹក ថ្ងៃទី២ តុលា ២០១៣ នៅចំណុចស្តុបទួលគោក បន្ទាប់ពីពួកគេធ្វើសកម្មភាពឆក់កាបូបពីនារីម្នាក់បានសម្រេចនៅចំណុចមុខវិទ្យាស្ថានស៊ីតិច ផ្លូវលេខ២៥៩ កែងមហាវិថីសហព័ន្ធរុស្ស៊ី សង្កាត់ទឹកល្អក់ទី១ ខណ្ឌទួលគោក ហើយជិះម៉ូតូរត់គេចខ្លួនទៅបុកដើមឈើ។
ជនសង្ស័យដែលចាប់ខ្លួនបានឈ្មោះសោ តារា ភេទប្រុស អាយុ២៨ឆ្នាំ ស្នាក់នៅផ្ទះជួលម្តុំវត្តនាគវ័ន ស្ថិតក្នុងសង្កាត់ផ្សារដេប៉ូទី៣ ផ្លូវរទេះភ្លើង ចំណែកនារីរងគ្រោះឈ្មោះមាន ស្រីនោ អាយុ២៣ឆ្នាំ ជាបុគ្គលិកក្រុមហ៊ុនធានារ៉ាប់រង រស់នៅផុ្ទះលេខN៦ ផ្លូវលេខ៩៣ ភូមិទួលសង្កែ សង្កាត់ទួលសង្កែ។
តាមប្រភពបានឱ្យដឹងថា មុនពេលកើតហេតុ ខណៈនារីរងគ្រោះកំពុងអង្គុយលើម៉ូតូនិយាយគ្នាលេងជាមួយមិត្តភក្តិ ស្រាប់តែជនសង្ស័យ២នាក់ជិះម៉ូតូម៉ាកឌ្រីមសេ១២៥ មួយគ្រឿង អត់ស្លាកលេខមកក្បែរធ្វើសកម្មភាពឆក់កាបូបរបស់នាង រួចរត់គេចខ្លួន ខណៈនោះនារីរងគ្រោះបានជិះម៉ូតូដេញតាម និងស្រែកចោរៗឮដល់សមត្ថកិច្ចកងរាជអាវុធហត្ថខណ្ឌទួលគោកក៏បានដេញតាមចាប់ជនសង្ស័យរហូតមកដល់ចំណុចស្តុបទួលគោកស្ទះចរាចរណ៍ពេក ជនសង្ស័យក៏បើកឡើងចិញ្ចើមផ្លូវទៅបុកដើមឈើបណ្តាលឱ្យដួលម៉ូតូ ក៏ទុកម៉ូតូចោលរួចនាំគ្នារត់គេចខ្លួន តែត្រូវសមត្ថកិច្ចដេញចាប់បានម្នាក់តែម្តង។
ក្នុងកាបូបដែលជនសង្ស័យឆក់នោះមានលុយចំនួន១៥៨ដុល្លារ និងទូរស័ព្ទដៃម៉ាកណូគៀ១គ្រឿង៕
ចែករំលែកព័តមាននេះ