រាជធានីភ្នំពេញ ៖ នៅលើសង្វៀនប្រដាល់ស្ថានីយទូរទស្សន៍បាយ័នសំរាប់រសៀលថ្ងៃអាទិត្យ ទី២៩ សីហា ខាងមុខនេះ ឡុង សុផល មកពីក្លឹបកងពលតូចលេខ៧០ ត្រូវបានផ្គូផ្គងឱ្យជួបប្រកួតជាមួយ ម៊ី សុភាព មកពីក្លឹបព្រះខ័នរាជ ។ សុផល និងសុភាព មានប្រវត្តិប្រកួតយូរឆ្នាំមកហើយ ពួកគេសុទ្ធតែជាខ្លាចាស់ តែនៅអាចមានកំលាំងប្រយុទ្ធគ្នាបាន ។
សុផល មិនសូវមានបច្ចេកទេសប្រកួតល្អប៉ុន្មានទេ តែអ្នកប្រដាល់រូបនេះចូលចិត្តប្រើកំលាំងបុកមិនរាថយ រីឯសាច់របស់គេវ៉ៃមិនចេះឈឺទេ ដៃគូវ៉ៃត្រូវកាន់តែច្រើន គេដើរចូលកាន់តែខ្លាំង និងមិនធ្លាប់មានប្រវត្តិសន្លប់ឡើយ ។ ចំណែកម៊ី សុភាព ក៏មិនខុសពីសុផលប៉ុន្មានដែរ គឺមានមុខរឹង ស្បែកស្វិត ប៉ុន្តែទោះបីជាយ៉ាងណាក៏ដោយ បើប៉ះចំកែងទំនងជាមិនស្វិតប៉ុន្មានទេ ព្រោះជាញឹកញាប់ម្នាក់ៗមិនសូវចៀសផុតពីគ្រូពេទ្យដេរទេ ។ ការប្រកួតចុងក្រោយរបស់ សុភាព កាលពីថ្ងៃទី២២ សីហា កន្លងមកចាញ់ពិន្ទុអឹុម ដារា៉ មកពីក្លឹបក្រសួងការពារជាតិ ។ ពេលនេះសុភាព ត្រូវប៉ះជាមួយសុផល ដែលគេធ្លាប់ឱ្យរហស្សនាមថា សាច់ជ្រូក៣ជាន់ តើសុភាពអាចស៊ូបាន ឬអត់?
ជាតិ វណ្ណៈ មកពីក្លឹបបាក់ខែងកីឡាត្រូវប្រកួតជាមួយផល សោភ័ណ្ឌ មកពីក្លឹបតាឡីដំរីមានរិទ្ធ ។ បើប្រៀបធៀបរវាងសមត្ថភាពរបស់គូនេះ គេមើលឃើញសោភ័ណ្ឌ មានប្រៀប និងមានទំងន់ជាងវណ្ណៈ ។ មិនថាតែសមត្ថភាពទេ សូម្បីតែបទពិសោធន៍លើសង្វៀនក៏សោភ័ណ្ឌមានច្រើនជាងដែរ ។ ដូច្នេះគេអាចសន្និដ្ឋានបានថា សោភ័ណ្ឌជាអ្នកឈ្នះក្នុងការប្រកួតនេះ ។
ម៉ៃ សុខនឿន មកពីក្លឹបចក្រអង្រែលើ ត្រូវជួបប្រកួតជាមួយទឹម គឹមហុង មកពីក្លឹបសាលវ័ន្តកីឡា ។ ទាំងសុខនឿន និងគឹមហុង សុទ្ធតែជាអ្នកប្រដាល់ជើងថ្មីដែលឡើងសង្វៀនលើកដំបូងប៉ុណ្ណោះ។
ឯម សុភាព មកពីក្លឹបគ្រុឌមានជ័យ ត្រូវប្រកួតជាមួយអ៊ុង វិរៈ មកពីក្លឹបគុជសារកីឡា។ រីឯជុន សាវុធ មកពីក្លឹបអូដឹមកីឡាត្រូវប្រកួតជាមួយភិរម្យ រស្មី មកពីក្លឹបភិរម្យគុនខ្មែរ ។ ទាំងពីរគូនេះ ក៏ជាអ្នកប្រដាល់ស្រករក្រោយដែរ ប៉ុន្តែវិជ្ជាគុណរបស់គេមិនអន់ឡើយ ។
នៅមានការប្រកួតជាលក្ខណៈសាកលមួយគូទៀតរវាងអេ ភូថង មកពីក្លឹបក្រសួងការពារជាតិ ជាមួយអាត សំរិទ្ធ មកពីក្លឹបអារុណរះ៕
ចែករំលែកព័តមាននេះ