រាជធានីភ្នំពេញ ៖ តារាចម្រៀងវ័យក្មេងសំឡេងចាស់ប្រចាំផលិតកម្មហង្សមាសបានចេញមកប្រតិកម្មជំនួសអ្នកសិល្បៈដូចគ្នាជុំវិញការរិះគន់ចេញពីមហាជនមួយចំនួនដែលបានលើកឡើងថា ក្រុមតារាទាំងនោះបានធ្វើពុតជាយំនៅក្នុងព្រះរាជពិធីដង្ហែព្រះបរមសព ព្រះបរមរតនកោដ្ឋ ដើម្បីទាមទារការចាប់អារម្មណ៍ពីមហាជនតែប៉ុណ្ណោះ ។
ម្ចាស់បទសង្សារលេងៗស្រលាញ់គ្នាមែនទែនរូបនេះបានប្រើប្រាស់បណ្តាញសង្គមដ៏ពេញនិយមរបស់ខ្លួនផ្ញើសារមួយឆ្លើយតបចំពោះបញ្ហាខាងលើនេះដោយលោកបានចាត់ទុកមតិដែលបានលើកឡើងនោះជាគំនិតអគតិមិនសមទំនង។
លោកបានសរសេរនៅតាមបណ្តាញហ្វេសប៊ុករបស់ខ្លួនថា ហេតុអ្វីក៏កូនខ្មែរមួយចំនួនចេះតែរិះរកគំនិតជាន់ឈ្លីខ្មែរដូចគ្នាអ៊ីចឹង? មិនយល់? ចាប់តាំងពីថ្ងៃទៅទទួលព្រះរាជសពព្រះករុណាយាងមក រហូតដល់ថ្ងៃថ្វាយព្រះភ្លើងមិនថាតែពួកយើងជាតារា ឬប្រជាជនទូទាំងប្រទេសម្នាក់ៗសុទ្ធតែខ្លោចផ្សាក្នុងចិត្ត ព្រោះតែការបាត់បង់ដ៏ធំធេង គ្មានថ្ងៃវិលវិញនោះ គឺការយាងចូលទិវង្គតរបស់ព្រះវររាជបិតាដ៏ឆ្នើមរបស់យើង។ មហាទុក្ខសោកដ៏ធំធេង ការសោកស្តាយរកទីបំផុតគ្មាននេះ បានចាក់ដោតទៅដល់ក្រអៅបេះដូងរបស់យើងជាកូនខ្មែរគ្រប់រូបឲ្យទប់ទឹកភ្នែកថាមិនឲ្យហូរមកបានទេ ។ រហូតមានបងប្អូនខ្មែរ១ចំនួនព្រមស្ម័គ្រចិត្ត កោរសក់ថ្វាយការគោរពដ៏ខ្ពង់ខ្ពស់ដល់ទ្រង់ ហេតុអីក៏ពួកអគតិសណ្តានញុះញង់១ចំនួន បែរជាយល់ថា ការសោកស្តាយសម្រក់ទឹកភ្នែករបស់កូនខ្មែរដូចគ្នាដែលជាតារា គឺជាការសម្តែងទាមទារភាពល្បី ៕
ចែករំលែកព័តមាននេះ