រាជធានីភ្នំពេញ ៖ សុខ វាសនា មកពីក្លឹបឃ្លាំងមឿងកីឡា និងយ៉ាម ឡយ មកពីក្លឹបរស្មី កុមារកំព្រា ប្រកួតស្មើពិន្ទុគ្នា សម្រាប់ការជួបគ្នានៅលើសង្វៀនស្ថានីយទូរទស្សន៍ CTN កាលពីថ្ងៃអាទិត្យទី៦ ឧសភា កន្លងមកនេះ ខណៈទឹម សាន មកពីក្លឹបអាស៊ីកីឡា ឈ្នះឡេះ តើក មកពីក្លឹបពុទ្ធសេរីវង្សព្រែកតាទែនទាំងលំបាកបំផុត ។
សុខ វាសនា បានព្យាយាមវាយសម្រុកទៅលើយ៉ាម ឡយ តាំងពីទឹកទី២ ជាពិសេសស្នៀតជើងរបស់គេតែម្តង បានបង្កើនការទាត់ចេញឥតឈប់ ប៉ុន្តែត្រូវយ៉ាម ឡយ វាយបកសងវិញភ្លាមៗ ។ វាសនា អន់កម្លាំងបន្តិច គេអាចទាត់ចេញបានតែពីចម្ងាយប៉ុណ្ណោះ អត់ហ៊ានចូលកៀកទេ ព្រោះស្នៀតកណ្តាប់ដៃរបស់យ៉ាម ឡយ វាយចេញបានល្អឥតខ្ចោះ ប៉ុន្តែការវាយចេញ និងការប្រើស្នៀតជើងរបស់យ៉ាម ឡយ មានរបៀបផ្សងព្រេងច្រើនជាង ។ នៅទឹកទី៣ និងទឹកទី៤ ទាំងសងខាងនៅតែមានប្រៀបប្រហាក់ប្រហែលគ្នា ការវាយតម្លៃរបស់ចៅក្រមទាំង៥រូប កំណត់យកទឹកទី៥ បើអ្នកណាមានប្រៀបជាងនឹងអាចឈ្នះបាន ប៉ុន្តែគេទាំង២នាក់នៅតែមិនអន់ជាងគ្នា ទីបំផុតការកាត់ក្តីរបស់អាជ្ញាកណ្តាលសម្រេចឱ្យស្មើគ្នា ។
ទឹម សាន និងឡេះ តើក សុទ្ធតែជាអ្នកប្រដាល់ចាស់វស្សាមានល្បិចប្រយុទ្ធនៅលើសង្វៀនច្រើនដូចគ្នា ប៉ុន្តែបើនិយាយពីកម្លាំងវិញគឺខ្សោយបន្តិចហើយ ។ ទឹម សាន ដែលមានស្នៀតជើង និងកណ្តាប់ដៃល្អ បានព្យាយាមវាយសម្រុកតាំងពីទឹកទី១ ព្រោះថាទម្លាប់របស់គេបើមិនប្រឹងវាយសម្រុកនៅទឹកដំបូងទេ គឺមិនអាចយកឈ្នះគូប្រកួតបានឡើយ ។ ភាគច្រើននៅទឹកទី៤ និងទឹកទី៥ គឺស្រុតកម្លាំង ប៉ុន្តែលើកនេះសំណាងហើយដែលគេមកប៉ះចំឡេះ តើក មិនសូវខ្លាំងដែរ ទោះជាយ៉ាងណា ចលនាវាយចេញរបស់ទឹម សាន មានសភាពយឺតយ៉ាវបន្តិច ។ នៅទឹកទី២ និងទឹកទី៣ ទឹម សាន វាយចេញចំគោលដៅច្រើនគួរសម។ ឡេះ តើក បានត្រឹមតែវាយបកសងវិញម្តងម្កាល និងដកថយអែបខ្សែរេញរហូត ។ តាមពិតឡេះ តើក មានស្នៀតកែងល្អ ប៉ុន្តែដោយសារតែគេចាញ់ប្រៀបខាងកម្ពស់នោះ ធ្វើឱ្យគេមានការពិបាកសម្រុកចូលកៀកខ្លាំងណាស់ ទោះជាយ៉ាងណា ចិត្តរបស់គេក៏សឿងគួរសមដែរ ព្រោះថាគេអាចតស៊ូរហូតដល់ចប់ទឹកទី៥បាន ។
ឆាំ រ៉ែម មកពីក្លឹបសិង្ហកីឡា យកឈ្នះសម ចន្ថា មកពីក្លឹបសាលវ័ន្តកីឡាដោយពិន្ទុ ។ សារឹម ង៉ា មកពីក្លឹបក្រសួងការពារជាតិ យកឈ្នះចេង ឫទ្ធី មកពីក្លឹបសាលវ័ន្តកីឡា ដោយពិន្ទុ ៕
ចែករំលែកព័តមាននេះ