រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា កាលពីព្រឹកថ្ងៃអង្គារ ទី១ ឧសភា នៅមជ្ឈមណ្ឌលកីឡាបាល់ទាត់ជាតិ ស្ថិតក្នុងភូមិចែងម៉ែង សង្កាត់កាកាប ខណ្ឌដង្កោ បានរៀបចំបើកវគ្គសិក្សាគ្រូបង្ហាត់បាល់ទាត់ថ្នាលរបស់ FIFA មានរយៈពេល៥ថ្ងៃ គិតចាប់ពីថ្ងៃទី១ ដល់ថ្ងៃទី៥ ឧសភា ។
នៅក្នុងការបើកវគ្គសិក្សានេះបានការអញ្ជើញចូលរួមពីលោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជា លោក ម៉ៃ តុលា អគ្គលេខាធិការរងសហព័ន្ធកីឡាបាល់ទាត់កម្ពុជា និងលោក VINCENT SUBRAMANIAM ជនជាតិសិង្ហបូរី ជាគ្រូឧទ្ទេសប្រចាំវគ្គរបស់ FIFA ។ ចំណែកសិក្ខាកាម ដែលចូលរួមមានចំនួន៣០នាក់ ។
លោក គល់ សុផាណា បានថ្លែងទៅកាន់សិក្ខាកាមទាំងអស់ថា បើសិនជាយើងចង់ឱ្យវិស័យកីឡាបាល់ទាត់មានការរីកចម្រើនទៅបាន គឺយើងមិនអាចរំលងកិច្ចការអភិវឌ្ឍន៍ពីវគ្គកម្រិតដំបូង គឺកម្រិលថ្នាលនេះបានឡើយ ព្រោះវាប្រៀបបានដូចជាការកសាងសំណង់ដ៏ធំមួយទៅបានគឺយើងត្រូវការរៀបចំគ្រឹះឱ្យបានរឹងមាំល្អជាមុនសិន ទើបយើងធានាបាននូវគុណភាពសុវត្ថិភាព និងអត្ថិភាពជានិរន្តរ៍បាន ។ ការខិតខំកសាងមូលដ្ឋានគ្រឹះនៃគ្រូបាល់ទាត់ថ្នាលនេះ នឹងផ្តល់នូវផលផ្លែផ្កាល្អ នៅពេលអនាគតខាងមុខនេះ ។
ដូច្នេះលោកសូមផ្តាំផ្ញើដល់សិក្ខាកាមទាំងអស់ ត្រូវខិតខំយកចិត្តទុកដាក់ត្រងត្រាប់ស្តាប់ឱ្យមែនទែន ព្រោះវាមានរយៈពេលខ្លីណាស់ ហើយយើងនឹងអាចពាំនាំយកចំណេះនេះ ទៅបង្ហាត់ដល់ក្មេងៗបន្តទៀតប្រកបទៅដោយគុណភាពខ្ពស់ ៕
ចែករំលែកព័តមាននេះ