រាជធានីភ្នំពេញ ៖ វិទ្យាស្ថានបារាំងនៃកម្ពុជាបានរៀបចំការតាំងពិព័រណ៍ស្តីពីមនុស្ស និងធម្មជាតិ របស់លោក នូ សារី ដែលជាវិចិត្រករខ្មែរធ្លាប់មានស្នាដៃជាច្រើន ។ ការតាំងពិព័រណ៍នេះចាប់ផ្តើមពីថ្ងៃទី២៧ មិថុនា ដល់ថៃ្ងទី៣១ សីហា ឆ្នាំ២០១៣ ។
យោងតាមសេចក្តីប្រកាសព័ត៌មានឲ្យដឹងថា លោក នូ សារី កើតនៅប្រទេសកម្ពុជាក្នុងឆ្នាំ១៩៧១ ហើយលោកមិនបានកំណត់ព្រំដែនរបស់ខ្លួនឱ្យរៀនជំនាញតែមួយនោះទេ ។
លោកធើ្វការលើផ្ទាំងគំនូរ រូបថត ចម្លាក់ គំនូរ និងការដំឡើង ។ កុមារភាពរបស់លោក នូ សារីបានដិតដាមយ៉ាងជ្រៅដោយស្នាមរបួសដែលបង្កឡើងដោយរបបខ្មែរក្រហម ។ បន្ទាប់ពីសង្រ្គាម លោកសារី រស់នៅរយៈពេលពីរឆ្នាំតាមចិញ្ចើមផ្លូវ មុននឹងត្រូវបានទទួលចិញ្ចឹមក្នុងមណ្ឌលកុមារកំព្រាមួយ ។ ឆ្នាំ២០០៥ នៅវាំងសែន ប្រទេសបារាំង លោក នូ សារី បានចូលរួមតាំងពិព័រណ៍មានឈ្មោះថា« Le Salon 2005» ។ ស្នាដៃរបស់លោក នូ សារី ត្រូវបានជាប់ជាជម្រើសលើ៦នាក់ ជាជនជាតិខ្មែរដូចគ្នា និងបានទទួលចំណាត់ថ្នាក់លេខ៣ «មេដាយសំរឹទ្ធិ» ក្នុងចំណោម២៤ប្រទេសនៅគ្រានោះ ។
លោក នូ សារី ក៏បានទទួលសញ្ញាបត្រពីសាកលវិទ្យាល័យភូមិន្ទវិចិត្រសិល្បៈនៅភ្នំពេញ និងនៅសាលាជាន់ខ្ពស់វិចិត្រសិល្បៈនិងច្នៃម៉ូដសាំងអេជែន ប្រទេសបារាំង ។ លោក នូ សារី ធ្លាប់បានផ្ទេរចំណេះដឹងរបស់ខ្លួនឱ្យទៅអ្នកដទៃទៀតតាមរយៈរោងជាងរបស់លោក ។
សម្រាប់លោកនូ សារី មនុស្សនិងធម្មជាតិមិនអាចបំបែកពីគ្នាបានឡើយ ហើយបង្កើតបានជារង្វង់គុណធម៌មួយ ។ មនុស្សរស់នៅបានដោយសារផ្លែផ្កានៃធម្មជាតិ ហើយនៅពេលអស់ជីវិតទៅរាងកាយដែលរលួយក៏ក្លាយទៅជាប្រភពថាមពលសម្រាប់ផែនដី ។ ការផ្តល់និងការផ្គត់ផ្គង់អ្នកដទៃគឺជាសញ្ញាណស្នូលរបស់លោកនូ សារី ។ មនោសញ្ចេតនានេះកើតចេញពីស្នាមរបួសបង្កឡើងដោយការស្លាប់ដោយអត់ឃ្លានរបស់ឪពុកលោកកាលពីសម័យខែ្មរក្រហម ។
រូបថត និងរូបគំនូររបស់លោក នូ សារី បើកកកាយនូវតម្លៃនៃចំណងផៃ្ទក្នុងដែលតែងតែកើតមានរវាងមនុស្ស និងធម្មជាតិ ។ បំណែករំលាយបញ្ចូលគ្នានៃរុក្ខជាតិបានរំលេចឡើងមើលឃើញនៅលើស្រទាប់ខាងក្រៅនៃស្នាដៃទាំងពីរប្រភេទនេះ ។ ឥរិយាបទមួយចំនួនបានទាញចេញពីរបាំក្បាច់បុរាណខ្មែរដែលសិល្បកររូបនេះធ្លាប់បានរៀនក្នុងកុមារភាពរបស់លោក ៕
ចែករំលែកព័តមាននេះ