រាជធានីភ្នំពេញ ៖ ជ័យ វណ្ណៈ មកពីក្លឹបឃ្លាំងមឿងកីឡា ឈ្នះ ទី ពន្លែត មកពីក្លឹបសឹករងខេត្តសៀមរាបដោយពិន្ទុក្នុងការប្រកួតនៅលើសង្វៀនស្ថានីយទូរទស្សន៍ប៉ុស្តិ៍លេខ៣ កាលពីថ្ងៃសៅរ៍ ទី១២ ឧសភា កន្លងមកនេះ ។
ប្រវត្តិមិនធ្លាប់ប៉ះគ្នាពីមុនមករវាង ពន្លែត និង វណ្ណៈ បានធ្វើឱ្យការប្រកួតហាក់បីដូចជាមិនសូវស្វាហាប់ទាល់តែសោះ ជាពិសេសនៅដើមទឹកទី១ និងទី២ ទាំងសងខាងមានការប្រុងប្រយ័ត្នរៀងៗខ្លួន ។ ប៉ុន្តែចរិតឆាប់ឆេវឆាវរបស់ វណ្ណៈ មិនបានធ្វើឱ្យគេមានការអត់ធ្មត់បានយូរឡើយ។ គ្រាន់តែចូលទឹកទី៣ភ្លាម វណ្ណៈសម្រុកចូលកៀកប្រើកែងទៅលើ ពន្លែត ដោយមិនបង្អង់យូរ ប៉ុន្តែ ពន្លែត ក៏បានវាយនិងទាត់សងវិញយ៉ាងចាស់ដៃ ជាការឆ្លើយតបនឹងការសម្រុកចូលរបស់វណ្ណៈ ។ នៅទឹកទី៤ទាំងសងខាងមានប្រៀបស្មើគ្នា លុះចូលដល់ទឹកទី៥ វណ្ណៈ កាន់តែសម្រុកខ្លាំងជាងមុនដើម្បីដណ្តើមពិន្ទុចុងក្រោយយកឈ្នះ ពន្លែត ទាំងលំបាក ។
ឈាន ហុង មកពីក្លឹបអាជ្ញាធរជាតិអាវុធគីមីយកឈ្នះ វ៉ាន់ ចាន់វេត មកពីក្លឹបសិង្ហកីឡាដោយពិន្ទុ ។ គូនេះមុនពេលប្រកួត ឈាន ហុង អត់សូវមានជំនឿចិត្តឡើយ ព្រោះថា បើស្ទាបស្ទង់ទៅលើផ្នែកបច្ចេកទេសប្រយុទ្ធនិងកម្លាំងគឺមិនអាចប្រៀបស្មើជាមួយ ចាន់វេត បានទេ ។ ប៉ុន្តែផ្ទុយទៅវិញ ឈាន ហុង បានធ្វើឱ្យអ្នកទស្សនាមានការភ្ញាក់ផ្អើលយ៉ាងខ្លាំង ដោយសារគេអាចបំបាក់ ចាន់វេត បាន ។
នៅទឹកទី១ និងទី២ ឈាន ហុង មិនហ៊ានសម្រុកទៅលើ ចាន់វេត ភ្លាមទេ គឺគេនៅធ្វើការស្ទាបស្ទង់កម្រិតបច្ចេកទេសគូប្រកួតសិន ។ ផ្លែកែង និងជង្គង់ដ៏ល្អរបស់គេ ចាប់ផ្តើមបញ្ចេញនៅទឹកទី៣និងទី៤ ខណៈចាន់វេត ព្យាយាមបញ្ចេញស្នៀតជើងទាត់បញ្រ្ចាសសងវិញ ។ ចាន់វេត ដែលមិនមានការប្រុងប្រយ័ត្នពីមុនមកនោះត្រូវ ឈាន ហុង វាយរុញច្រានឱ្យដកថយអែបខ្សែរេញជាប់រហូត ជាពិសេសនៅក្នុងទឹកទី៥ ឈាន ហុង កាន់តែធ្វើឱ្យចាន់វេត បាត់បង់ស្ថានភាពប្រយុទ្ធស្ទើរតែទាំងស្រុង ។
ង៉ែត រដ្ឋា មកពីក្លឹបក្រសួងមហាផ្ទៃ យកឈ្នះ សូយ ភិរម្យ មកពីក្លឹបអូដឹមកីឡា ដោយពិន្ទុ។ ពេជ្រ សំណាង មកពីក្លឹបមជ្ឈមណ្ឌលកីឡាកងយោធពលខេមរភូមិន្ទ យកឈ្នះ កុសល វិសាល មកពីក្លឹបសាលវ័ន្តកីឡាដោយពិន្ទុ ៕
ចែករំលែកព័តមាននេះ