ខេត្តតាកែវ ៖ នៅរសៀលថ្ងៃទី៨ ឧសភា មន្ទីរអប់រំ យុវជន និងកីឡា ខេត្តតាកែវ បានរៀបចំបើកការប្រកួតកីឡាមហាជនប្រចាំឆ្នាំ២០១២ នៅទីលានសាលាគរុកោសល្យខេត្ត ក្រោមអធិបតីភាពលោកឡាយ វណ្ណៈ អភិបាលរងខេត្ត តំណាងលោកស្រីបេន អភិបាលខេត្ត ដោយមានការចូលរួមពីប្រធាន អនុប្រធានមន្ទីរជុំវិញខេត្ត គណៈប្រតិភូដឹកនាំកីឡាករ កីឡាការិនី ព្រមទាំងទស្សនិកជនចូលរួមទស្សនាយ៉ាងច្រើនកុះករ នាថ្ងៃទី៨ដល់ថ្ងៃទី១១ ឧសភា។
លោកនុត ខុន ប្រធានមន្ទីរអប់រំំ យុវជន និងកីឡាខេត្ត ឱ្យដឹងថា ឆ្នាំ២០១២ នេះ មន្ទីរបានបញ្ជូនក្រុមកីឡាករ កីឡាការិនី សិស្សមធ្យមសិក្សាទៅប្រកួតថ្នាក់ជាតិលើប្រភេទវិញ្ញាសាបាល់ទាត់បុរស នារី បាល់ទះបុរស នារី បាល់បោះបុរស នារី និងអត្តពលកម្ម ហើយជាលទ្ធផលយើងទទួលបានមេដាយជូនខេត្តយើងវិញ ២៤មេដាយ ។ សម្រាប់លើកនេះគឺជាឱកាសដែលកីឡាករ កីឡាការិនី ទាំងអស់ត្រូវបញ្ចេញសមត្ថភាពប្រកួតយកចំណាត់ថ្នាក់លេខ១ ជូនក្រុមរបស់ខ្លួនដើម្បីបានទៅចូលរួមប្រកួតថ្នាក់ជាតិនាពេលខាងមុខ ។
លោកប្រធានមន្ទីរបន្តទៀតថា ថ្ងៃនេះយើងបានរៀបចំបើកការប្រកួតជ្រើសរើសជើងឯកមហាជនប្រចាំឆ្នាំដោយមានការចូលរួមប្រកួតពីក្លឹបការិយាល័យគ្រប់ស្រុក ក្រុង ក្លឹបមន្ទីរជុំវិញខេត្ត ក្លឹបសាលាឯកជន និងក្លឹបអង្គការ សរុបកីឡាករ កីឡាការិនី ចំនួន៥១១នាក់ ស្រី១៣៤នាក់ និង១៨ក្លឹប ។
លោក ឡាយ វណ្ណៈ អភិបាលរងខេត្តបានលើកឡើងថា កីឡានាំមកនូវសុខភាពល្អកម្លាំងមាំមួន ប្រាជ្ញាឈ្លាសវៃ និងសូមឱ្យប្អូនៗទាំងអស់ចៀសឱ្យឆ្ងាយពីល្បែងអបាយមុខគ្រប់ប្រភេទ ហើយត្រូវចេញឱ្យឆ្ងាយពីគ្រឿងញៀន។លោកឡាយ វណ្ណៈ បន្តទៀតថា រយៈពេលនៃការប្រកួត៤ថ្ងៃនេះ សូមប្អូនៗខិតខំធ្វើយ៉ាងណាប្រកួតឱ្យបានជោគជ័យជូនក្រុមរបស់ខ្លួន តែធ្វើយ៉ាងណាត្រូវគោរពទៅតាមបទបញ្ជារបស់គណៈកម្មការៀបចំការប្រកួត ព្រោះការប្រកួតជាបទពិសោធន៍សម្រាប់គ្នាទៅវិញទៅមក ។
ចំពោះក្រុមដែលជាប់ចំណាត់ថ្នាក់លេខ១ នឹងបានទៅចូលរួមប្រកួតនៅភូមិភាគកំពត លើគ្រប់វិញ្ញាសា មានបាល់ទាត់ បាល់ទះ បាល់បោះ និងអត្តពលកម្ម ៕
ចែករំលែកព័តមាននេះ