រាជធានីភ្នំពេញ ៖ ការប្រកួតបាល់ទះដណ្តើមពានរង្វាន់លីអូឆ្នាំ២០១២ ដែលធ្វើឡើងនៅពហុកីឡដ្ឋានស្តាតចាស់ សម្រាប់ពូលA ក្រុមក្រសួងមហាផ្ទៃ បន្ទាប់ពីបានយកឈ្នះក្រុមខេត្តកណ្តាល២ ក្នុងលទ្ធផល៣សិត០ កាលពីរសៀលថ្ងៃព្រហស្បតិ៍ទី១៧ ឧសភា មកនេះ គេអាចឆ្លងផុតពីវគ្គជម្រុះវិលជុំក្នុងពូល និងអាចមានឱកាស ត្រៀមឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀត ។
ក្រុមក្រសួងមហាផ្ទៃ ឆ្លងកាត់ការប្រកួតចំនួន៤លើក ឈ្នះទាំង៤លើកជាប់គ្នា។ ប្រកួតលើកទី១ ឈ្នះក្រុមកងពលតូចលេខ៣១ ក្នុងលទ្ធផល៣សិត០ ប្រកួតលើកទី២ឈ្នះក្រុមអង្គការភាពញញឹមនៃកុមារ៣សិត០ លើកទី៣ឈ្នះក្រុមខេត្តព្រៃវែង ៣សិត០ ។ ដោយឡែក សម្រាប់ការយកឈ្នះក្រុមខេត្តកណ្តាល២ចំនួន៣សិតជាបន្តទៀតនេះ ធ្វើឱ្យក្រុមក្រសួងមហាផ្ទៃឈានឡើងទៅឈរនៅលេខរៀងទី១ក្នុងពូល។ ចំណែកក្រុមខេត្តកណ្តាល២វិញ ទើបតែលេងបាន៣ប្រកួតប៉ុណ្ណោះ ក្នុងនោះឈ្នះ២ ចាញ់១ នៅមិនទាន់ដឹងថាអាចគេចផុតពីវគ្គជម្រុះក្នុងពូល ឬយ៉ាងណានោះទេ ព្រោះថាគេនៅរង់ចាំអ៊ុតមើលការប្រកួតជាមួយក្រុមកងពលតូចលេខ៣១ ជាបន្តទៀតសិន ។ ក្នុងពូលA ក្រុមខេត្តព្រៃវែង និងក្រុមអង្គការភាពញញឹមនៃកុមារ មានតែផ្លូវហាលអាវ ប៉ុណ្ណោះ ព្រោះថាការប្រកួតទាំង៣លើកកន្លងមកនេះអត់មានក្រុមណាស្គាល់ឈ្នះឡើយ ។ ក្នុងការប្រកួតនៅថ្ងៃព្រហស្បតិ៍ទី១៧ ឧសភា ក្រុមខេត្តព្រៃវែងចាញ់ក្រុមកងពលតូចលេខ៣១ ក្នុងលទ្ធផល៣សិត០ ។
សម្រាប់ពូលB ក្រុមបញ្ជាការដ្ឋានអង្គរក្ស បន្ទាប់ពីឈ្នះក្រុមកងរាជអាវុធហត្ថលើផ្ទៃប្រទេស៣សិត០ នៅថ្ងៃព្រហស្បតិ៍ទី១៧ ឧសភា នោះដែរ អាចមានសង្ឃឹមច្រើនក្នុងការឈានឡើងទៅលេងនៅវគ្គ១/២ផ្តាច់ព្រ័ត្រជាបន្តទៀត ។ ចំណែកក្រុមខេត្តកណ្តាល១ បើទោះជាលេងឈ្នះក្រុមវិទ្យាល័យជាស៊ីមសាមគ្គី៣សិត០ក៏ដោយក៏ក្រុមនេះមានតែផ្លូវហាលអាវប៉ុណ្ណោះ ៕
ចែករំលែកព័តមាននេះ