រាជធានីភ្នំពេញ ៖ អ៊ឹង បូរិន មកពីក្លឹបគជសារកីឡា ជួបពុទ្ធ ឆាយរិទ្ធី មកក្លឹបពុទ្ធសេរីវង្សព្រែកតាទែន នៅលើសង្វៀនស្ថានីយទូរទស្សន៍ CTN ក្នុងវគ្គជម្រុះវិលជុំពូលA នៅក្នុងព្រឹត្តិការណ៍នៃការប្រកួតដណ្តើមខ្សែក្រវាត់ជើងឯក១០លានរៀល ពីក្រុមហ៊ុនស្រាផែនដី នៅថ្ងៃទី១៩ ឧសភានេះ គឺគ្រាន់តែឡើងមកកំដរឆាកប៉ុណ្ណោះ ។
បូរិន ប្រកួតបាន៣លើករួចមកហើយ គឺចាញ់រហូត ឯការមកប៉ះរិទ្ធីថ្ងៃនេះ គ្រាន់តែបង្គ្រប់កិច្ចប៉ុណ្ណោះ ។ ចំណែករិទ្ធីវិញ ប្រកួតបាន២លើកប៉ុណ្ណោះ ប៉ុន្តែមិនដែលចាញ់ឡើយ ហើយលើកនេះបើសិនជាគេឈ្នះម្តងទៀតនោះ គឺអាចមានសង្ឃឹមច្រើនក្នុងការគេចផុតពីវគ្គជម្រុះវិលជុំក្នុងពូលបាន ។
ហ៊ឹម សារ៉ាន់ មកពីក្លឹបក្រសួងការពារជាតិជួបជាម អាដាំ មកពីក្លឹបឃ្លាំងមឿងកីឡា ។ ហុឹម សារ៉ាន់ និងជាម អាដាំ ក៏បែបអស់ផ្លូវអ៊ុតដែរ ព្រោះការប្រកួតបាន៣លើកម្នាក់មកនេះ សារ៉ាន់ស្គាល់ឈ្នះតែ១ប្រកួតប៉ុណ្ណោះ ចំណែកអាដាំចាញ់រហូត ។ លើកនេះគេទាំង២នាក់ គ្រាន់តែប្រកួតជាការបង្គ្រប់កិច្ចច្រើនជាង ។
នៅក្នុងពូលA ឡុង សុភី មកពីក្លឹបសាលវ័ន្តកីឡា ឈរនៅលេខរៀងទី១ ក្នុងពូល រីឯនន់ ជំនិត មកពីក្លឹបស៊ីម៉ាក់ និងពុទ្ធ ឆាយរិទ្ធី នៅមិនទាន់ដឹងថា តើអ្នកណានឹងអាចគេចផុតពីវគ្គប្រកួតជម្រុះវិលជុំក្នុងពូលនោះទេ ព្រោះថាពេលនេះគេទាំង២នាក់កំពុងតែប្រជែងគ្នារក៣ពិន្ទុម្នាក់បន្ថែមទៀតដូចគ្នា ។
ចំណែកគូប្រកួតមិត្តភាពក្នុងសប្តាហ៍នេះមាន ហេង វិឆ័យ មកពីក្លឹបកងពលតូចលេខ៧០ជួប ផុន ផាន់ណា មកពីក្លឹបអប្សរាក្បាច់គុនខ្មែរ ។ ទូច ស័ក្តិ មកពីក្លឹបរស្មីកុមារកំព្រា ជួបគួន សុវណ្ណ មកពីក្លឹបពុទ្ធសេរីវង្សព្រែកតាទែន ៕
ចែករំលែកព័តមាននេះ