ខេត្តព្រះសីហនុ ៖ ស្រ្តីវ័យកណ្តាលម្នាក់ដែលតែងតែធ្វើសកម្មភាពលូកហោប៉ៅប្រជាពលរដ្ឋតាមទីសាធារណៈបានត្រូវក្រុមអាជីវករផ្សារឃ្លាំងលើ ក្រុងព្រះសីហនុ ឃាត់ខ្លួនបញ្ជូនទៅឱ្យប៉ូលិស កាលពីវេលាម៉ោង៨និង៥០នាទីព្រឹកថ្ងៃទី៨ កញ្ញា បន្ទាប់ពីស្ត្រីរូបនេះធ្វើសកម្មភាពលូកហោប៉ៅប្រជាពលរដ្ឋក្នុងផ្សារឃ្លាំងលើស្ថិតក្នុងភូមិ១ សង្កាត់លេខ១ ក្រុងព្រះសីហនុ ។
លោកវរសេនីយ៍ត្រី ភុល ភ័ស្តា អធិការនគរបាលក្រុងព្រះសីហនុបានឱ្យដឹងថា នៅថ្ងៃទី៨ កញ្ញា វេលាមោ៉ង៨និង៥០នាទីព្រឹក នៅក្នុងផ្សារឃ្លាំងលើ មានករណីលួចលុយរបស់ឈ្មោះ លី គឹមស៊ាង អាយុ៦០ឆ្នាំ មានទីលំនៅក្រុមទី១០ ភូមិ១ សង្កាត់លេខ១ ក្រុងព្រះសីហនុ ។
ជនសង្ស័យឈ្មោះ ញែ៉ត ងែ៉ត ភេទស្រី អាយុ២៣ឆ្នាំ ស្នាក់នៅក្រុមទី១ សង្កាត់លេខ៣ ក្រុងព្រះសីហនុ បានធ្វើសកម្មភាពលួចលុយរបស់ជនរងគ្រោះដែលទុកក្នុងហោបៅអាវចំនួន១១០ដុល្លារ និង៥០.០០០រៀល ក្នុងខណៈពេលជនរងគ្រោះដើរចូលទៅក្នុងផ្សារឃ្លាំងលើរកទិញចេកថ្វាយលោកយាយម៉ៅ តែដោយជនរងគ្រោះដឹងទាន់ក៏ស្រែកឆោឡោឡើង ហើយចាប់បានជនសង្ស័យតែម្តង ។ជនសង្ស័យត្រូវបាននគរបាលកសាងសំណុំរឿងបញ្ជូនទៅកាន់សាលាដំបូងខេត្ត ៕
ចែករំលែកព័តមាននេះ