រាជធានីភ្នំពេញ ៖ ហ៊ុន គីរី មកពីក្លឹបតាព្រហ្មមានជ័យ ណាត់ជួប រ៉ាក់ វិឆ័យ មកពីក្លឹបកងពលតូចលេខ៧០ ប្រកួតសាកកម្លាំងគ្នា នៅលើសង្វៀនស្ថានីយទូរទស្សន៍ CTN ថ្ងៃសុក្រ ទី៤ ឧសភា ខាងមុខនេះម្តងទៀត ។
រវាងគូនេះជួបគ្នា៣លើករួចមកហើយ ក្នុងនោះមានចាញ់ឈ្នះម្តងម្នាក់ និងស្មើ១ប្រកួត ។ គីរី បើនិយាយទៅ អត់មានស្នៀតអ្វីដែលពិសេសឡើយ ភាគច្រើនវាយអាងកម្លាំងសុទ្ធសាធតែម្តង ប៉ុន្តែគេមានចិត្តសឿងខ្លាំងណាស់ ត្រូវកាន់តែខ្លាំងកាន់តែដើរចូល ។ គីរី ល្អតែស្នៀតកណ្តាប់ដៃមួយមុខគត់ រីឯស្នៀតជើងវិញ ទាត់របៀបផ្សងព្រេងច្រើនជាង ។ រីឯ វិឆ័យ វិញ ល្អទាំងស្នៀតកែង និងជង្គង់ឡើងទៅ ម៉្យាងវិញទៀត របៀបវាយលុករបស់ វិឆ័យ មានការប្រយ័ត្នប្រយែងធ្វើឱ្យរាល់ការវាយចេញទាំងស្នៀតជើងនិងកណ្តាប់ដៃមិនសូវជាឥតប្រយោជន៍ឡើយ ។ លើកនេះ គេមិនទាន់ដឹងថា ខាងណាមានប្រៀបជាងខាងណាទេ ប៉ុន្តែអ្នកមើលភាគច្រើន គេមានជំនឿចិត្តលើ វិឆ័យ ច្រើនជាង ។
សេក គឹមផាន មកពីក្លឹបសឹករងខេត្តសៀមរាប ណាត់ជួប ផល សុភាព មកពីក្លឹបឃ្លាំងមឿងកីឡាខេត្តពោធិ៍សាត់ ។ រវាងគូនេះក៏ជាគូសងសឹកគ្នាពីមុនមកដែរ ប្រវត្តិធ្លាប់ជួបគ្នា២-៣លើកមកនេះ គឺមានចាញ់មានឈ្នះទៅវិញទៅមកដូចគ្នា ។ ដូច្នេះហើយបានជាលើកនេះគេ ទាំងពីរនាក់បានណាត់ជួបគ្នាម្តងទៀតដើម្បីឱ្យអស់ចិត្ត ថានរណាជាអធិរាជនៅលើសង្វៀនពិតប្រាកដ ។
សេក គឹមផាន បើធ្វើការប្រៀបធៀបផ្នែកកម្លាំងវិញនោះគឺល្អជាង សុភាព ប៉ុន្តែល្បិចប្រយុទ្ធវិញ គឺមិនលើសគ្នាឡើយ ។ គឹមផាន ល្អស្នៀតជើងនិងជង្គង់ ប៉ុន្តែចលនានៃការទាត់ចេញ រាងយឺតយ៉ាវបន្តិច ឯស្នៀតកណ្តាប់ដៃវិញ អាចវាយចេញបានត្រង់ល្អ និងខ្លាំងទៀតផង ។ ចំណែក សុភាព ពូកែអត់ធ្មត់ តែមិនចូលចិត្តឱ្យគេមើលស្រាលឡើយ ទម្លាប់របស់គេចង់អ្នកណាខ្លាំងយ៉ាងណាក៏គេមិនខ្លាចដែរ ។ ប៉ុន្តែសម្រាប់ការប៉ះគ្នាលើកនេះទាំងសងខាងសុទ្ធតែមិនអាចមានការធ្វេសប្រហែសបានឡើយ ។
ថុល មករា មកពីក្លឹបឃ្លាំងមឿងកីឡាខេត្តពោធិ៍សាត់ ជួប ឈិន ធារ៉ា មកពីក្លឹបអន្លង់វែងនិង នូវ ស៊ីថា មកពីក្លឹបខេត្តរតនគិរី ជួប ហេង ពិសិដ្ឋ មកពីក្លឹបខេត្តបាត់ដំបង ៕
ចែករំលែកព័តមាននេះ