រាជធានីភ្នំពេញ ៖ ក្រុមភ្នំពេញក្រោន និង ក្រុម Dordoi បន្ទាប់ពីបានលេងឈ្នះ១ប្រកួតម្នាក់ទៀតនៅលើទីលានពហុកីឡដ្ឋានជាតិ កាលពីរសៀលថ្ងៃចន្ទ ទី៧ ឧសភា ដែលជាការប្រកួតក្នុងក្របខណ្ឌ AFC President’s Cup 2012 ពូលB គឺគេអាចរកបាន៦ពិន្ទុម្នាក់ស្មើគ្នា និងអាចគេចផុតពីវគ្គប្រកួតជម្រុះក្នុងពូលបានដូចគ្នា ។
គេនៅចាំបានថា នៅថ្ងៃបើកឆាកប្រកួតដំបូង កាលពីថ្ងៃទី៥ ឧសភា ក្រុម Dordoi បានយកឈ្នះក្រុម Nepal Police Club 5-1 រីឯ ក្រុមភ្នំពេញក្រោនបានយកឈ្នះក្រុម Yeedzin ក្នុងលទ្ធផល 8-0 ។ ចំណែកឯការជួបគ្នាជើងទី២ នៅថ្ងៃចន្ទ កន្លងមកនេះ ក្រុម Dordoi បានលត់ក្រុម Yeedzin ឱ្យចាញ់រហូតដល់ទៅ 11-2 ឯណោះ ប៉ុន្តែក្រុមភ្នំពេញក្រោន បានយកឈ្នះក្រុម Nepal Police Club 1-0 ទាំងលំបាកបំផុត ។
ក្នុងស្ថានភាពមិនសូវអំណោយផលដោយសារមានភ្លៀងធ្លាក់លិចទីលានទាំងមូលស្ទើរតែមិនអាចដំណើរការប្រកួតទៅបាននោះ ក្រោយពីពន្យារពេលប្រកួតអស់៣០នាទី គឺរហូតដល់ម៉ោង៥ល្ងាច ទើបអាចដំណើរការប្រកួតបាន ។ ប៉ុន្តែ ទោះបីជាយ៉ាងនេះក្តី ក៏ក្រុមភ្នំពេញក្រោន ខិតខំសហការគ្នាលេងបានយ៉ាងល្អបំផុត ជាពិសេសកីឡាករ ឃឹម បូរី ពាក់អាវលេខ៧ ដែលធ្លាប់រកបាន៣គ្រាប់ម្នាក់ឯងកាលពីជើងទី១ពេលប្រកួតជាមួយក្រុម Yeedzin នោះ ពេលនេះគេអាចប្រើប្រាស់សមត្ថភាព ថ្វីជើងរបស់គេរកបាន១គ្រាប់ទៀតយ៉ាងអស្ចារ្យបំផុត គឺគេរកបាននៅក្នុងតង់ទី១ នាទីទី២១ ។ ជាមួយនេះឃឹមបូរី និងគួច សុកុម្ភៈ មានឱកាសទាត់បាល់បញ្ចូលទីជាច្រើនលើក ច្រើនសាទៀត ប៉ុន្តែសំណាងមិនល្អ ធ្វើមិនបានសម្រេចឡើយ ។
ក្រុម Nepal Police Club បានព្យាយាមលេងវាយបកវិញដែរ តែមិនអាចទម្លុះរបាំងការពាររបស់ក្រុមភ្នំពេញក្រោនបានឡើយ ។ ជាពិសេសនៅចុងម៉ោងក្នុងតង់ទី២តែម្តង ដែលក្រុម Nepal Police Club ធ្វើឱ្យក្រុមភ្នំពេញក្រោនចង់វេទនាម្តងៗ តែក៏ជាសំណាងរបស់ក្រុមភ្នំពេញក្រោនដែរ ដែលអាចរំដោះស្ថានការណ៍អាក្រក់បាន និងធ្វើឱ្យបញ្ចប់ការប្រកួតទទួលជ័យជម្នះលើក្រុម Nepal Police Club 1-0 ។ នៅថ្ងៃទី៩ ឧសភា នេះ ក្រុម Nepal Police Club ជួបក្រុម Yeedzin ចំណែកឯក្រុមភ្នំពេញក្រោន ជួបក្រុម Dordoi នៅវេលាម៉ោង៤និង៣០នាទីរសៀល ៕
ចែករំលែកព័តមាននេះ