រាត្រីថ្ងៃអាទិត្យដ៏នក្ខន្តឫក្សរបស់ក្លឹប Man City បានអង្រួនពហុកីឡដ្ឋាន Etihad ក្នុងទីក្រុងម៉ែនឆេស្ទ័រ ក្រោមក្រសែភ្នែកទស្សនិកជនគាំទ្រជិត៥០.០០០នាក់ បន្ទាប់ពីទទួលបានជោគជ័យយកឈ្នះការប្រកួតទៅលើក្លឹបលេខ៤ បាតតារាង QPR ដោយលទ្ធផល ៣-២ មានឱកាសលើកពានអង់គ្លេសប្រឺមីញេលីក លើកទី១ ដែលបានទន្ទឹងរង់ចាំរបស់រយៈពេល៤៤ឆ្នាំមកហើយ ។ នេះគឺជាការលើកពានរង្វាន់លើកទី៣ សម្រាប់ក្លឹប Man City ក្នុងប្រវត្តិសាស្ត្របាល់ទាត់របស់គេ។
ការលើកពានរង្វាន់របស់ក្លឹប Man City នេះចាត់ទុកថា ជាការបើកទំព័រប្រវត្តិសាស្ត្រថ្មីក្នុងអាណត្តិដឹកនាំរបស់លោកម៉ាន់ ស៊ីនី ដែលបានត្រួសត្រាយផ្លូវរកពានរង្វាន់សម្រាប់ក្លឹប Man City បន្ទាប់ពីក្លឹបនេះខកខានលើកពានតាំងពីឆ្នាំ១៩៦៨ មកម៉្លេះ ហើយវាក៏ជាសាមួយព្រមានដល់ក្លឹបគូបដិបក្សបិសាចក្រហម Man Utd ផងដែរ សម្រាប់រដូវកាលក្រោយៗទៀត ។ ជ័យជម្នះរបស់ក្រុម Man City ទៅលើក្រុម QPR បានធ្វើឱ្យជ័យជម្នះរបស់ក្រុម Man Utd គ្មានន័យហើយបានត្រឹមតែសម្រក់ទឹកភ្នែកក្នុងទីលានប្រកួត បើទោះបីជាពិន្ទុរបស់គេស្មើគ្នាតែចាញ់គ្រាប់បាល់ស៊ុតបញ្ចូលទីក្លឹប Man City ចំនួន៨គ្រាប់ ។
នៅក្នុងដំណើរការប្រកួតតង់ទី ១ ក្លឹប Man City ដែលស្រេកឃ្លានចង់បានជ័យជម្នះបានបើកការវាយលុកគ្របសង្កត់ទៅលើក្រុម QPR យ៉ាងខ្លាំង ហើយជាលទ្ធផលនៅនាទី៣៩ កីឡាករ Zabaleta ស៊ុតបាល់បញ្ចូលទីបាន១គ្រាប់ ក្រោយពីមានការបញ្ជូនបាល់ដ៏ល្អរបស់កីឡាករ Toure ។ ការនាំមុខ១-០របស់ក្លឹប Man City បានរក្សារហូតដល់ចប់ការប្រកួត៤៥នាទី ។ ចូលមកដល់តង់ទី២ រយៈពេលត្រឹមតែ៣នាទីប៉ុណ្ណោះ កីឡាករវ័យចំណាស់ជនជាតិបារាំង Cisse របស់ក្លឹប QPR មានឱកាសស៊ុតបាល់បញ្ចូលទីបាន១គ្រាប់តាមយកស្មើធ្វើឱ្យក្លឹប Man City កាន់តែជ្រួលច្របល់ ។ ក្រោយពីឃើញលទ្ធផលតាមយកស្មើក្លឹប Man City បង្កើនល្បឿនវាយបកទៅមុខទីក្លឹប QPR ធ្វើឱ្យមានភាពចន្លោះប្រហោងផ្នែកខ្សែការពារទើបធ្វើឱ្យកីឡាករ Mackie មានឱកាសស៊ុតបាល់បញ្ចូលទីបាន១គ្រាប់នៅនាទីទី៦៦ នាំមុខ Man City ២-១វិញ។ ការនាំមុខ២-១ របស់ក្លឹប QPR បានអូសបន្លាយរហូតមកដល់នាទីទី៩០ ក៏ប៉ុន្តែការសម្រេចចិត្តបន្ថែមយ៉ាង៥នាទី របស់អាជ្ញាកណ្តាលហាក់ដូចជាផ្តល់អាទិភាពឱ្យក្រុម Man City មានឱកាសស៊ុតបាល់បញ្ចូលទីបាន២គ្រាប់ គឺនៅនាទីទី៩០បូក២ និង៩០បូក៤ យកឈ្នះ QPR ដោយលទ្ធផល ៣-២ លើកពានរង្វាន់អង់គ្លេសប្រឺមីញេលីក បញ្ឈឺចិត្ត Man Utd។
បន្ទាប់ពីទទួលបានជ័យជម្នះលោកម៉ាន់ ស៊ីនី បាននិយាយថា ៖ ការទទួលបានជ័យជម្នះចុងម៉ោងបែបនេះ គឺមិនគួរឱ្យជឿទាល់តែសោះ ខ្ញុំមិនដែលឃើញលទ្ធផលដូចនេះទេពីមុនមក ។ លោកបានបន្តទៀតថា ៖ យើងមានឱកាសច្រើនក្នុងការស៊ុតបាល់បញ្ចូលទីដូច្នេះយើងសមតែទទួលបានជ័យជម្នះនេះ បន្ទាប់ពីយើងខកខានកាន់ពានរង្វាន់នេះអស់រយៈពេល៤៤ឆ្នាំកន្លងមកហើយ ។ ចំណែកឯកីឡាករក្លឹប QPR និងគ្រូបង្វឹកក៏មិនមានការសោកស្តាយអ្វីដែរ ពីព្រោះក្លឹបរបស់គេបានបន្តលេងនៅក្នុងក្របខណ្ឌអង់គ្លេសប្រឺមីញេលីកទៀត បន្ទាប់ពីក្លឹប Bolton ប្រកួតបានត្រឹមតែស្មើ Stoke ។ គួររំលឹកដែរថា ក្លឹបដែលត្រូវជ្រុះទៅក្របខណ្ឌអង់គ្លេសឆេមពានស៊ីប រដូវកាលក្រោយគឺក្លឹប Bolton, Blackbum និង Wolves ៕
ចែករំលែកព័តមាននេះ