រាជធានីភ្នំពេញ ៖ នៅថ្ងៃសៅរ ទី១២ ឧសភា ខាងមុខនេះ គណៈកម្មការរៀបចំការប្រកួតក្បាច់គុនខ្មែរបុរាណតម្រូវឱ្យកីឡាករ ឈាន ហុង មកពីក្លឹបអាជ្ញាធរជាតិអាវុធគីមីជួបជាមួយ វ៉ាន់ ចាន់វេត មកពីក្លឹបសិង្ហកីឡា ខណៈង៉ែត រដ្ឋា មកពីក្លឹបក្រសួងមហាផ្ទៃប្រកួតជាមួយ សូយ ភិរម្យ មកពីក្លឹបអូដឹមកីឡា នៅលើសង្វៀនទូរទស្សន៍ប៉ុស្តិ៍លេខ៣ ។
ឈាន ហុង និង ចាន់វេត មិនធ្លាប់បានប៉ះគ្នាពីមុនមកឡើយ ប៉ន្តែល្បិចប្រយុទ្ធរវាងគូនេះល្អដូចគ្នា ។ ឈាន ហុង ល្អទាំងស្នៀតកែងនិងជង្គង់ ចលនាវាយចេញរហ័សគ្រាន់បើ ប៉ុន្តែស្នៀតជើងខ្សោយបន្តិច ។ ចំណែក ចាន់វេត ស្នៀតជើងនិងស្នៀតជង្គង់ល្អដូចគ្នា ប៉ុន្តែ ចាន់វេត ទាត់ចេញបានធ្ងន់គ្រាន់បើ ។ ទោះជាយ៉ាងណា ចាន់វេត មានល្បិចប្រកួតនៅលើសង្វៀនក្រាស់ជាងឈានហុង ហើយចរិតរបស់គេក៏ពូកែអត់ធ្មត់ទៀតផង ។ គូនេះពិបាកទាយទុកមុនបានណាស់ចំពោះលទ្ធផលចាញ់-ឈ្នះនោះ ។
ង៉ែត រដ្ឋា និង សូយ ភិរម្យ ធ្លាប់ប៉ះគ្នាកន្លងមក គឺមានចាញ់និងឈ្នះទៅវិញទៅមកដូចគ្នា ។ រដ្ឋា ស្នៀតជើងរបស់គេអាចយកជាការបានការទាត់ចេញមិនសូវជាខុសទិសដៅឡើយ ។ ស្នៀតកណ្តាប់ដៃវិញក៏រហ័ស ហើយធ្ងន់់គ្រាន់បើ ។ រីឯ សូយ ភិរម្យ វិញ ស្នៀតជើងនិងស្នៀតកណ្តាប់ដៃវាយចេញបានល្អ ហើយស្នៀតកែងនិងជង្គង់របស់គេក៏អាចប្រើការបាន ។ រវាងគូនេះសុទ្ធតែមិនអាចទាយទុកមុនបានដែរ ។
ពេជ្រ សំពៅ មកពីក្លឹបក្រសួងមហាផ្ទៃជួប កុសល វិសាល មកពីក្លឹបសាលវ័ន្តកីឡា ទី ពន្លែត មកពីក្លឹបសឹករងសៀមរាបជួប ជ័យ វណ្ណៈ មកពីក្លឹបឃ្លាំងមឿងកីឡា ៕
ចែករំលែកព័តមាននេះ