រាជធានីភ្នំពេញ ៖ ផុន ផាន់ណា មកពីក្លឹបអប្សរាគុនខ្មែរ បន្ទាប់ពីមានការខកខានមិនបានឡើងសង្វៀនកាលពីថ្ងៃសៅរ៍ទី២៨ មេសា ម្តងរួចមក លើកនេះគេត្រូវមកប៉ះវ៉ាន់ ចាន់វៃ មកពីក្លឹបសិង្ហកីឡា វិញម្តង នៅលើសង្វៀនស្ថានីយទូរទស្សន៍ CTN នាថ្ងៃសៅរ៍ទី១២ ឧសភា ខណៈ ខុន ចាន់ថន ដែលពីមុនឈ្មោះថា សារឹម ចាន់ថន មកពីក្លឹបកងពលធំអន្តរាគមន៍លេខ៣ព្រះវិហារ មកប៉ះភេឌី ម៉ឺនសុភា មកពីក្លឹបយុវជនអង្គរ ។
រវាង២គូខាងលើនេះ គឺប្រកួតនៅក្នុងវគ្គជម្រុះវិលជុំពូល B ដើម្បីឈានទៅដណ្ដើមខ្សែក្រវាត់ជើងឯក១០លានរៀល ប្រភេទទម្ងន់៦៥គីឡូក្រាមរបស់ក្រុមហ៊ុនស្រាផែនដី ។ ផុន ផាន់ណា ប្រកួតបាន២លើករួចមកហើយ គេបានវាយផ្តួលគូប្រកួតឱ្យចាញ់ដោយពិន្ទុទាំង២លើកដូចគ្នា ពេលនេះគេអាចរកបាន៣ពិន្ទុហើយ។ ចំណែកឯវា៉ន់ ចាន់វៃ វិញប្រកួតបាន៦លើកឈ្នះទាំង៣លើក គឺរកបាន៩ពិន្ទុនាំមុខគេ ប៉ុន្តែសម្រាប់ការមកប៉ះគ្នារវាងគេទាំង២លើកនេះ គេមានជំនឿចិត្តលើផាន់ណា ច្រើនជាង ព្រោះប្រវត្តិជួបគ្នាជាច្រើនលើកមកនេះចាន់វៃ អត់ដែលឈ្នះផាន់ណា ឡើយ ។
ផាន់ណា ល្បិចប្រយុទ្ធនៅលើសង្វៀនល្អជាងចាន់វៃ ទាំងស្នៀតកែង និងជង្គង់ ចំណែកឯវ៉ាន់ ចាន់វៃ ល្អបានតែស្នៀតជើង និងស្នៀតកណ្តាប់ដៃបន្តិចប៉ុណ្ណោះ ។ រីឯចលនាវាយលុករបស់គេក៏មិនសូវរហ័សរហួនប៉ុន្មានដែរ ប៉ុន្តែទោះជាយ៉ាងណា ក្នុងពូល B គូនេះសង្ឃឹមថានឹងអាចគេចផុតពីការហាលអាវច្រើនជាង ។
រីឯខុន ចាន់ថន និងភេឌី ម៉ឺុនសុភា វិញប្រហែលអស់ផ្លូវអ៊ុតហើយ ។ ខុន ចាន់ថន ប្រកួតបាន២លើកឈ្នះ១ ចាញ់១ ទើបតែរកបាន៣ពិន្ទុប៉ុណ្ណោះ ។ ចំណែកឯសុភា វិញ ប្រកួតបាន២លើកចាញ់ទាំង២លើក ហើយលើកនេះ បើចាញ់ទៀតគឺមានតែហាលអាវច្រើនជាង ។
ចំណែកគូប្រកួតមិត្តភាពវិញ ខុន ស៊ីចន មកពីក្លឹបកងពលធំអន្តរាគមន៍លេខ៣ព្រះវិហារ ជួបធិន សុវណ្ណ មកពីក្លឹបកងពលតូចលេខ៧០ ។ ជ័យ ពិសី មកពីក្លឹបឃ្លាំងមឿងកីឡា ជួបធី តុង ហ៊ី មកពីក្លឹបសាលវ័ន្តកីឡា ៕
ចែករំលែកព័តមាននេះ