រាជធានីភ្នំពេញ ៖ ក្រុមណាហ្គាខប សង្ឃឹមថា នឹងអាចរក្សាតំណែងនៅកំពូលតារាងបន្តទៀតបាន ខណៈក្រុមគិរីវង់សុខសែនជ័យ ត្រូវការ៣ពិន្ទុបន្ថែមទៀត។ ការប្រកួតបាល់ទាត់ក្របខណ្ឌថ្នាក់ជាតិដែលឧបត្ថម្ភដោយមិត្តហ្វូន នៅទីលានពហុកីឡដ្ឋានជាតិនាថ្ងៃសៅរ៍ទី៥ ឧសភា ខាងមុខនេះនឹងឈានចូលដល់សប្តាហ៍ទី៧ ហើយ ។
ក្រុមណាហ្គាខប ពេលនេះកំពុងតែស្ថិតនៅលេខរៀងទី១នៃតារាង ព្រោះថាក្នុងចំណោមការប្រកួតទាំង៧លើករបស់គេកន្លងមកនេះចាញ់ តែមួយលើកគត់ ក្នុងនោះឈ្នះ៥ប្រកួត និងស្មើ១ប្រកួត មាន១៦ពិន្ទុ ។ ចំណែកឯក្រុមគិរីវង់សុខសែនជ័យវិញស្ថិតនៅលេខរៀងទី៧នៃតារាង ព្រោះថាការប្រកួតទាំង៥លើករបស់គេកន្លងមកនេះឈ្នះតែ២លើក ប៉ុណ្ណោះ គឺចាញ់អស់៣លើកហើយ ទើបតែរកបាន៦ពិន្ទុប៉ុណ្ណោះ ។ ប៉ុន្តែអ្វីដែលសំខាន់នោះ គឺពេលនេះគេត្រូវការ៣ពិន្ទុបន្ថែមទៀត រីឯក្រុមណាហ្គាខបក៏ត្រូវការរក្សា
តំណែងកំពូលតារាងជាបន្តទៀតដែរ ។
ក្រុមបៀលប្រាយយូណាយធីត ជួបក្រុមព្រះខ័នរាជ្យនៅថ្ងៃសៅរ៍នោះដែរ។ ក្រុមបៀលប្រាយយូណាយធីត រហូតមកទល់នឹងពេលនេះមិនទាន់រើខ្លួនរួចពីបាតតារាងនៅឡើយទេ គឺស្ថិតនៅលេខរៀងទី៨នៃតារាងនៅឡើយ ។ ក្នុងចំណោមការប្រកួតទាំង៦លើករបស់គេកន្លងមកនេះឈ្នះ២ប្រកួត និងចាញ់៤ប្រកួត ទើបតែរកបាន៦ពិន្ទុប៉ុណ្ណោះ ។ ចំណែកក្រុមព្រះខ័នរាជ្យកំពុងតែស្ថិតនៅលេខរៀងទី៥ នៃតារាងនៅឡើយ ព្រោះថាការប្រកួតទាំង៥លើករបស់គេកន្លងមកឈ្នះ២ ស្មើ១ ចាញ់២ មាន៧ពិន្ទុ ប៉ុន្តែទោះជាយ៉ាងណា ក្រុមព្រះខ័នរាជ្យសង្ឃឹមថានឹងអាចរកបាន៣ពិន្ទុបន្ថែមទៀត ៕
ចែករំលែកព័តមាននេះ