រាជធានីភ្នំពេញ ៖ បុរសម្នាក់បានរងរបួសដោយត្រូវក្រុមចោរប្រដាប់អាវុធបាញ់៥គ្រាប់តែត្រូវ២គ្រាប់ប្លន់យកម៉ូតូសេ១២៥ ស៊េរីឆ្នាំ២០១៣ នៅមុខផ្ទះម៉ាស្សាយីហោ«អញ្ជលីស្ប៉ា»នៅតាមបណ្តោយផ្លូវលេខ៣១០ ស្ថិតក្នុងសង្កាត់បឹងកេងកងទី១ ខណ្ឌចំការមន កាលពីវេលាម៉ោង១១និង៣០នាទីយប់ថ្ងៃទី២៥ ធ្នូ យកម៉ូតូជិះចេញទៅដោយសុវត្ថិភាព ។
បុរសរងគ្រោះឈ្មោះចិន សុធា អាយុ៣២ឆ្នាំ មានទីលំនៅក្នុងសង្កាត់ចាក់អង្រែលើ ខណ្ឌមានជ័យ ។ មុនពេលកើតមានអំពើប្លន់នេះ លោកចិន សុធា បានជិះម៉ូតូសេ១២៥ ស៊េរីឆ្នាំ២០១៣ ពណ៌ខ្មៅ មកទទួលភរិយាដែលធ្វើការនៅក្នុងហាងម៉ាស្សាយីហោ«អញ្ជលីស្ប៉ា» ទៅស្រស់ស្រូបអាហារនៅខាងក្រៅ ។ លុះពេលជូនប្រពន្ធត្រឡប់មកវិញដល់មុខហាងក៏ឈប់ម៉ូតូ ដាក់ប្រពន្ធឱ្យចុះ តែមិនទាន់ទាំងចុះស្រួលបួលផង ស្រាប់តែលេចមុខជន២នាក់ស្លៀកពាក់ស៊ីវិល ហើយមានពាក់មួកសុវត្ថិភាពស្អាតបាត ជិះម៉ូតូពីក្រោយមកដល់ដកកាំភ្លើងខ្លីភ្ជង់ រួចបាញ់ទៅលើឈ្មោះចិន សុធា ចំនួន៤គ្រាប់ បណ្តាលឱ្យរងរបួសចំភ្លៅខាងឆ្វេង១គ្រាប់ និងចំពងស្វាសខាងឆ្វេងមួយគ្រាប់របួសធ្ងន់ ហើយក្រុមចោរដណ្តើមយកម៉ូតូពីជនរងគ្រោះជិះចេញទៅបាត់ស្រមោល ។
ក្រោយពេលកើតហេតុ ស្ត្រីជាប្រពន្ធបានលើកប្តីដែលរងគ្រោះចូលគ្លីនិកមេគង្គដែលមានទីតាំងនៅជាប់គ្នានោះដើម្បីសង្គ្រោះ ប៉ុន្តែដោយសារស្ថានភាពរបួសធ្ងន់ពេក ក្រុមគ្រូពេទ្យ និងក្រុមគ្រួសារសម្រេចបញ្ជូនទៅសង្គ្រោះបន្តនៅមន្ទីរពេទ្យមិត្តភាពខ្មែរ-សូវៀត ។
ជុំវិញហេតុការណ៍ខាងលើនេះ សមត្ថកិច្ចមូលដ្ឋានបានចុះទៅពិនិត្យទិដ្ឋភាពកន្លែងកើតហេតុ រើសបានសំបកគ្រាប់ចំនួន៤ និងគ្រាប់កាំភ្លើងម៉ាកកា៥៤មួយគ្រាប់ មិនទាន់ផ្ទុះ ។ តាមការសន្និដ្ឋានថា គឺក្រុមចោរប្លន់បាញ់មកលើជនរងគ្រោះចំនួន៥គ្រាប់ ប៉ុន្តែត្រូវ២គ្រាប់ ខុស២គ្រាប់ និងបាញ់មិនផ្ទុះមួយគ្រាប់ ។
ប្រភពច្បាស់ការណ៍ឱ្យដឹងថា ក្រោយពេលចោរប្លន់ចេញផុតទៅសមត្ថកិច្ចក្នុងរាជធានីបានប្រកូកប្រកាសតាមវិទ្យុទាក់ទងលាន់ទ្រហឹងឱ្យជួយស្ទាក់ចាប់ចោរប្លន់ ។ ប៉ូលិសគ្រប់គោលដៅបានពួនស្ទាក់គ្រប់ផ្លូវគ្រាប់តំបន់ទាំងអស់ ប៉ុន្តែរកចោរប្លន់មិនឃើញឡើយ ។ ចោរប្លន់ហាក់ដូចជាមានប្រៀបឈ្នះជាងសមត្ថកិច្ច ។
មានការកត់សម្គាល់ថា កាលពីសប្តាហ៍ទី៣ នៃខែធ្នូ ឆ្នាំ២០១២ នេះ សមត្ថកិច្ចបង្ក្រាបមុខសញ្ញាប្លន់ប្រដាប់អាវុធបានចំនួន២ក្រុមធំៗ ប៉ុន្តែទោះជាយ៉ាងនេះក្តីក៏បទល្មើសនេះនៅតែមានការកើតឡើងគួរឱ្យព្រួយបារម្ភដដែល ។
បាញ់1គ្រាប់ប្លន់ម៉ូតូម៉ាកស្គូពីនៅសង្កាត់ទឹកល្អក់ទី2បានដោយសុវត្ថិភាព
អំពើប្លន់១ទៀត ស្រ្តី២នាក់បងប្អូនបានត្រូវក្រុមចោរ២នាក់ជិះម៉ូតូម៉ាកអាយខនមួយគ្រឿងប្រដាប់ដោយកាំភ្លើងខ្លី ធ្វើសកម្មភាពភ្ជង់ និងបាញ់គំរាម១គ្រាប់ប្លន់យកម៉ូតូម៉ាកស្គូពីពណ៌សមួយគ្រឿងបានសម្រេច ហើយគេចខ្លួនទៅបាត់ ។ អំពើប្លន់នេះបានកើតឡើងកាលពីវេលាម៉ោង១១ និង៥០នាទីយប់ថ្ងៃទី២៣ ធ្នូ នៅចំណុចផ្ទះលេខ១៥៣ ផ្លូវលេខ១៤៦ ក្រុមទី៤១ ភូមិទី៤ សង្កាត់ទឹកល្អក់ទី២ ខណ្ឌទួលគោក នៅពេលដែលស្រ្តីទាំង២នាក់បងប្អូនជិះម៉ូតូទៅដល់មុខផ្ទះ ។ ទោះបីជាយ៉ាងណា ការផ្ទុះអាវុធនេះពុំបណ្ដាលឱ្យមនុស្សរងរបួសឡើយ ។
ស្រ្តីជាម្ចាស់ម៉ូតូដែលត្រូវចោរប្លន់នេះឈ្មោះវ៉ាន់ វណ្ណៈ អាយុ២៨ឆ្នាំ មានស្រុកកំណើតនៅស្រុកត្បូងឃ្មុំ ខេត្តកំពង់ចាម បច្ចុប្បន្នស្នាក់នៅផ្ទះលេខ១៥៣ កន្លែងកើតហេតុខាងលើ ។ តាមព័ត៌មានឱ្យដឹងថា ក្រុមចោរប្លន់មានគ្នា២នាក់ប្រដាប់ដោយអាវុធខ្លីម៉ាករូឡូមួយដើមជិះម៉ូតូម៉ាកអាយខន ពណ៌បៃតង់មួយគ្រឿងបានធ្វើសកម្មភាពភ្ជង់ប្លន់យកម៉ូតូម៉ាកស្គូពី ពណ៌ស បាន សម្រេច និងបាញ់១គ្រប់គំរាមហើយគេចខ្លួនទៅបាត់ទោះជាយ៉ាងណាប៉ូលិសបានស្គាល់់អត្តសញ្ញាណ ហើយ ។
តាមព័ត៌មានឱ្យដឹងទៀតថា នៅយប់ថ្ងៃកើតហេតុស្រ្តីជាម្ចាស់ម៉ូតូបានជិះម៉ូតូម៉ាកស្គូពី ពណ៌សមួយគ្រឿងបានធ្វើដំណើរចេញពីផ្ទះទៅឌុបប្អូនស្រីចេញពីធ្វើការនិងនាំគ្នាដើរលេង ។ លុះនៅវេលាយប់ជ្រៅក៏នាំគ្នាទៅផឹកទឹកក្រឡុកនៅផ្សារដើមគរួចហើយត្រឡប់ទៅផ្ទះវិញ ។ នៅពេលធ្វើដំណើរទៅដល់ផ្ទះហើយឈប់ម៉ូតូ ស្រាប់តែមានជន២នាក់ជិះម៉ូតូម៉ាកអាយខនមួយគ្រឿងមកឈប់ពីមុខរួចដកកាំភ្លើងខ្លីដែលគេស្គាល់ថាម៉ាករ៉ូឡូភ្ជង់គំរាមប្លន់យកម៉ូតូហើយជិះគេចខ្លួនបានប្រមាណ៥ម៉ែត្រក៏បាញ់១គ្រាប់គំរាមរួចចេញបាត់ទៅ ។
បន្ទាប់មកស្រ្តីម្ចាស់ម៉ូតូបានទៅដាក់ពាក្យបណ្តឹងនៅប៉ុស្តិ៍ទើបប៉ូលិសដឹង តែចោរបានយកម៉ូតូជិះចេញបាត់ទៅហើយ ដែលពិបាកក្នុងការតាមហិតក្លិនរកណាស់ ។ ប្រការសំខាន់ គឺរកទីផ្សាររបស់ចោរឃើញ ទើបអាចកាត់បន្ថយចោរកម្មនេះបាន ៕
ចែករំលែកព័តមាននេះ