ខេត្តកណ្តាល ៖ សពស្ត្រីជនជាតិវៀតណាមម្នាក់ ត្រូវបានប្រទះឃើញនៅក្នុងត្រពាំងទឹកមួយ ស្ថិតក្នុងភូមិសំរោងក្អែ ឃុំសំរោងធំ ស្រុកកៀនស្វាយ កាលពីព្រឹកថ្ងៃទី២៦ សីហា ។ សពស្ត្រីរូបនេះមិនត្រូវបានគេស្គាល់អត្តសញ្ញាណឡើយ ហើយត្រូវបានសមត្ថកិច្ចនាំយកទៅតម្កល់ទុកនៅវត្តសំរោងក្អែ ដើម្បីរង់ចាំរកក្រុមគ្រួសារសពមកទទួលយកទៅធ្វើបុណ្យតាមទំនៀមទម្លាប់ ។
លោកប៉ា សំអិត អធិការនគរបាលស្រុកកៀនស្វាយ និងមន្ត្រីកងរាជអាវុធហត្ថស្រុកកៀនស្វាយថ្លែងថា សពស្ត្រីខាងលើនេះមានស្នាមរបួសក្បាលនិងថ្ងាសដូចត្រូវគេវាយសម្លាប់រួចប្លុងសពចោលក្នុងស្រះទឹកដែលមានចម្ងាយប្រមាណ៤០ម៉ែត្រ ពីផ្លូវជាតិលេខ១ ។ លោកអធិការនគរបាលស្រុកនិយាយថា នៅក្បែរស្រះទឹកដែលប្លុងសពចោលនោះមានខោអាវមួយកូនស្បោងផងដែរ ។ តាមសមត្ថកិច្ចជំនាញសន្និដ្ឋានថា ស្ត្រីរូបនេះអាចត្រូវអ្នកស្គាល់គ្នាលួងលោមយកមកសម្លាប់នៅចំណុចខាងលើដោយសារទីនោះជាកន្លែងស្ងាត់ ប៉ុន្តែពុំទាន់ដឹងថា ការសម្លាប់នោះផ្តើមចេញពីមូលហេតុអ្វីឡើយ ។
គួរបញ្ជាក់ថា អ្នកប្រទះឃើញសពស្ត្រីខាងលើនេះដំបូងគេគឺជាកសិករដែលទៅឃ្វាលគោនៅទីនោះ បានឃើញមានឈាមនៅជាប់ស្មៅក្បែរត្រពាំងក៏តាមរកមើល ស្រាប់តែប្រទះឃើញសពស្ត្រីរងគ្រោះនៅត្រពាំងទឹក ទើបរាយការណ៍ទៅសមត្ថកិច្ចចុះមកពិនិត្យ ។
លោកអធិការនគរបាលស្រុកកៀនស្វាយបានអំពាវនាវដល់ប្រជាពលរដ្ឋទូទៅកុំប្រថុយជីវិតទៅដល់ភូមិសាស្ត្រខាងលើនេះតែម្នាក់ឯង ព្រោះទីនោះជាតំបន់ដាច់ស្រយាលស្ងាត់ណាស់ ៕
ចែករំលែកព័តមាននេះ