រាជធានីភ្នំពេញ ៖ ក្រុមបៀលប្រាយយូណាយធីត បានយកឈ្នះក្រុមក្រសួងការពារជាតិ១-០ ក្នុងការប្រកួតនៅលើទីលានពហុកីឡដ្ឋានជាតិ កាលពីថ្ងៃសៅរ៍ ទី២៨ មេសា ក្នុងក្របខណ្ឌថ្នាក់ជាតិ ខណៈពេលដែលក្រុមណាហ្គាខបបានធ្វើឱ្យក្រុមឆ្លាមសមុទ្រចាញ់
៨-១ ។
បើទោះជារហូតមកដល់ពេលនេះក្រុមបៀលប្រាយកំពុងស្ថិតនៅលំដាប់ថ្នាក់ចុងក្រោយគេនៃតារាងក៏ដោយ ប៉ុន្តែយ៉ាងហោចណាស់ក៏គេអាចធ្វើឱ្យក្រុមក្រសួងការពារជាតិចាញ់១-០ ទាំងមិនអស់ចិត្តដែរ គឺរកបាននៅតង់ទី១ ក្នុងនាទីទី៤៥ ជាថ្វីជើងរបស់កីឡាករ ពេជ្រ សីសេណា ពាក់អាវលេខ១៧ ជាកីឡាករបម្រុង ។ ចូលដល់តង់ទី២ ទាំងសងខាងបានព្យាយាមលេងសង្កត់់ទៅវិញទៅមក និងការពារបានល្អដូចគ្នា ប៉ុន្តែនៅក្នុងតង់ទី២ ក្រុមក្រសួងការពារជាតិមានឱកាសស៊ុតបាល់បញ្ចូលទីជាច្រើនលើកច្រើនសាគ្រាន់តែមិនបានសម្រេចប៉ុណ្ណោះ ។
ក្រុមបៀលប្រាយយូណាយធីត ពេលនេះលេងបាន៦ប្រកួតរួចហើយ ក្នុងនោះឈ្នះ២ ប្រកួត ចាញ់៤ប្រកួត ទើបតែរកបាន៦ពិន្ទុប៉ុណ្ណោះ ។ រីឯក្រុមក្រសួងការពារជាតិវិញលេងបាន៦ប្រកួតដូចគ្នា ឈ្នះ១ ស្មើ៤ និងចាញ់១ ទើបតែរកបាន៧ពិន្ទុ ។ ក្រុមណាហ្គាខប ឈ្នះក្រុមឆ្លាមសមុទ្រ៨-១ ។ គ្រាន់តែនៅតង់ទី១ ក្រុមណាហ្គាខបអាចរកបានគ្រាប់បាល់៤-០នាំមុខមុនរួចទៅហើយ លុះចូលដល់តង់ទី២ ក្រុមណាហ្គាខបរកបាន៤គ្រាប់បន្ថែមទៀត ប៉ុន្តែត្រូវក្រុមឆ្លាមសមុទ្រតាមសងបាន១គ្រាប់វិញ ។ ក្រុមណាហ្គាខបពេលនេះលេងបាន៧ប្រកួត ឈ្នះ៥ ស្មើ១ ចាញ់១ មាន១៦ពិន្ទុ ចំណែកឯក្រុមឆ្លាមសមុទ្រ លេងបាន៦ប្រកួត ឈ្នះ១ ចាញ់៥ ទើបតែរកបាន៣ពិន្ទុប៉ុណ្ណោះ ។
រីឯលទ្ធផលនៃការប្រកួតនៅថ្ងៃអាទិត្យ ទី២៩ មេសា នៅលើទីលានពហុកីឡដ្ឋានជាតិដដែល ក្រុមគិរីវង់សុខសែនជ័យ បានធ្វើឱ្យក្រុមភ្នំពេញក្រោន ចាញ់៣-១ ចំណែកក្រុមបឹងកេតបានត្រឹមតែយកស្មើ២-២ ជាមួយក្រុមព្រះខ័នរាជ្យ ។ ក្រុមគិរីវង់សុខសែនជ័យ ពេលនេះលេងបាន៥ប្រកួត ឈ្នះ២ ចាញ់៣ មាន៦ពិន្ទុ រីឯក្រុមភ្នំពេញក្រោន លេងបាន៨ប្រកួតហើយ ក្នុងនោះឈ្នះ៤ ចាញ់៤ មាន១២ពិន្ទុ ។ ដោយឡែក ក្រុមចម្ការកៅស៊ូបឹងកេត ពេលនេះលេងបាន៦ប្រកួត ឈ្នះ៣ ស្មើ២ ចាញ់១ មាន១១ពិន្ទុ ។ ក្រុមព្រះខ័នរាជ្យ លេងបាន៥ប្រកួត ឈ្នះ២ ស្មើ១ ចាញ់២ មាន៧ពិន្ទុ ៕
ចែករំលែកព័តមាននេះ