រាជធានីភ្នំពេញ ៖ សង្វៀន CTN ថ្ងៃអាទិត្យ ទី២៦ ឧសភាសប្តាហ៍នេះ ប្រមូលមូលផ្តុំដោយកីឡាករជើងខ្លាំងជាច្រើនគូ ក្នុងនោះកីឡាករផាវ ភឿត មកពីក្លិបកងពលធំអន្តរាគមន៍លេខ៣ ព្រះវិហារ ត្រូវបានគណៈកម្មការរៀបចំកម្មវិធីប្រដាល់ធ្វើការផ្គូផ្គងឱ្យជួបប្រកួតជាមួយកីឡាករនន់ ជំនិត មកពីមជ្ឈមណ្ឌលសកម្មភាពកម្ចាត់មីនកម្ពុជា (CMAC) ។
រវាងគូនេះសុទ្ធតែជាអ្នកប្រដាល់ចាស់វស្សាដូចគ្នា ប៉ុន្តែពួកគេមិនធ្លាប់ជួបគ្នាពីមុនមកទេ ហើយបើនិយាយពីល្បិចប្រយុទ្ធនៅលើសង្វៀនវិញនោះ គឺមានភាពខុសគ្នាបន្តិចបន្តួចប៉ុណ្ណោះ ។ ផាវ ភឿត វាយអាងកម្លាំងបាយមិនចេះប្រើស្នៀតកែង និងជង្គង់ឡើយ តែបើស្នៀតកណ្តាប់ដៃនិងស្នៀតជើងវិញ គេពូកែខ្លាំងណាស់ ពេលខ្លះបើសិនជាគូប្រកួតធ្វើឱ្យគេខឹង គឺគេដើរចូលវាយទាំងកំរោលមិនខ្ចីដកថយឡើយ ប៉ុន្តែមួយរយៈមកនេះកម្លាំងរបស់គេហាក់ស្រុតចុះជាងមុនបន្តិច ។
រីឯ នន់ ជំនិត វិញនោះត្រូវគេទទួលស្គាល់ថា ជាជើងខ្លាំងមួយរូបដែលមានស្នៀតកែង និងជង្គង់ល្អ ។ មួយរយៈមកនេះក្បាច់គុនរបស់គេមិនខ្លាំងដូចមុនទៀតឡើយ ឯកម្លាំងក៏ចុះខ្សោយជាងមុន ប៉ុន្តែចិត្តរបស់គេសឿងគួរសម មិនចេះកោតញញើតនរណាម្នាក់ផ្តាសឡើយ ។ ទោះជាយ៉ាងណា រវាងគូនេះគ្មាននរណាហ៊ានទស្សន៍ទាយលទ្ធផលទុកមុនទេ គ្រាន់តែគេដឹងថាមុននឹងចាញ់-ឈ្នះគ្នាច្បាស់ជាបែកផ្កាភ្លើងពេញសង្វៀនមិនខាន ។
នៅលើសង្វៀនដដែលក្រៅពីគូចាប់អារម្មណ៍នេះទៅ នៅមានការប្រកួតរវាងកីឡាករធិន សុវណ្ណ មកពីក្លិបកងពលតូចលេខ៧០ និងកីឡាករខុន ស៊ីចន មកពីក្លិបកងពលធំអន្តរាគមន៍លេខ៣ ព្រះវិហារ ។
កីឡាករឡុង ឡាំដា មកពីក្លិបសាលវ័ន្តកីឡា ប្រកួតជាមួយកីឡាករវី សាវុធ មកពីក្លិបឥន្ទ្រីកីឡាបង្ក្រាបគ្រឿងញៀនខេត្តកណ្តាល ។ កីឡាករហែល វ៉ា មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតជាមួយកីឡាករម៉ន ចាន់ដារ៉ា មកពីក្លិបវិស្វកម្មបច្ចេកទេសទ័ពជើងគោកព្រែកឯង ។ កីឡាករសេន វណ្ណេត មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករអៀង ចាន់លក្ខណ៍ មកពីក្លិបទីបញ្ជាការកងទ័ពជើងគោក ។ កីឡាករវង្ស វិច្ឆិកា មកពីក្លិបយុវជនអង្គរ ប្រកួតជាមួយកីឡាករមាស វុត្ថា មកពីក្លិបយុវកីឡាខេត្តកណ្តាល និងកីឡាករឆន ចាន់នី មកពីក្លិបរស្មីភូមិគាបខេត្តបន្ទាយមានជ័យ ប្រកួតជាមួយកីឡាករហឹុម សេរី មកពីក្លិបតាព្រហ្មមានជ័យបង្ក្រាបគ្រឿងញៀន ៕
ចែករំលែកព័តមាននេះ