ខេត្តបន្ទាយមានជ័យ ៖ ហេតុការណ៍ដ៏គួរឲ្យភ្ញាក់ផ្អើលមួយដែលមានមនុស្សកកកុញនាំគ្នាឈរមើលបង្កឲ្យរាំងស្ទះចរាចរណ៍ ដោយមានបុរសម្នាក់បានរត់តោងរថយន្តបណ្តាលឲ្យរបូតដៃធ្លាក់ត្រូវកង់រថយន្តខាងក្រោយផ្នែកខាងឆ្វេងជាន់កិនខ្ទេចមួយកំណាត់ខ្លួនស្លាប់ភ្លាមៗនៅនឹងកន្លែងគួរឲ្យរន្ធត់ ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង៥ និង៥០នាទីល្ងាចថ្ងៃទី២៣ មេសា ២០១៣ នៅលើផ្លូវជាតិលេខ៦ មុខស្ថានីយប្រេងឥន្ធនៈសូគីម៉ិច ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ។ មន្ត្រីនគរបាលចរាចរខេត្តឲ្យដឹងថា បុរសដែលស្លាប់ត្រូវបានគេស្គាល់ឈ្មោះម៉ម ភឿន អាយុ៣៦ឆ្នាំ ជាកម្មករ មានទីលំនៅភូមិខ្លាឃ្មុំ ឃុំកំពង់ធំ ស្រុកជីក្រែង ខេត្តសៀមរាប ។
ចំណែករថយន្តបង្កម៉ាកហ៊ីយ៉ាន់ដាយ ពណ៌សលាយខៀវ ដឹកគោពីរមកពីខាងខេត្តសៀមរាប ទៅលក់នៅប្រទេសវៀតណាម បើកដោយឈ្មោះភាព ភេទប្រុស អាយុ៣៦ឆ្នាំ នៅភូមិបឹងបី ឃុំមោង ស្រុកមោង ខេត្តសៀមរាប ក្រោយពីកើតហេតុបានរត់គេចខ្លួនបាត់បន្សល់ទុកតែរថយន្តនៅក្បែរកន្លែងកើតហេតុ ៕
ចែករំលែកព័តមាននេះ